中三一段不可能忘記的初戀: 19.
「終於考完試啦！今日上我屋企記得啵！」
「你個咸濕仔叫我上去都唔知你係咪有咩企圖！」
「冇架，除非你諗衰野啦！」
「去死啦你！」
講下講下，終於落到學校門口，我見到MING係門口
「晴，你而家比你揀，你今日生日要跟佢定跟我。」MING
「吓，做咩事…」阿晴
「而家要你揀，跟邊個走！」MING
「你講野小心啲好啵，而家佢已經同你分咗手！」我
「好…好…姐係跟佢啦…」MING「五仔呀嗎，我仲記得你，估唔到我竟然輸比你！」跟住佢就咁走咗
我同阿晴都慢慢行咗出去
「屌，咁撚恐怖嘅…」
「佢真係好唔甘心，不過無論佢點講都好我都唔會跟佢走。」
「不過啱啱係學校門口講一講全校都知道我地之間發生咩事，你為咗同我一齊同MING分手。仆街啦，星期一返學會唔會比屌到仆街架…」我
「放鬆啲啦，唔發生都發生咗，咁而家我地咪可以光明正大係埋一齊囉…」
突然有人拍一拍我膊頭，「你係咪五仔？」
「我係，咁又點…」未講完佢一拳打落我個肚，成個肚好似比人反轉咗咁，我跪咗係地下。
「做咩打人呀！」阿晴見到嚇到傻咗，跟住擋咗係我前面。
「MING嫂，唔該借一借，我地唔想打親你。」打我個兩個人講
「要打佢就打死我先…」MING嫂
「屌，等我黎。」MING突然過咗黎，一手拉開阿晴，然後一腳踢落我個肚到
我見阿晴比人捉住咗不過喊曬口，不過我痛到起唔到身，只可以望住佢
恆仔見到我跑過黎，「做咩撚野打人呀！？」
佢一手扶起我，「屌，有咩慢慢講囉，打人做咩撚野！」
「佢勾我女朋友，我而家比呢條仆街戴綠帽呀！」MING
「咁都唔洗打人架！」恆仔
「我勸你唔好插隻手埋黎呢件事，我知你係佢個friend，不過今日係我同佢私人恩怨，唔想干擾到任何人！」
「放開我呀！」阿晴仲係比MING啲跟班捉住。
「佢係我個friend，如果佢比人打我唔幫拖我仲係人！」恆仔，「同埋佢唔係你女朋友，你好快啲放開人囉！」
「關你撚事咩柒頭！佢係我條女我想點咪點！」MING「我唔理，呢三個人都同我打！」
由於我地係學校唔係太遠嘅地方，咁樣打法好多學生都見到，一開頭我比人打都啲人都係圍觀，因為我勾佢女朋友，不過佢開始想打女人，啲人都開始阻止佢。MING見唔對路，只係踢多我一腳就同啲人跑走咗。
「你冇事呀嗎？」阿晴問我
「你覺得呢…」我「比我返屋企休息下先。」
「你小心啲呀，佢地可能會番黎搵你…」恆仔「我都要番屋企先。」
「好啦我會陪住五仔。」阿晴
返到屋企，我個肚仲係有啲痛。
「你冇事呀嗎？」
「我仲有少少痛，不過好好多啦…」我「你有冇見過MING咁樣打人架？」
「點會有，我之前以為佢嚇吓你就…」
「之前？其實你係咪知道啲咩？」
「冇呀，我每次同佢一齊佢都好少講呢啲野…」
「佢緊係唔會同你講佢會打人啦！我係問你係咪知道佢會有行動…」我「好似佢啲靚搵我個時你係咪已經知道咩事？」
「我……係知少少嘅…」
「咁你又唔同我講？」
「我真係以為佢嚇吓你，我真係唔知佢真係會打人架！」
「咁你知道佢會做野你都唔同我講？」
「咁我同你講有用咩！」
「咁至少我知道發生咩事！同埋每一次同你出完街就會比人提醒，其實MING係咪唔想我地兩個出街？」
「係…」
「屌，咁你好地地同佢分手咁我地兩個咪冇事囉，你一拖就拖撚咗成個月，你同佢好好溝通我唔想佢會做到咁囉！」
「你又知，你覺得佢比人戴綠帽你就可以好地地冇事咁樣過去？」
「咁你同佢講得清清楚楚你覺得佢會嬲到咁咩！」
「咁你而家幫人地戴綠帽你覺得你就完全冇問題咩？」
嘈咗咁耐，佢終於忍唔住離開咗屋企。唔係話我完全冇錯，我個一刻只係覺得佢可以改變嘅野更多，無啦啦比人打，阿晴過仲成個月先同佢分手，阿晴佢同佢一齊嘅時間仲多過我，就算我有做錯，我都唔覺得我有啲咩真係改變到。
個日佢生日，原本諗住同佢開開心心咁過，不過佢好似等我同佢講對唔住，不過我真係唔想講，好似次次都係我錯咁，我地就係咁樣等咗對方成日令到我地兩個生日都冇見到面。就係咁樣我地星期一番學先見番面，點知佢仲嬲緊我，見到佢彩都唔彩我，我見佢咁嘅樣我都唔想理佢，可能佢係嬲我生日都唔順佢意，生日禮又冇比到佢，不過我個一刻冇諗過呢樣野。
「五仔，你地兩個做咩呀？」
「冇野，我咩都冇做啵…」
「平時你地一番學就講唔停架啵，今日野都唔講嘅。」恆仔「不過你地兩個啲野我唔想插手，你當我咩都冇講過啦吓。」
學校好多人都講緊我地三個嘅事，但係啲人最估唔到應該係MING竟然出手打女仔，咁樣令到一個萬人迷突然間唔再受歡迎，雖然都係有啲人對我指指點點，但係我堆friend都係覺得MING太過份，呢件事對MING影響真係好大，會考完佢直情去咗第二間學校升。反而恆仔咁有義氣嘅行為令多咗好多人識佢同受歡迎咗，我同阿晴兩個竟然就冇咩人講。
考完試頭三日都係對卷，睇住自己啲成績我都知道出事啦，今次睇黎我真係要走。阿晴每次派完卷都想睇我成績，不過我就特登遮住唔比佢睇。佢只係用一個你咪唔好比我睇個眼神回應我，我心諗你想知咪開口問囉。對完卷之後通常學校仲有十幾日唔知返學做咩嘅日子，點知好死唔死豬流感全部唔洗返，可能就係因為唔洗返學，MING都廢事搵我，不過我晚晚都睇住阿晴個MSN同電話唔知搵唔搵佢好，不過我都係想等佢開口先。不過有一次開facebook，佢竟然搵番MING出街，影埋相，個一下我真係有少少嬲，不過諗深一層我都就走，比佢用呢一段時間慢慢忘記我，雖然個status寫住分手也是朋友，我知道佢擺到明係激我，所以我直接唔理佢。亦都可能係咁MING冇搵我…