中三一段不可能忘記的初戀: 20.

我阿爸阿媽都番黎之後我都直接話出外國讀書，因為成績嘅關係，由於我呀媽晨早寄曬啲野嘅關係，而家淨係等個邊學校寄番野比我，我就走得(姐係其實我阿媽已經睇死我升唔到，寄曬啲野但係冇同我講過)。兩個星期之後，我地返學校攞成績表，我睇住自己啲分自己都忍唔住笑咗出黎，冇辦法，真心已經比之前更加比心機，不過我真係做唔到啦…
 
「你係咪真係要走。」恆仔問我
 
「唔知呢。」我見阿晴係隔離好專心聽緊搞到我都唔想講出黎。
 
「係咪咁先，兄弟都唔講得？」恆仔
 
「你地兩個係咪夾埋架？吓？」
 


「係呀，佢叫我問架，不過我都想知嘅，咁你而家肯唔肯講比我地兩個知呢？」
 
「唔知呀，睇吓間學校收唔收我囉。」
 
「拿我問咗架啦，你想知多啲你自己問啦…」
 
「邊有咁得閒理佢…」
 
過幾日間學校都收咗，淨低簽證啲濕碎野
之後個暑假都冇咩點理佢，可能佢唔知其實我想比時間佢忘記我，如果係嘅話佢應該即刻搵我。唔好講到我好似好輕鬆咁，我都好辛苦，有時我都忍唔住喊，係MSN留言打一大篇野，跟住copy and paste去記事本，跟住都係冇send到，阿晴有時都會震下我，不過諗起比佢慢慢忘記我，所以我都係冇理佢。不過呢個暑假我都不斷同同學出下街，珍惜我仲係香港嘅時間。有時一大班人出街都見到阿晴，雖然成班人有時都嘗試拉埋我地兩個一齊(因為全校都知咩事，屌)，不過我地兩個都係零溝通。


 
有一日同恆仔出去踢波，佢問「你幾時走，我要送機呀！」
 
「洗唔洗去到送機咁誇張，有啲基基地啵。」我「其實又係咪佢叫你問？」
 
「係呀，不過你做咩唔理人地姐？我聽佢講佢搵你你唔彩佢…」
 
「係呀，佢淨係震我，我都唔知佢想表達啲咩，所以咪由佢囉。」我「同埋再比多啲時間忘記對方啦，我一走起碼7年，你叫我地兩個long d七年，我真心覺得冇可能。」
 
「咁你唔仲襯呢段時間同佢顛多一陣？」


 
「到時咪令自己更加辛苦去忘記佢，而家我都好辛苦，如果感情再深啲，我都唔知自己能夠控制到…」
 
「哇未見你咁認真過，講啲野突然咁深我都有啲唔慣添…」
 
「哈，不過你唔同，唔好諗住走咗就唔理我，雖然唔會有時間一齊打機，不過至少都同我講下近況呀！」
 
「得啦，呢啲野心照啦！屌終於入波，到我地啦！」
 
第二朝，我一開電腦就發現阿晴洗咗我版。
 
MSN
「你幾時走呀？我地最少出多一次街啦好唔好？我真係好掛住你呀，你知唔知道其實我係冇可能忘記到你架！？」
 
「我一走就走7年啵，你對自己有信心我對自己都冇啦…」


 
「咁你大假都會番黎架嘛，半年一次我對你有信心呀。」
「我應該一年先番一次，不過我唔想鎖住對方，個世界咁大，你覺得你會為咗放棄全世界咩？」
 
「我唔濟呀，我淨係要你咋！」
 
我望住個對話，我驚自己忍唔住真係出咗去搵佢，之後我就封鎖咗佢，聽落去真係好低能，做咩唔好好玩埋淨低嘅日子呢？不過要我忘記一個人真係好難，加上我唔想因為對方而減對方嘅感情自由，佢係校花，點會搵唔到一個比我好嘅男仔？我寧願離開佢，我覺得對對方公平啲，而且佢都會搵一個比我好嘅男仔，更加幸福。
 
好快到走嘅日子，有幾個同學同恆仔送我機，我望住佢地都唔知我地嘅感情會因為我離開而慢慢變淡，不過我呢刻我地都好珍惜對方，其實我真係有啲感動。
 
「估唔到你真係要走，可能之後我都會唔慣。」
 
「唔好講埋啲咁基嘅野啦…仲有兩個鐘，不如飲少少先入閘？」跟住成班人就去咗starbuck
 
「其實，你諗住幾時入去？」恆仔


 
「差唔多啦，做咩呀？」我
 
「冇，睇下你會唔會等多五分鐘姐…」
 
「你有冇咁掛住我呀！」
 
「一分鐘就係一分鐘呀嗎…」
 
「好好為咗你我等…」
 
「記得唔好太遲呀仔。」我媽
 
「得啦，我又唔係第一次坐飛機…」
 


突然有人遮住我對眼，「估下我係邊個？」
 
我個一刻真係有啲感動，因為我知阿晴最後都係黎咗，個一刻我終於控制唔到自己，轉身企起身，已經見到佢眼角已經有少少眼淚，我咩都冇問就攬住佢，佢不斷搥我心口，「做咩唔理人，你知唔知我掛住你好辛苦架…」
 
跟住成班人就係隔離食花生係到WOW，「好彩你趕得切，而家有情人終成眷屬囉！」恆仔
 
「有女朋友仔都唔同阿媽講！？」我阿媽
 
「個女朋友仔都幾靚啵…」阿爸
 
「梗係啦，佢校花黎架嘛…」恆仔
 
我冇理佢地，我地兩個就攬阿媽都忍唔住分開我地兩個，因為真係要走。
 
「呢封信比你架，就算做唔成男女朋友都唔可以唔理我呀！」阿晴


 
「你都比心機讀書，唔好再好似今年咁啦！」我
 
「你仲好講！你都係呀，唔好掛住溝女搞到書都讀唔成呀！」
 
「好啦，我要走啦大家！下年見啦！」
 
上到機，打開封信︰
 
「其實我仲好嬲你，做咩唔同我講野，做咩生日連禮物都冇比到我，我明明上到你屋企你都包好架嘛！我都冇叫你講對唔住，我淨係想你開口同我講野先，點知你真係唔理我！好啦諗住同MING出街會激到你啦，點知你竟然like咗張相就算！我又好驚搵番你先因為我以為你仲嬲緊呀！
 
我唯有問恆仔你係到諗緊咩，原來你諗住唔理我我就會忘記你，點會咁容易呀！我仲有好多野仲未同你一齊做，我地大部份時間都係地下情，完全唔可以比人知，點知難得全世界都知我地係一對，你就竟然選擇離開我，你知唔知日日望住個電話嘅日子係好辛苦架！我好驚你搵番我第一時間我唔知。最後忍唔住搵你，竟然講唔夠幾句你就鎖咗我，如果唔係恆仔，我都知你幾時走，希望我今日比得切封信你啦…
 
我知你一走就幾年，不過你令我知道鐘意一個人係咩感覺，我知道我仲係好鐘意你，你要信我，我呢幾年都唔搵男朋友，我會一直等到你番黎，我就唔知你啦…不過應承我，如果呢幾年我地對方都冇女朋友，你番黎之後一定要同我求婚好唔好？我對我地嘅感情有信心。不過記我去咗個到都要記得同我傾計，就算唔係日日得閒，都記得搵我，我地仲係朋友呀嘛，不過無論你點樣我都會支持你架！
 
I LOVE U！」