岩岩響死亡邊緣徘徊過後,全車既四人都仍然滿頭大流
我就好似打完飛機咁,攤響司機位上
望住燃燒緊既電單車殘骸,笑道:「嘿,想同阿叔鬥,你未夠班呀」
rina用手指篤我額頭:「得戚得你丫,呢一下好彩咋,你頭先射中左幾多槍呀?」
我打開車門,繼續檢查黑衣男子既生死:「我揸緊車嘛,點射姐,緊係要靠你啦...新月你響度保護住外長」

正當我和rina走近爆炸現場
我摸摸褲後袋:「弊!我個銀包呢...屌,大獲啦,喂rina..」
rina已經遞上一個黑色既廉價銀包:「大頭蝦!頭先你響會展衝出去開槍果陣跌左啦,好彩我幫你執返咋」
我馬上拎返銀包:「嘩嚇得我丫,唔該哂你呀rina」並馬上打開點算




rina亦好奇:「你個銀包好多錢既?...車!得果50蚊同張學生證之嘛!」
「大佬呀,boss出糧比我地都係比cash啦,尋晚我地食mandarin grill都比哂cash啦」
「你仲好講!尋晚你比cash果陣不知幾樣衰呀,邊有人去高級餐廳比cash架!」
「你理得我呀..」我同rina又好似平時咁忘我嘈交

「石仔,rina後面小心呀!!!」新月既一叫,將我地既對話打破
「做咩...」一轉頭,一個滿身火焰既人,從烈火中衝出黎,捉住我既左手


「仆街!!」滿身火焰既人,正是拎SMG追殺我地既黑衣男子,咁都燒唔死真係痴線




佢用盡氣力扯住我,似乎想將我拉入火焰之中
火焰已經燒著我既西裝,我不停甩開佢,可惜瀕死既佢實在太大力

rina見狀即拎出手槍,對佢開左幾發子彈,中槍既佢手亦開始鬆起黎
「屌你死唔斷氣!」我運一運氣,將佢甩開
響被我甩開之際,黑衣男子竟然...

錯手搶左我左手揸緊既銀包!
我一唔留神,銀包就比佢揸住,連人帶銀包一齊推入火海





我邊拍熄左手既火焰,邊道:「屌那星,我個銀包呀...」
rina大笑道:「抵死啦,掛住講野,你隻左手變埋燒雞翼tim啦」
「屌你明明係你聊我架喎!...」

忽然,一架七人車駛到我地面前
司機打開車門出黎,並展示自己既特工執照:「三位,今次保護外長既任務辛苦你地啦,上頭已經批准左,你地三個既任務可以提早結束,護送外長到機場就交比我地得啦」
新月扶住受驚既外長,道:「唔使,為免再有咩意外,我送埋外長上機啦...石仔,rina,你地兩個出得最多力,你地返去休息先啦」
我:「屌..但係我地架車仲響機場果邊喎...」
就係咁,雖然我同rina任務提早完結,但係都係要on99咁去機場拎返我地架type r
外長情緒慢慢平復:「th...thank you...you save me..」
我用我既港式英文回應外長既道謝:「no need thank us la...」



剛同新月佢地一眾特工及外長告別後,我同rina又回復鬥氣冤家既身份




「頭先如果你醒目d一早睇到有追兵既話,我駛乜咁狼狽呀」我地一邊行去停車場,一邊互數對方今日既失誤
「仲好講,唔係你d槍法咁屎,我地快快脆就解決哂佢地啦,新月都笑你開槍唔準呀!」
「冇我解決果個電單車手,我地四條友死哂啦,多謝我啦...嘩屌好痛呀」唔係講笑,頭先隻左手比火燒左幾秒,都已經燙傷左
「死都掛住個銀包,抵變燒雞翼呀!」

當行到我地架車前時,rina一手搶左鎖匙
「你..做咩呀?唔係不嬲我揸車咩...」
rina收起剛才既恥笑,微笑道:「你今日辛苦啦,今次等我做司機啦」
「嘿,難得rina你咁善解人意喎...」
「嗱,只此一次架咋!」
呢一程車,係我第一次做rina既乘客
偶然坐乘客位,都唔錯既







「石仔,rina,外長已經安全上機,今次任務做得好!」大型熒幕上既boss不斷稱讚我地兩個
「你地兩位呢排辛苦哂啦,黎緊一個月可以休息下先啦,尤其是石仔,比心機搵dse啦...今次保護外長任務成功,上頭話你地兩個都會有bonus」我同rina隨即歡呼
「如果冇野既話...」
我:「boss..」「做咩呀石仔?」

「我同rina尋晚響酒店食左餐mandarin grill,埋單三千八呀,想claim返錢,嘻嘻..」
原本滿面笑容既boss立刻變臉:「仆街仔,駛唔駛咁識食呀.....」
「嘿嘿,記得盡快過數呀..」
「屌,係咁啦!」boss立刻中斷對話

「嘿,一講錢,boss就即刻西面....嘩,左手好撚痛..」我一邊行落樓梯一邊講boss壞話
rina響洗手間拎出一支燙火膏:「過黎啦石仔,我幫你搽下啦」
「嘩,要你幫我搽野,點好意思呀....好辣!」我把口咁講,不過依然走到梳化上等rina幫我捽燙火膏
rina:「你隻手紅到咁,過幾日補課咪正好比瞳瞳關心下囉」
「丫,你咁算係安慰我呀,我冇左個銀包喎」




「你個銀包得果五十蚊同張冇用既學生證,掉左佢都冇問題啦!」
保護外長既任務過後,一切又好似回復正常
有賴IID既support team,電視亦都冇報導今次既行動
當然,車戰果陣點都會有目擊者,不過只要上唔到主流媒體,問題唔太大

兩日後,三月二十四號,最後一日補課
「早晨呀石仔,咦你隻手做咩事呀?」
「瞳瞳早晨,冇事...前幾日煮飯燙傷姐」
瞳瞳捉住我隻手:「依家好d未呀?有冇搽藥膏呀...」瞳瞳既關心都已經令我既傷頓時消失
班狗公睇到呆撚哂,不過佢地有所不知
經過study leave既呢段時間,我同瞳瞳已經由毫不相熟變成每日都會傾計既朋友,很想要吧?

返到位後,八卦既yuri隨即追問:「喂,你同瞳瞳發展成點姐?」
「佢每晚都會打黎問我有冇野唔識咁囉...有時仲會傾下計咁..」
「嘩!熟到咁,就得米啦你」




「係都過左dse先啦,瞳瞳依家都要專注dse...」


「牛肉更孤10小辣,佳肉畜牲清灘,鞭度?」補完課之後,我又同瞳瞳去左譚仔食晏
瞳瞳繼續主動聊我:「石仔,考完dse有冇野想做呀?」
我吞下一啖米線「唔..都係打機丫睇波咁囉,呢排要專心溫書都冇乜時間做呢d啦,咁你呢?」
「我呀..我就想去海水公園玩,小學去左一次之後就冇再去過啦」
聽到呢度,我唔知痴左邊度線:「如果你唔介意既話..考完dse.我...我..陪你...你去丫..」
「...嗯,好呀石仔!我就係驚自己一個去好醜怪咋,咁我約實你架啦」

嗚呀!!!!!!!!!!!!!!!!!!!!!瞳瞳應承左呀!!!!!!!!!!!!!!!!!!!!
呢個承諾令我每日溫書都更加落力

時光飛逝,轉眼間就黎到一星期後

三月三十號,dse開考既第一日
「石仔你到左試場未呀?」whatsapp內傳黎瞳瞳既信息
「岩岩到左啦...好緊張呀」
「盡力就得架啦!加油!!」
「嗯,你都加油啦瞳瞳」
即使今日係考我咁耐以黎最廢既中文,不過有瞳瞳呢半個月既指導,我又覺得中文其實冇想像中咁難
好,為左瞳瞳,我要努力!

正當我準備熄機入試場之際
「登登登登登!!!」仲有人whatsapp過黎?
「比心機啦石仔,快d考完快d溝掂瞳瞳呀!」竟然係rina send黎既?平時呢個鐘數佢仲訓緊架喎..
點都好,估唔到佢仲咁有我心,不愧為我既好拍檔

好,我要上啦!
已有 0 人追稿