吓!!!!!!!!!!
「咁..咁你...?」我被rina既呢一番話打亂哂
「咁..日本d野又好食,靚仔又多,冇..冇理由say no姐!仲好呀..以後唔駛對住石仔你個頂心杉!」
「你把口咁講姐,不過我硬係覺得你係冇得拒絕先咁講...」
rina用腳踢住我肚腩:「痴線啦,你咪諗得自己咁高呀,只不過係我都想轉下環境咋,遲d boss就會安排一個新拍檔比你」的確,rina間唔中都會話想去下世界唔同既地方

「哦...咁祝你響果邊溝到個山下智久啦」既然rina都咁講,我亦唔再反駁
「哼,算你啦!咁你要應承我,響我走之前要溝到瞳瞳啦」
「嗯,咁你幾時走呀?」
rina:「6月22號朝早10點呀,記得車我去機場呀」




「呢個就當然架啦...咪住先,我21號就係grad din喎」
rina用遙控禁停電視上畫面:「咁仲好啦,岩岩好比我睇到你溝到瞳瞳,我沖涼先啦」
雖然平時rina幾串,又成日當我賓妹咁洗,不過呢一刻我竟然有d唔捨得佢

之後既呢一個月,因為瞳瞳要返parttime既關係,我同佢除左畢業禮果日之外都冇見面
而我,就每日都過住廢青既生活,每一日都係同rina互串,間唔中先同佢揸車出去巡邏下,睇下又有冇良家婦女比我救
其實,rina話哂都係曾經出生入死既好拍檔,所以我都好珍惜每一日同佢鬥嘴既日子
新月亦都有搵過我,叫我返去探師父,不過我都推三推四,廢事師父一見到我又屌柒我






「你著起西裝都算幾好睇丫...不過...」rina對住鏡前既我不斷指點
「不過...咩呀?」
rina望住我既面:「冇錯!你皮膚太差啦!」
「屌..男人老狗冇所謂啦...」
rina拎出一塊mask:「邊得架,等我比塊mask你敷下佢啦」
我有點懷疑:「有冇用架,一塊野就搞得點?」
rina自信道:「我就係每晚都有用呢d護膚先keep到咁靚囉!」說罷就將mask鋪上我臉上
「係係係...最靚係你啦...」
rina一掌打落我塊面度:「唔好郁啦!要鋪實d先得架!」






響21號當日既5點鐘,我已經換好西裝,準備出發到香格里拉酒店

「嗱,我同你準備左咁多日,為既就係一陣間同瞳瞳表白,記住我教你果幾招溝女方式呀」rina一邊為我gel頭,一邊作出發前最後既鼓勵
「嗯..我知啦....」
「好,搞掂,你睇下o唔ok?」
我睇住鏡中既自己:「緊係掂啦,咁我行啦!」
rina拍拍我肩:「一定要成功呀石仔,奸巴嗲!」

響搭西鐵既期間,我掌心一直流汗,個腦就不停咁幻想緊一陣表白既情況
「對唔住呀石仔...」「你係一個好人...」「我唔鐘意你囉...」一個個瞳瞳拒絕我既畫面響我腦裏面出現
越諗就越冇信心,唉...

冇幾耐就到左尖東站
我單身隻影咁行入香格里拉酒店既宴會廳




「喂!石仔!好耐冇見啦,咁遲架你!」一到埗,yuri就馬上響我打招呼
「乜yuri你咁早就到既?」今晚既yuri都穿得非常高貴
「你唔記得咩..我係班會主席嘛,都要做搞手架..」說罷,yuri就拉我到一二角:「係喎,聽瞳瞳講,你地上次去海水公園玩得好開心下喎..」
我有點吃驚:「吓...佢同你講?」
yuri點頭:「係呀,佢有時都會whatsapp同我講下你d野咁,佢讚你又好人又溫柔呀,掂啦石仔,咁你諗住幾時表白姐?」
聽到呢度我個心都戚戚然:「其實...我諗住...一陣就向瞳瞳..表白」
yuri一臉驚奇:「嘩,grad din表白好浪漫呀...好彩我都一早plan好左幫你..」
「吓你點幫...」

「嘩!!」「瞳瞳好靚呀...」忽然,眾人都望住入口,男既就流緊口水,女既就一臉妒忌
化了淡妝,身穿白色裙既瞳瞳,從大門口走入宴會廳
對比起瞳瞳既清秀,在場既女生亦瞬間變得俗氣

「石仔,yuri...」瞳瞳冇理會各人既目光,走到我倆前示好
「瞳瞳,咁你咁遲架,石仔等左你好耐啦」




瞳瞳有點臉紅:「係咩,我..頭先化妝化耐左...」
yuri馬上為我地製造機會,拉出兩張凳:「嗱,我地三個今晚就坐呢度啦,咁你地坐住先,我仲要傾rundown呀」

瞳瞳坐下,問:「石仔,我今晚...好唔好睇呀?」
「好睇呀,幾襯你丫...」
一臉害羞既瞳瞳好似有野想講,不過又欲言又止,只係嘴角含笑
而我,就仲係未ready好表白

時間一分一秒過去
響享用完自助餐之後,已經黎到今晚grad din既尾聲
台上既yuri拎起mic:「不知不覺今晚既grad din已經接近完結啦,黎緊就係今晚既壓軸環節...就係畢業舞會啦!!依家各位就好搵partner啦,唔係各位男神女神就比人搶走哂啦」
我:「吓...點解我冇聽yuri提過既..」
瞳瞳亦有點吃驚:「我都唔知既...」

在場既男男女女馬上到處尋找跳舞既partner




台上既yuri望住我,做出「快d搵瞳瞳」既口形
屌,原來所有野都係yuri搞出黎既..

我轉頭一望,眼見已經有幾件狗公走向我倆
屌,點可以比班狗公截我糊?!
我鼓起勇氣,馬上拉住瞳瞳:「瞳瞳,可..唔可以做我partner?」
講完之後既短短一秒,瞳瞳既表情由驚訝轉為微笑:「嗯!」
留低既,就只有一堆失望既狗公

音樂響起,我拉住瞳瞳走到已經企滿人既舞池
瞳瞳低頭道:「不過...我唔識跳喎..」
「唔緊要,我lead住你」我輕輕咁攬住瞳瞳既右背,跟隨住音樂擺動
好彩boss當年教過下我跳舞,依家終於大派用場
我同瞳瞳互望對方,我就知...係時候啦





「瞳瞳...」
「嗯?做咩呀石仔?」
「你覺得我份人點?」
「石仔你呀..我覺得你好好人呀,冇乜機心,對人又好」

我深深咁吸一口氣:「我...」
「嗯?」
「我鐘意你,你可唔可以...做我女朋友?」我終於向瞳瞳講左呢一句,我練左無數次既話
呢一刻,成個世界好似只係剩低我同瞳瞳..

瞳瞳臉紅紅,低住頭:「石仔...」我個心頭一震,唔係派好人卡下話...

「其實..我都...鐘意石仔你....」


媽!!!!!!!!!!我得左啦!!!!!!!!!!!!!!我追到瞳瞳啦!!!!!!!!!!!!!!!!!!!!!!!!!!!!
呢一刻既心情,比起愛隊利物浦拎英超冠軍,鳳凰城太陽拎nba總冠軍仲要開心一百倍!

我繼續同瞳瞳跳住舞,好好咁享受呢一刻



grad din完結後,我同瞳瞳一齊搭西鐵
到站後,我拖住瞳瞳,一齊行返佢屋企
瞳瞳:「其實...我本來都諗住....今晚就向你表白架...」
「係..係呀,不過..」我緊緊捉住瞳瞳柔軟既左手「依家冇所謂啦」
瞳瞳微笑:「嘻,咁又係..」
瞳瞳拎出手機,同我影左一張自拍照
「呢張就係我地,第一張既情侶照啦..希望以後仲會有更加多啦..」
「嗯,一定會!」

我送到瞳瞳到佢屋企樓下
「到啦瞳瞳,快d返去啦,廢事要你媽咪擔心」
「石仔,等陣先丫」
瞳瞳用盡全力拮高,吻向我既嘴唇

吻後,瞳瞳隨即滿面通紅:「石仔,我返去啦,我聽日再搵你啦,bye!」


我摸住自己既嘴唇,神情就同當年既吳卓羲一樣,不過,我慶幸自己係好運既一個
瞳瞳主動嘴我呀!!!!!!!!!!!!
我企左響原地,大約自high左幾分鐘

「給我一個吻~~~~~可以不可以~~~~~」我哼住歌,打開流浮山既家門
正在打ps4既rina見狀,笑道:「咁既樣,即係得米啦」
我拎出手機上,我同瞳瞳既自拍比rina睇:「頭先佢返上樓之前,仲主動錫左我...」
rina拍拍我膊頭:「一早話你得架啦石仔,咁我走都走得安心d」

一講到呢度,我原來愉快既心情馬上一沉
rina見狀道:「做咩喎,又唔係以後都唔會見,我去到日本都仲可以同你whatsapp,skype吹水咁嘛」
我點頭,道:「都係既,不過同你合作左咁耐,點都有d唔捨得」
「嘻,不過...我去到應該都會唔慣冇得同你鬥嘴既日子既..你今日玩左成晚都攰架啦,快d沖涼訓教啦,你聽朝仲要送我去機場架」「嗯...」
雖然今晚的確好攰,但係我成晚都訓唔著....
一諗起以後冇左個同我咁合拍既拍檔,冤家,總覺得有點難過
已有 0 人追稿