2.2 Cypress Girl

我同新月亦都遞上執照:「我叫石至磊,你叫我石仔得啦」
阿昇難掩興奮之情,衝過黎同我握手:「我緊係知啦,你就係上次成功保護印度外長既特工!!我上個禮拜知道我第一個operation就係做你拍檔,開心到我訓唔著呀!!」咁誇張?
「第一次?你新人黎架?」
「唔係..只係我之前一直響研究組做緊野,上個月成功調過黎做前線特工,所以今次係我第一次正式operation」

我指住前面果架,佢頭先鑽緊既貨van:「你頭先整緊咩呀?成個地下室比你玩到變哂ironman基地咁既」
阿昇帶我地走到一個長方式既物體:「哦,我依家整緊一個可以隨時拆出黎既貨van核心,核心上面有哂電腦同通信裝備方便行動,我整到佢可以拆出黎,隨時換唔同既貨van度,咁就唔怕次次operation都渣死一架車,比人點相啦」丫估唔到個小白臉都諗得幾周到
「你都幾犀利架喎,機械同電子野都識搞既」


「係呀,我上年響MIT既機械工程first hon grad,得閒仲讀下電子工程d野咁」
「你係尖子黎?」無理由19歲就大學畢業,我諗都係得呢個可能性
「係呀,我響美國果邊Middle school果陣已經比MIT收左」
我笑道:「嘩,咁你仲做特工?大把美國大公司請你啦」
「但係我最憎果d悶到仆街既工架啦,都係特工刺激d!」
唉,睇黎呢個小白臉真係未見過世面

阿昇留意到新月,馬上熱情咁打招呼:「係呢?呢位靚女就係我地既拍檔啦?」
新月冷冷回應一句:「我叫林新月,多多指教」
阿昇嬉皮笑臉道:「嘩,新月呢個名幾好聽喎」


睇黎呢個阿昇已經比新月吸引住,但新月應該對佢零興趣,完全冇理佢

阿昇帶住我地兩個參觀佢既「基地」
我問:「咁快就搞到呢度變哂自己基地咁,你幾點黎架?」
「因為我多野帶過黎,所以我前幾日已經開始將IID研究組果度D野車過黎架啦,d槍係支援組d人前幾日送過黎既」

我地三人走到地下室中間,擺放槍械既五個層架,呢度大約有4百支唔同既步槍,SMG,手槍,散彈槍,乜都有
阿昇拎起一支最基本既t91步槍:「嗱,呢個就係我第二個發明,指摸認證啦」
新月問:「支步槍點關指摸事?」
阿昇一見新月問野,馬上chok樣:「嘿,呢個就係我玩左咁多年metal gear啟發出黎既」


「我已經將呢度所有既槍械加裝左指摸認證」阿昇將步槍遞比新月:「新月你試下開槍丫」
新月對住身後既空位拉下板機:「擦!擦!擦!擦!擦!擦!」但步槍並冇反應
我問:「點解開唔到槍既?」
「呢度d槍既板機都會自動識別指摸,如果係響database入面既先會開到槍架,新月你過黎放隻手指公埋去呢部機,assign你既指摸落dadabase,咁就可以開到槍架啦」
新月依住阿昇既指示做,再對住空位開火「嘭嘭嘭嘭嘭嘭」

新月放低步槍:「咁..呢個發明都算有d用既,起碼人地拎到我地d槍都冇用」
得到新月既讚美,阿昇馬上沾沾自喜:「嘻嘻,呢個系統既準確度有99.99%,比起入境署d e道仲要準架」
我:「咁你既意思即係,一萬次,會有一次認證失敗,係咪?」
阿昇頓時口啞啞:「呃...果一次認證失敗,係我...食完薯片唔記得洗手...」
呢一刻,我同新月內心都只有兩個英文字母以及一個數字

阿昇響槍架隔黎既枱上拎起兩部iphone第一代:「而呢樣呢,就係我暫時最新既發明啦,我將iphone改成一部operation用既多用途通訊器andphone」
我拎起佢,一開就有幾個option
阿昇為我逐一解釋「GPS map就係用黎睇地圖同幫隊友mark位,communication就係比行動既幾個特工通訊,note就係用文字黎通信,以便執行潛入既operation,support就係直接連去IID總部既支援組call增援」


我放響手中把玩:「嗯,算係幾有用既」
我禁一下GPS map既地圖,「marker placed!」一把嬌嗲既女聲從andphone既耳機響起
「把女聲邊個黎架?」我問
「嘻嘻,我特登將andphone把聲較到我女神小嶋陽菜咁架,係咪好好聽呢...」
新月哼左一聲
阿昇自知激嬲新月:「唔...唔好意思...」

阿昇既肚咕咕響起:「哈哈,我冇食晏晝tim,好肚餓呀..」
「咁我地去食野先囉」新月亦點一點頭

由於我地三個人岩岩先到,廚房乜野食,杯麵都冇
我地三人就去到跑馬地奕蔭街某間小菜館食飯

食飯期間,阿昇似乎對我同新月既野好有興趣,例如之前做過既任務,識得d咩功夫咁
我都好樂意答佢,不過新月就懶得理佢,每個回答都係一句起兩句止


阿昇開始問起我地既私生活:「係呢,石仔,新月,你地有冇男女朋友架?」
新月斬釘截鐵,道:「冇」
阿昇個樣驚訝得黎又有d高興:「吓你咁靚女都冇?」阿昇你唔係諗住自己有機下話

新月再冇理佢,阿昇轉問我:「石仔咁你呢?」
「..有個女朋友咁囉,佢岩岩jupas入左中大」
阿昇:「咁.你變左come on james?」
我同新月都呆左:「吓,你..」
「上星期boss同我講左啦,話你依家讀hkcc,為左方便我同你溝通,佢幫我搞左入學,所以聽日我就同會你一齊返學啦」屌老母,boss駛唔駛咁賤,讀asso好型咩..
「屌,你呢d科技都要讀asso,你玩鳩我咩..」
阿昇:「冇所謂啦,當過下日神囉,嘻嘻」屌,條友係咪gay,要搞gay搵奶香蕉啦

食完飯,去附近新市買埋日用品,當然唔少得去買Calpis啦

返到屋企之後,新月響梳化度睇小說,而我就比阿昇拉左去打nba 2k15


「喂石仔,你用邊隊呀?」
「nyk啦,我愛隊」我知,依家隊nyk好撚廢
「唔係掛,你鐘意埋呢隊西波,咁我都用返我愛隊熱火啦」
「屌,glory hunter,開波啦!」

「hey boy,tell me why,一加一係二都搞壞..」我既電話響起,係瞳瞳
阿昇聽到鈴聲,道:「屌你唔係掛,黃宗澤d歌做鈴聲?...咦條女咁索既,你條女呀?」
「屌!」我冇理佢,走出大宅外聽電話

「喂,石仔,有冇掛住我呀?」每次聽到瞳瞳把聲,我都會充滿精神
我笑道:「緊係有啦,好掛果隻tim呀,你ocamp玩得開唔開心呀?」
「嗯!yuri同我都玩得好開心呀,組爸組媽對我都好好,我後日出camp啦,到時再搵你丫」
「咁好啦,拜拜瞳瞳」
「拜拜石仔!」



收線之後,我先察覺阿昇響我後面偷聽:「喂屌你老母你有冇品架,偷聽我講電話..」
「你唔係掛石仔,你送條女去ocamp,死得啦..」
「車...我信佢夠定力嘛,我又唔想咁專制」
阿昇:「屌你,有時唔係佢夠唔夠定力,而係以後會同果d組爸成日對住,日久生情,仲會理你呢個asso仔咩!」
雖然阿昇講得好唔客氣,但係佢講既野又的確岩
阿昇見我成個人沉哂,馬上安慰我:「有..有時都未必既,可能你條女真係好鐘意你,對你不離不棄呢,打機啦」
唉,唯有希望瞳瞳唔係d咁既人啦

打完機,我地三個亦編好各自既房間,準備訓
呢度有四間睡房,全部二樓
每間房設備都好齊,仲有間獨立浴室
d有錢人生活真係幾爽
不過今日太攰啦,沖完涼嗱嗱起訓好過,聽日仲要返九點


「鈴鈴鈴鈴鈴鈴鈴鈴鈴鈴鈴鈴鈴鈴鈴鈴鈴鈴」
我醒黎既時候,個天已經光哂
我懶洋洋咁望下鬧鐘


「屌!!!!!!!9點3!!!!!!!!」
我馬上梳洗刷牙
正當我換好衫,準備落樓下既時候,我隔黎屋既門打開
著住睡衣既阿昇捽捽眼:「做咩呀石仔,晨早流流嘈生哂...」
「返學啦!依家10點4呀屌你..」
「吓唔係掛!!!我即刻換衫!!!」我既一句馬上令阿昇醒哂,即刻入返房刷牙

三分鐘後換好衫既阿昇已經拎好背囊出黎,我:「屌你快d啦!」
「駛乜驚呀,我響MIT果陣日日遲到啦!」
一落到樓下,只見新月已經坐響飯枱度食緊早餐
「早晨」明顯,新月呢句係同我講
不過阿昇依然自動多情咁答:「早晨呀新月」新月亦冇理佢
我問:「新月你唔駛返學咩?」
新月飲左一啖鮮奶:「我今日下晝先返」
阿昇向新月揮手:「我地返學啦,bye」

一上車,阿昇就問:「喂,石仔,新月讀緊咩架?」
「好似poly design囉,佢中學果陣art好勁架」
「嘩咁咪同我地好近?不過佢好似成日都對我好冷淡咁既..」
我安慰住佢:「佢係咁架..以前同我一齊果陣都係冇乜野講」唔通直接話新月唔like你個小白臉咩
「一齊?!!」阿昇即刻捉實我,眼神好似想殺左我咁
我鬆開佢隻手,準備開車:「我以前同佢跟同一個師父學功夫嘛,咁咪日日見咁濟囉」
阿昇鬆一口氣:「哦..咁都好d」

汽車駛向黃泥涌峽道,我問:「睇你個款,唔係鐘意新月下話...」
阿昇笑道:「呃..呃..都有少少既」
「唔係掛,識左一日就咁快鐘意,霎眼嬌黎咋...何況新月呢d女咁dark你都like,你真係重口味」
阿昇既笑容好似警訊個毒撚咁:「你..你唔覺新月bb好吸引既咩...cool得黎又有d好特別既feeling咁.......係呀冇錯!新月bb就係有仙氣呀!」屌佢老味,咁快就叫人bb
唉,真係冇佢咁好氣,d天才尖子係咪多數都食得咁偏?

響紅磡果頭放低架車響停車場,我同阿昇已經馬上跑去hkcc,再搭lift上2樓
「屌你老味行快幾步啦MIT神童!」「知啦屌你!」

「嘭!」我同阿昇大大力打開lecture theatre既大門
由於太大聲,成間房既人都望住我地,包括講緊書果個光頭佬
阿昇細細聲講:「喂,後面冇位喎」「屌,咁坐前面囉醒目」
間房除左最前排之後都坐滿哂,我同阿昇拎完notes,就唯有坐最前

呢堂講既應該係Hong Kong Society,不過呢個光頭佬講書實在太悶
坐響我右邊既阿昇已經訓到扯鼻鼾,而我亦響度苦苦支撐

「嘭!」一下開門聲,成功叫醒左我同阿昇
然後再聽到後面既人七嘴八舌「嘩,條女幾靚喎」「對腳好正呀」當中大半都係雄性既聲音
「唔好意思呀,呢個位有冇人坐架?」一把甜美既聲音問我
我轉頭一望
呢個女仔留啡長直髮,瓜子面,目測大約高一米七,身穿水藍色連身短裙,露出一對幼且白既美腿
大概就係典型既「長腿女神」

我拎起我個袋「冇呀,你坐丫」
「唔該!」呢個女仔就咁睇,都幾好有禮貌丫,應該唔會係港女黎
阿昇細細聲響我耳邊講:「條女都ok喎」
「我有女朋友架啦,你都有你個新月bb啦」
「嘻嘻...咁又係」
自從呢個長腿女神入左黎之後,成間班房都開始嘈,d雄性動物大概係計劃緊點樣親近佢
長腿女神冇理,反而好專心聽緊書
單憑外表身材,呢個長腿女神的確係好撚正
不過,我已經有瞳瞳啦,呢d引誘我頂得住

「ok.襯依家放break,提提大家,呢一科響week 8將會有個group presentation,係關於香港近代史既,三個人一組,今日分好組既話都可以比分組名單我架啦」光頭佬見自己既英文唔吸引既時候,都已經轉返講中文,
一聽到呢句,後面既男男女女都馬上四處狩獵,希望搵到個又睇得又做得既groupmates
而我亦睇到,已經有幾個gel住mk頭著住hollister,自以為好charm既狗公走過黎,睇黎係想r長腿女神入佢地果組

「喂石仔,分組啦喂,點解我地冇人搵既」阿昇道
我講笑:「你樣衰囉,嚇親人」
「屌你,行上去睇下邊d人冇組啦」
「好囉..」
正當我同阿昇起身之際,長腿女神拍拍我左臂
「你地係咪差一個人丫..不如加埋我丫」

呢一句嚇親我,有咁多個hollister靚仔唔揀,揀我同阿昇兩個契弟?
阿昇馬上應承:「好呀好呀,我叫藍正昇,你叫我阿昇得架啦」
「我叫石至磊,石仔」

「我叫張愛莉,你地叫我airi啦,呢兩年多多指教啦!」
已有 0 人追稿