「..我都有聽過呢個晚會,好似話每個學生都可以帶一個partner入去」千柔驚道
「千柔..你都係?」
千柔指住我:「嗯..石仔你咁講,唔通你女朋友..」
「係..我都係和聲..」

「咁仲好啦!到時石仔假扮千柔既男朋友仔入去會場,襯佢響屎坑捉佢返黎就得啦,新月同阿昇負責backup」boss輕輕道
「嗯,呢個的確係現今最可行既方法..」新月道
阿昇不滿:「屌..又係我backup?!」
「你識閪打交咩?做netvigator算啦你」boss唔留情咁笑阿昇
Warrick先生再度開聲:「咁好啦,呢件事...就交托比你地啦,有咩事就聯絡我啦,辛苦你地」佢以呢一句結束今次既談話




「咁好啦,你地呢幾日好好準備一下,兩日之後我會再搵你地,千柔你就跟佢地返去啦,今日係咁多啦」boss亦同我地道別

同boss分別之後,我地三個帶千柔返去我地響淺水灣既大宅
「呼...今次任務聽落都幾難喎..」我望住天花板,道
阿昇鼓勵我地:「我地連傭兵組織絕對零度都打得贏,驚咩呢?」
「阿昇講得岩,我地都過左咁多難關,今次都一定搞得掂」新月微笑道
「嘻嘻,新月bb終於讚我啦」
新月冷冷道:「邊有讚你..只係你難得講岩野姐..」

千柔終於開口:「原來...你地咁犀利架..我之前仲係見習特工既時候只係做過d捉賊既任務咋」




「都唔係好犀利姐,咁千柔你識d咩呀」
千柔摸摸頭:「我識...功夫同點用槍咋..係咪好渣呀?」
「唔係..我都係差唔多,你d功夫分分鐘好過我tim」

一落到樓下既停車場
「千柔!」
一個男人衝向千柔
gel住比比鳥頭既佢著住一身名牌,但又留住一副年青既樣貌
直覺話我知,佢係一個二世祖






我同阿昇馬上隔黎兩人
「你想做咩呀?!」
果個人想推開我地:「我同我女朋友既事唔關你事呀!」

女朋友...

「你做咩呀James?!」千柔道
呢個叫James既二世祖捉住千柔:「我特登黎同你道歉架!我知.我上個禮拜唔應該同阿榮少佢地去船p,不過...我都冇做d對唔住你既事!」
「我咪講過囉!我最憎人去呢d地方架啦!」千柔用力甩開James
「唔好咁啦千柔..我地都拍左拖成年啦,你咁都唔信我...」James繼續窮追不捨
「但係你明知我唔鐘意你群埋班豬朋狗友,你都仲成日去disco同船p!」
「屌...咁我daddy個個月都比咁多錢我,放假係去呢d地方架啦...」
千柔對James不顧一屑:「咁就即係證明我同你係兩個世界既人,係時候要分開啦」
「千柔呀,我唔係咁既意思」





我阻住James:「喂,你..」
「你邊撚個呀?哦...原來就係你條撚樣離間我同千柔!屌你老..」
千柔一手將James推落地下:「你講咩野呀麥家輝!石仔係我好朋友黎架!唔准你侮辱佢呀!!」
原來千柔發起嬲上黎都幾惡
不過,睇住佢地兩個,我不其然諗起我同瞳瞳
我地四人開車離開,成個停車場就只係剩低跌落地上既James

「對唔住呀石仔..估唔到咁樣比麻煩你..」後座既千柔向我道歉
我揸住車:「唔緊要,小事黎..佢係你男朋友黎?」
千柔板起臉:「從前係,依家唔係啦」
「...你地係點識架?」
「佢爸爸係我爸爸d生意partner黎,所以我同佢由細識到大...果陣年少無知接受左佢,之後先知佢咁花fit,唉」千柔訴說自己既往事
坐佢隔黎既新月道:「唔緊要,依家飛呢d賤男都唔遲丫」
「總之你以後記得戴眼識人就得啦..」




「嗯..我會架啦」


到達大宅之後,我就帶千柔上佢果間房
「嗱,呢一間就係你間房啦,呢段時間你就響度訓啦」我為千柔放低行李
千柔好似細路女咁四圍望:「唔該石仔,嘩..間房都好大喎....原來做特工咁好架」
「你唔係有錢女黎架咩,以前都應該係住大屋架喎」
「嘻嘻,我果陣間屋都係同呢度差唔多咋」千柔坐上床上:「呢間房,前排係咪有女仔住過既呢?」
我:「係呀,佢係我地之前既拍擋..佢上星期搬左走啦,不過你點知架?」
「嘿,我聞到陣香水味嘛..係呢你個拍擋係咩樣架?」
我將rina同airi相拎比千柔睇:「mk d果個就叫rina,同我夾左一年倒啦,」
「好靚女呀,成個女明星咁!咁依家佢去左邊呀?」千柔係咁追問
「佢去左日本既IID啦,仲好似識到個靚仔男朋友..高d果個就叫airi,佢就係我地之前調查絕對零度既時候既拍擋,不過可惜呀...解決左絕對零度之後已經同左佢男朋友Jonathan去左英國生活...」我一邊講住兩位拍擋,一邊憶起同佢地既往事

「原來係咁..咁新月同阿昇呢?」




「佢地兩個都係8月開始同我一齊,新月就係我細個已經識架啦」我繼續答千柔:「咁你呢千柔?你係為左咩而做特工?」
千柔頓時臉紅紅:「講..講出黎你會唔會笑我架?」
「唔會...點會呀」
「我..我想搵返救左我果個幪面超人....果次比佢救返之後,我特登去學功夫,加入IID,就係為左想見返佢」
估唔到,原來我影響左千柔既人生
「咁比你搵返佢既話,你有咩會同佢講丫?」
「緊係要再一次多謝佢啦,唔係佢既話我一早比人..」千柔道
呢個世界,真係冥冥中有主宰


為左歡迎千柔,阿昇今日特登叫左pizza hit既大餐
「歡迎千柔加入我地既大家庭!飲杯!」
「飲杯!!」
「多謝哂你地呀,我都好耐冇同人一齊食飯啦」千柔快樂地飲住可樂
新月問:「吓點解既?」




「我冇住hall,平時一個人住咋...我又少朋友,一日三餐都係自己解決..」千柔低住頭
我:「咁黎緊既日子,你就要習慣同我地三個一齊食啦」
「嗯!」
雖然千柔既外表係一個陽光少女,但佢又出奇地充滿負能量


食完飯之後,阿昇落左去準備兩日後既任務
客廳又剩低我,新月以及千柔
新月放低手上既小說:「石仔,你唔諗住搵返瞳瞳呀?」
「吓...事實..都擺在眼前啦」
千柔亦加埋口:「我都覺得石仔你應該打比佢問清楚,始終都未證實..」
我拎住手機,猶疑不決
到底...應唔應該打電話比瞳瞳?

石至磊,唔通你由得你同瞳瞳呢段關係就咁玩完?
唔得!
我迅速咁撥打電話簿內瞳瞳既電話

「喂..」瞳瞳既聲音,既熟悉又陌生
「瞳瞳,係我」
「石仔...係你呀..」瞳瞳既語氣好似一早知道我打比佢咁

「瞳瞳,我有d野想同你講,聽日可唔可以出黎傾下?」
「嗯....好丫,2點,沙田翠華等」
講完呢句,瞳瞳就cut左我線

呢短短既兩三句,已經聽得出瞳瞳仲嬲緊我
仲多左幾分陌生既感覺

「咁快收線...可能佢仲嬲緊你姐,聽日拿拿聲道個歉啦」新月道
千柔亦點頭同意:「岩呀,女仔有時雖然把口唔講,但係內心好介意架..」
唉...

第二日既下晝2點,我已經到左沙田翠華
我坐左響四人卡位,點左一個午餐,等住瞳瞳

大約十分鐘後,身住黑色連身裙既瞳瞳打開門口
呢條裙,係我第一次同佢去街果陣買既

「瞳瞳..你食唔食野,我幫你叫丫」
瞳瞳冷冷道:「唔駛啦,我食左野....石仔,你有咩想講呀..」
「對唔住呀瞳瞳,我知果次我講左D好過份既野..我知錯架啦,你比次機會我丫」
但似乎瞳瞳都唔係好受落:「我已經聽左你講好多次對唔住啦」

我開始激動:「咁你想我點呀?你係咪比果個揸BMW既MK仔迷左心竅呀?」
「點解你..知?」瞳瞳大驚
「你緊係唔想我知啦,我生日果陣響你門口等你,睇住你一個唔該就上左條撚樣架車度呀!」去到呢度,我已經失去左理智
講極sorry都唔撚原諒我,你short撚左呀溫愛瞳?!

瞳瞳皺眉:「Andrew係我同學黎咋,何況我...都唔知你黎接我」
「嘩,生日都要同你去食飯,都真係個好好既同學喎..」我冷笑住
「呢段時間有Andrew我先冇咁傷心咋,你呢?有冇關心我呀?」屌!我日日都黎接你,你話我唔關心你?!
「果條友唔係好人黎架..」只有我知道,佢係同Sombras有關係
「人地比你細心好多架石至磊,人地個個拍拖都時時刻刻whatsapp,我地呢?」
我幾時有冷落你呀?係我搵你唔應咋屌!

瞳瞳企起身:「我..我唔同你講啦,我仲要返去上堂」
我無言以對,睇住瞳瞳行出餐廳
因為,瞳瞳係我鐘意既女仔,我始終狠唔下心腸鬧佢,屌佢係臭西
唉,石至磊呀石至磊,點解你咁失敗呀...
已有 0 人追稿