(爸爸no.1)我老豆係口靚妹: 爸爸no.25
爸爸no.25
嘿嘿!整晒啦,爭阿政啫!
「咔!我返嚟啦,咦?依個.........」政
「沙包!」
「愛嚟做乜?」
「愛嚟打囉!你話練拳嘛,依個就係我送比你嘅禮物啦!」笑
「擺舊咁嘅嘢響屋企?」
「點呀?以前就話五個人住啫,依家得你一個,擺副棺材都冇問題啦,唔係有意見吓?」火火哋
「唔係.......咦?你頭先就係一個人去抬個沙包返嚟?」
「傻架?成百磅緊係包送貨啦,之前我早d返嚟就係收貨!」
「咁點解唔包安裝?」政
「包架,不過我叫佢哋走之嘛!」
「吓!咁邊個搞呀?」
「你囉!」我
「嗱!嗰度有電鑽,拉爆螺絲,同我死掂佢!」
「吓!咁......點呀?」
「窿都同你mark埋啦,隊佢啦,等等!口罩、你氣管唔好.......唔好向上望呀........
隻眼..........咁咁.......咁咁.......」
雖然烏烏龍龍,不過終於搞掂,以前屋企所有嘢都係我一個做,阿政乜都唔洗理,
所以就乜都唔識,但以後我一定要操返吓佢!
唔知點解我有一種感覺,我留響阿政身邊嘅日子唔會太長,可能我只係一隻鬼
上咗個女仔身,遲早都要比閻罹王捉返落去..........
「得啦!」政
「好啦!我哋一齊掛佢上去!」
「好啦!我教你一d基本嘅動作!」
「砰、砰、砰!」
衰仔!有紋有路,其實佢體能幾好,練多幾個月可能好打過我!
「嗱!沙包練力,依個練反應,其實打架來來去去都係體能、反應、速度嘅啫,
練多d就得啦,不過到最後都要同真人練習嘅!」
「打返場呢!」我
「好呀!」政
「嚟啦!」我
「你嗰個係粉紅色拳套!」政
「咁點呀?靚吖嘛!」
「又話自己係男人!」偷笑
「咁......咁大家拳套一樣會亂嘛,唔同色咪幾好...........喂!打唔打架?」
「Round 1」
衰仔!學嘢真係幾快,打咗陣已經上晒手,遲d真係比佢打返轉頭!
真係大個仔啦,已經唔係以前嘅細路仔,希望可以睇住佢長大成人啦!唔係,係
一定可以,以我張俊雄嘅霸氣,冇人可以帶走我,我會以蔣泳嘉大小姐嘅身份,
睇住佢成家立室,生兒育女、抱孫.........
等等!生兒育女?即係要同其他女人乜乜..........乜乜...........中出?
唔可以呀!唔可以唔可以唔得唔得唔得...............
「砰!」兜拳窩面
「呀~~~~~砰!」倒地聲
「哇!你點呀?做乜你定晒型避都唔避呀,冇事嘛?」政
「嗚..........我個鼻........我個鼻........有冇爆鼻?有冇流鼻血?有冇毀容?鏡、鏡.......嗚!」發晒茅
「冇事呀,你睇一d事都冇呀,而且我收得快,只係掂到塊面小小,個拳套又咁軟......」
「咁比我打返吖,個拳套咁軟!」雙眼發光
「你想點呀?喂,等等唔好行埋嚟!」退到牆角
「吼!」
「砰砰砰砰砰!」
衰仔竟然守得咁穩,之前教佢d嘢全部洗返晒出嚟,真係教識徒弟冇師父!
加上我依家手短腳短,我竟然打唔到佢個頭!
「哇.........打頭、打頭、我要打頭...........哇.........」發爛渣
我宜家就好似個細路咁雙手用力揼佢,但都打唔到個死仔......嗚
*********************************************************************
「企定定唔準郁,唔好作出無謂嘅反抗!嘿嘿...........」獵食者發出恐怖嘅笑聲
「哦!」獵物
「放鬆d啦!」目露兇光
「真係要打面呀?」
「係!」堅定
「細.....細力d呀,真係會爆鼻架!」發抖
「驚啦咩?頭先打我打得咁開心,老豆都打?依家知道得罪我嘅後果有幾嚴重未?」
「擘大眼、唔準避!」
「蝦、蝦、蝦、蝦、蝦!」
我打咗佢五拳,當然係好細力啦,你估我真係想佢死咩?我個仔嚟架!不過唔打返佢幾拳我條氣點都唔順架啦,真係今晚都瞓唔着!
「...........................」揸住塊鏡十分鐘
「夠啦!都話冇嘢囉,唔好再照啦!」政
「阿政,依度係咪紅咗d?」
「冇呀!你唔好形住啦,冇嘢呀,你塊面真係好皮光肉滑呀!」
「皮光肉滑?我下巴好似生咗粒暗瘡!」指住
「好細粒之嘛,響下巴都睇唔到!」
「睇唔到?你知唔知女仔塊面好緊要架?比自己條命仲緊要!」
「依排都要食得清淡d.........」我
「你話........你係女仔?」政
「我點解唔係女仔呀?我個look、我個body百分百係女人!」
「你唔係話你係大男人咩?」
「即使我幾唔願意都好,我都要承認我已經係一個女仔,已經冇得反轉頭啦!」
「阿政,以後對我要溫柔d,唔好粗粗魯魯,如果你再整花我塊面,我真係死多次
比你睇!唔係,我死都要攬埋你一齊死!」
「得.....得,唔好勞氣!」
「好啦!今日出街食飯,順便飲杯廿四味,清吓粒暗瘡!」
「喂!唔好呀,過幾日你M到痛死你呀!」政
「我幾時M到你都知?」
「我有計住架嘛!」
「你......計嚟做乜?」懷疑目光
不過點都好,我要認認真真做一個女仔,由今日開始,我就係少女蔣泳嘉!