(爸爸no.1)我老豆係口靚妹: 阿政no.27
阿政no.27 出發!塘福宿營(2)
「嘩!真係好大呀,政仔你睇有架船行埋嚟呀,而且個海塝好長!」噹噹
「係呀!由依度可以行到去南橋,由依邊可以一直行到去船塢,個海塝真係可以行到半個青衣!」我
「真係好熟喎,不過你唔係住葵芳咩?係啦,葵芳響邊?」噹噹
「嗰邊!不過我有幾個同學住青衣,所以放學或星期六日都會嚟依度玩!」我
「其中一個好鍾意釣魚,我哋一班人好多時會買d M記包、魚蛋跟住陪佢坐海塝,
全日睇住佢釣魚!」
「吓!咁就一日?」噹噹
「嗯!不過一班人無無聊聊吹吓水、打吓機、數吓船仔,由天光坐到日落,都幾開心架!」
「你嗰時都幾多朋友喎!」噹噹
「我以前嗰班冇分門結黨,真係成班人都咁啱傾,有時可以一班廿幾人一齊出去玩!」
「以我所知,你哋6A班d女仔個個都好勢利,男嘅有幾個好大支嘢,基本上你哋6A班冇幾多個好人!」噹噹
「唔!由其有幾個有錢仔不可一世,所以我都冇乜同佢哋講嘢!」我
「我覺得你留返響葵涌可能會開心d!」噹噹
「有幾開心呀?」嘉
「做乜咁大聲?」噹噹
「葵涌d二打六中學邊可以同林重恩比呀,我哋係九龍塘Top 1名校呀,有幾多老豆老母想盡辦法都想將個仔
送入嚟林重恩,你叫阿政返葵涌?」嘉
「但係政仔講返佢小學d事真係成個唔同晒喎,我覺得佢依家唔開心!」噹噹
「依家返學呀,你估嚟交友咩?到佢上到大學揾到錢,唔好話朋友吖,sp人妻同志
乜都揾到啦!」嘉
「你自己中途轉入嚟就梗係咁講啦,但政仔明明有好多小學朋友響度...........」噹噹
「聽講我哋幾個都係中學先識嗰喎,返而你嗰個小學同學DaDa(女同學D),依家冇
乜兩句!」嘉
「喂喂!阿嘉你唔知就唔好出聲啦,其實係DaDa上年跟咗澄澄,所以噹噹先冇啋佢!」茵
「哦!原來噹噹嬲咗DaDa!」嘉
「喂!講小兩句嘢咋喎,幾時有嬲佢呀?我想同佢講嘢隻澄澄又走過嚟,咁我可以點啫?唔好講到我好似好小氣,
仲有唔好響政仔面前講我壞話!」發嬲
「澄澄係邊個?點解噹噹會發晒火嘅?」我
「藍澄澄(女同學F)-----------4A班兩大甲級戰犯其中之一,噹噹嘅死敵!」嘉
「兩大.........咁另一個係邊個?」我
「做乜望到我實一實?」嘉
「呀冇嘢!你上年好溫柔,應該唔係你!」
「啪!」兜頭
「另一個咪噹噹囉,佢哋兩個前世都唔知係乜嘢生物,一碰 頭就互相撕殺,行過撞到吓又打,擦紙膠碌咗去對
面想執返又打,行行吓互啤又打,依兩條戰犯基本上日日都響4A班開拖!」嘉
「就係佢哋兩個由F.1打到上F.4,基本上已經全校出晒名,全校阿sir miss一聽到靖國神社就已經擰晒頭!」嘉
「乜嘢係靖國神社?」
「靖國神社咪係我哋4A班囉!你唔係唔知吓?」嘉
「吓............」我
「你讀乜嘢書架?乜撚嘢料都收唔到嘅?」嘉
「關讀書乜事.........係啦,既然佢哋成日打架,點解校長唔將佢哋分班?」我
「危險物品集中處理會好d嘅!所以校長特別調派no.1惡人濕鳩miss落嚟
3A班駐守!」嘉
「唉..............」茵、詩
「兩年啦,F.3到依家F.4..............」唉
「就係依兩條仆街引清兵入關,引咗隻濕鳩miss入嚟,我哋4A班從始變成咗人間
地獄!」嘉
「女童院!」詩
「北韓生活!」茵
「唉...................」嘉、詩、茵
(註:林重恩除咗有個女神榜,仲有一個惡人榜,噹噹同澄澄都係十大惡人之一!)
「喂!你哋咁嘅死樣想點呀,怪我呀?係嗰個澄澄撩架打先咋!」噹噹
「政仔,你唔好聽佢哋亂講唔關我事,我冇佢哋講得咁得人驚,你.................」噹噹
「你隔離有個女仔望咗你好耐,你識唔識佢?」噹噹
「吓?」我
真係有個女仔企定定咁望住我,隻眼碌到大一大,佢12、13歲到啦,紮住馬尾、
身材纖幼、眼大大、水汪汪,比人感覺好cute、好可愛,同一個公仔冇分別,佢同
阿詩都係屬於可愛柔弱型,但佢年紀、身高都比阿詩細小,真係有種好似公仔咁
去攬實佢嘅衝動..........喂!我講緊乜嘢?
「...................」少女嚇到擰轉面
死!嚇親人,不過佢係邊個?睇佢眼神佢好似識得我,不過我就完全冇印象,但係我12歲嗰年發生
嘅意外令我有一小部份記憶係冇咗,所以我哋可能識得都唔定!
小學同學?我哋相差5、6年應該唔係,係咪舊街坊?
「你望夠未呀?鍾意人咪走埋去識人囉!」阿嘉有小小嬲
「喂!唔好咁大聲啦,人哋聽到架,我只不過諗吓佢係咪我d小學同學之嘛!」我
「哦!乜原來周街都係你d同學EX,仲有冇呀,叫埋佢哋一齊去camp啦!」嘉
「喂、喂!」
「政政有難囉!」阿茵一句
「政仔犯咗男人一個大忌,響女朋友面前望其他女仔!」噹噹又一句
「乜嘢呀乜嘢呀!哥哥同阿嘉佢哋扮情侶之嘛,又唔係真拍拖,就算哥哥望邊個都
唔關阿嘉事啦!」阿詩直頭火上加油
「係啦望飽佢啦,唔關我事!」嘉
「咔、咔、咔!」
「阿嘉佢影我哋相呀!」茵
「喂!你做乜影我哋?」噹噹
「哇、呀!」個女仔掉頭走
「喂!唔好走,小妹妹!」噹噹追咗去
「沙沙...............」走咗入草叢
「喂.......我唔係好惡啫,洗唔洗咁大反應呀?」噹噹
「係咪佢聽到你係甲級戰犯驚得滯.........」茵
「都話唔好叫我甲級戰犯囉!」
「砰!」阿茵親吻青衣草地
「嗰個女仔走咗嗱?佢係乜嘢人嚟架?」詩
「我唔知..........」我
「嗰條靚妹點咗你相啦,仲影埋相,九成九你細個得罪咗人,可能佢係你d仇人嘅
細佬妹,依家去揾人打鳩你!」嘉
「青衣好太平架,你唔好講到依度咁得人驚啦!」我
「佢會唔會真係返轉頭架?」詩
「如果佢返嚟就最好,到時我一定捉住佢慢慢拷問!」嘉
「我知道佢點解嚇到走咗入草叢啦!」阿茵醒返
「點都好啦,依度始終唔係我哋地頭,走啦!」噹噹
「仲有以後唔好再叫我個花名,同埋唔好響政仔面前講我壞話,我冇你哋講到咁野蠻,成日打架!」噹噹
「甲甲甲甲甲!」嘉
「級級級級級!」茵
「仲講?再講信唔信我扔晒你哋落海餵魚,收聲!」噹噹發狂
「趙噹噹係一個可愛嘅女仔,斯文大方、溫柔體貼、弱質纖纖、香港小姐..........」佢哋係咪食咗誠實叉燒包
「好!出發!」全體成員
講咗幾多次出發都仲響青衣,塘福比想像中路途遙遠,希望依次嘅旅途一切順利啦!
出發!