(爸爸no.1)我老豆係口靚妹: 阿政no.37
阿政no.37 桐乃與黑貓
如果真係有神嘅存在,我只希望你能夠實現我一個願望,希望爸爸永遠都響我身邊唔好再有事,
希望佢以後都好似依家咁開開心心!
冇錯!讀書應該係靠自己,將來工作或者遇到每一件難題都應該自己去解決,就好似佢一樣,以後
我都要學會面對難關,唔可以再依賴其他人,每一件事都要自己解決!
唯獨一件事,我心入面一直都有種感覺,將來會有一件可怕嘅事發生響我哋身上,希望只係我多心啦!
「喂!揾到你哋啦!」茵
「又話想自己一個人靜吓,結果咪又係兩個拍住拖返嚟!」噹噹
「唔係呀,我哋去咗做d正經事.............」政
「唔洗理佢哋,我哋去拍拖定開房都唔關佢哋事啦,可!」心情愉快
「頭先仲黑口黑面,依家直情食咗春藥咁款!」噹噹
「女人真係好似天氣一樣,阿政以後有排受!」汁
「雷劈!」阿嘉手刀直劈阿汁
「汁仔!記住唔好響阿政面前講佢女朋友壞話,死罪嚟架知唔知?」阿嘉笑得好甜
「佢答唔到你架啦,佢已經暈咗!」傑
「好!下一個景點!」嘉
下一個景點就係大澳,我哋一行十人兩架的士半小時直達大澳!
2:10pm
「其實依度都冇乜嘢好玩,不過你嗰兩個friend(汁、傑)話想嚟行吓喎!」嘉
「我都好耐冇嚟啦,想順道行吓大澳影吓相!」汁
「其實我媽媽知道我嚟大嶼山,叫我幫佢去大澳買包蝦乾!」傑
「就係你嗰包蝦乾要我哋9個人陪你嚟大澳?」9人
「你哋想點...........」不祥預感
「不過幾舒服吖,依度真係靜過昂平好多,而且d棚屋........我過去行吓!」噹噹
「喂喂!阿政我去追佢返嚟,你哋玩住先!」嘉
「各位!想唔想釣魚呀?」阿汁手揸住兩隻手排
「我未釣過魚呀,但依d都可以釣到架?」阿詩指住手排
「依度係鹹淡水交界,有好多魚毛嘅,食就唔得架啦,玩吓都仲可以!」汁
「我想玩!」麗
我哋幾個人揾咗個位置釣魚,當然班女仔唔會坐定定咁釣魚啦,除咗阿汁成坐佛郁都唔郁,
其他人都係玩一陣又走咗去行吓,不過依度都算係我哋嘅基地嚟嘅!
「好舒服!坐響度乜都唔做睇住佢哋釣魚、睇吓風景真係幾悠閒,不過好似變咗老人家咁!」我
「唔係呀!平時我做嘢做到隻狗咁,今日可以靜落嚟睇吓風景諗吓嘢都好幾好呀!」澤
依家成班女仔加埋阿原去咗買嘢,依度只係得返阿汁傑仔釣魚,我同阿澤響度吹水!
「下個禮拜考mock準備好未呀?」我
「七七八八啦,依排都做小咗part time,全力溫書!」澤
「不過你冇所謂嘅,你年年全級第三!」
「你話呀?你知唔知每到考試嗰幾日我都通頂架,三個月後DSE我絕對不容有失,
所以嚟緊我已經停晒大部分job全力溫書!」澤
「小有喎你都會咁認真?」
「我做嘢不嬲都咁認真,我通頂嗰陣冇話你知啫,而且我絕對唔可以repeat,我時間無多唔可以讀多一年!」澤
「cancer?第幾期?」我
「屌你啦,砰!」一嘢
「我幾時話我有病呀?我同我老豆講好咗用幾年時間做自己喜歡嘅事,所以我唔可以repeat!」
「阿政,將來你諗住過乜嘢嘅生活呀?」澤
「即係乜嘢生活..........未諗過」我
「咁諗好咗邊一科未?」
「電子..........啩!」我
「阿原都想考電子工程喎,到時你哋咪有個照應囉!」澤
「不過電子響香港好似冇乜用,我都諗緊跟大隊轉會計工商嗰邊!」我
「冷門得過我?」澤
「你讀乜嘢?」
「戲劇!」澤
「真架?」我
「嗯!」
「演藝學院好似有d冷門,以你嘅成績讀金融嗰邊出路好似好d!」我
「我阿媽就好似你咁叫我入佢公司,不過老豆同阿哥就撐我,24歲如果都一事無成
就要去媽媽公司做一個打公仔!」澤
「你爸爸又幾開通喎!」
「嗯!我屋企都可以叫做中上家庭,媽媽係大公司高級職員,老豆打政府工,哥哥今年畢業
應該會入媽媽公司幫手,經濟方面完全冇問題!」澤
「原來你屋企個個都咁叻!」
「就係咁先至大壓力,由其係媽媽對我有好大其望,佢一直都想我跟住佢行同一條路!」澤
「其實有人鋪埋條路比你咪幾好,戲劇嗰d你可以當興趣...........」
「阿政!你鍾意黑貓多d定桐乃多d?」澤
「做乜突然叉咗去俺妹度?」我
我講返小小嘢,阿澤講緊嘅係輕小說俺妹嘅人物,阿澤本身係個黑貓控,佢全屋入面嘅figure
三份一都係黑貓,我都唔知隻黑貓有乜嘢好?
「黑貓響其他人眼中係一個怪人、一個中二病,你覺唔覺得有d似我哋?」
「唉.........」唔好講啦
「但黑貓可以唔洗理其他人嘅眼光,活響自己世界做自己鍾意嘅事,雖然會有好多閒言閒語,
但至小可以做返真正嘅自己!」澤
「相反桐乃好在意其他人嘅睇法努力響其他人面前做一個正常人,做到啦咁又點?咪又要響間
房度先可以做自己鍾意做嘅事------睇動漫打工口game!」澤
「我曾經都試過好努力咁做其他人眼中嘅正常人、精英,做係做到呀,不過唔可心啫,當睇到自己
一生--------一生出嚟讀書,小中大學,出嚟做嘢買樓結婚生仔,供樓供到老,好命嘅淨返d錢等死,個個都一模一樣!」澤
「香港個個都係咁架啦!」我
「但我嘅人生觀價值觀真係同佢哋唔同呀,自從F.4識到你哋之後,我發覺原來
做毒撚係最適合我架!」澤
「其實算唔算係我哋帶壞咗你?」
「我哋就好似一件零件,一生出嚟就落咗響一條運輸帶度,中途會有各種加工,不過到最後都會
變成一式一樣嘅商品,當中有一兩件特別d嘅佢哋會稱為次貨!」澤
「我正正就係依種次貨!」澤
冇錯,我哋生活響依個香港雖然叫做自由,但每個人都好似玩緊AVG game,每一步都只有abc你揀
,但點揀都好,結局只有good ending同bad ending--------揾到錢同揾唔到錢!
「就算幾鍾意覺得幾有意義,揾唔到錢就係冇出色,無論生活方式、人生目標只有一種成工準則!」澤
「錢吖嘛!個個都係咁架啦,我老豆成日都話錢係揾唔晒,不過好快洗撚晒!」我
「我阿媽都話錢唔係萬能,不過有錢唔揾就低鳩能!」澤
「......................」你眼望我眼
「唔知邊個話豬係望唔到個天,因為佢d食物響地下,只要望住個地就可以揾到食,喂有幾耐未望過個天?」澤
「啱啱望緊!」我
「我有個friend以前同我講過,我咃唔係生存響地上,而係生於宇宙,只不過我哋坐咗響一架叫
地球嘅太空船度,只要夜晚瞓響地下望住個天,就會發覺我哋響宇宙航行緊!」我
「好浪漫喎,女仔嚟架?」澤
「唔記得咗,應該係小學同學!」我
「check吓個腦好喎,可能有腦退化!」澤
「唔關事,另有原因............喂,鳩up完未呀?」我
「唔知10年後我哋會變成點呢,會唔會覺得今日講嘅嘢好戇鳩!」澤
「可能日日做到隻狗咁,乜嘢都係錢錢錢!」我
「可能發咗達呢,到時可能大大聲講如果唔係有我哋依d有錢人,香港人一早冚家鏟啦!」澤
「仲有我哋依d金主嚟消費,點解你哋笑都唔笑吓架,咁撚樣嘅服務態度點得架?」我
「到時成條街都唔夠我哋行呀!哈哈哈~~~」
「希望唔會有咁嘅一日啦!」我哋
「喂!做乜兩個瞓晒響地下呀?」嘉
「全部返晒嚟啦!」澤
「阿原你嗰兩袋乜嘢嚟架?」我
「天葵茶、仲有好多小食,依家先4點幾仲可以吹多兩粒鐘先散水!」嘉
「咁都唔洗買成十支架,好大支添點飲呀?」噹噹
「飲唔晒咪倒咗佢囉,錢之嘛!」嘉
「阿嘉頭先比咗個婆婆一千蚊話唔洗找!」詩
「依d窮鄉僻壤比小小錢d公公婆婆佢哋就好似隻狗咁對住你笑,你話有錢係咪大撚晒,哈哈哈!」嘉
「將來絕對唔可以變到好似佢咁!」我哋兩個
「哈~~~哈~~~」有講有笑
「你女朋友幾特別吓,三幾個月前仲係溫柔斯文女神,依家直頭生人勿近!」澤
「冇咁誇張吓?」
唔通話比你聽嗰個係我老豆咩?
「傳聞睇嚟係真,蔣泳嘉係全校老師特別處理嘅學生!」澤
「乜嘢特別處理?」
「傳聞咋!好似話蔣先生同校長係好朋友,蔣泳嘉需要特別照顧同保護,所以校長特別指派miss做3A、
4A班主任,負責睇住蔣泳嘉!」澤
「乜唔係要睇住d乜乜甲級戰犯咩?」我
「十大惡人?十大惡人有9個都係學生,miss睇得邊個呀?而且蔣泳嘉之前試過響學校天台自殺,
好彩miss手快救返佢!」澤
「自殺...........」
我聽過盧碩俊講過阿嘉唔係第一次自殺,原來佢響學校都............
「不過最奇怪係佢有小小語無倫次,話乜嘢佢哋唔會放過我,一直跟到我返香港!」澤
「邊個佢哋?」我
「唔知,係聽到咁多,仲有唔好同並他人講,始終依d事會影響到學校聲譽,學生會d人都冇同其他人講,
不過你係佢男朋友我覺得你應該要知!」澤
「....................」
「仲有有乜嘢事一定要揾人幫手,由其係蔣泳嘉爸爸,佢應該最清楚來龍去脈,記住小心睇住你女朋友呀!」澤
「仲有一個內向嘅人突然180度變成開朗嘅人,未必係一件好事嚟架!」
「嘩~~~哈哈哈~~~」仲響度玩緊
睇住佢響度嘻嘻哈哈,我覺得問題冇佢講得咁嚴重,因為眼前依個已經係我老豆
而唔係當日嘅蔣泳嘉,無論有乜嘢事佢都頂得住,不過阿澤講到咁嚴重連我都有小小不安,希望只係我哋諗多咗啦!