(爸爸no.1)我老豆係口靚妹: 爸爸no.40
爸爸no.40
「呼~~~呼~~~」
好舒服!無憂無慮一個人響度吹海風,好似將所有煩惱都吹走晒,依家嘅我好討厭孤獨,一大班人
響我身邊有講有笑真係成個人放鬆晒,阿汁傑仔阿詩響度釣魚,阿原佢哋三個直頭玩到甩晒邊,
至於阿政阿澤噹噹一句聲都冇出望住個天!
依d日子真係好令人懷念,只有學生時代先至會做,一大班人坐響度對住個海咁就一日,人大咗唔
好話一大班人出嚟,就算兩三條友出嚟吹水都要摸住酒杯底,一路打牌一路睇波!
係囉!點解人大咗反而越嚟越依賴物質,出嚟講句嘢啫?波馬合一飲飲食食又女人又雞雞鴨鴨,最慘
係飲完食完個個急急腳鳥獸散(連錢都唔比嗰吓最仆街),其實出嚟做乜鳩?
反而依班靚仔好似無所事事,但一個海塝一個球場就可以比佢哋吹成日,連我依個
40歲阿叔都比佢哋感染埋,好想溶入佢哋身邊,不過我都係15歲啫,宜家都未遲,但
係阿政今年畢業,下年嘅學生生活會唔會好似依家咁開心呢?
「天黑啦!」噹噹
「喂等陣!仲有十支天葵茶未飲呀,同我隊晒佢先準走!」我
「好似係你買嗰喎!」有幾個
「唔洗錢買比你哋飲都仲咁多聲氣?我宣佈------------邊個飲唔晒一支嘅依世都冇得入大學
,DSE一分都攞唔到!」我
「好狠毒!」噹噹、茵
「考mock先嚟講d咁嘅嘢!」五毒
「影響軍心!」詩、麗
「佢仲點着支香對住間廟係咁拜添!」噹噹
「支香邊度嚟?」詩
「其實佢係咪落緊降頭?」茵
「仲講?飲啦,飲咗包你哋入到大學!」我
「嗗~~嗗~~」怕咗佢
「做乜連你哋都飲呀?」我
「我都想讀大學!」噹噹終於燃點返讀大學嘅信心
「我都係!」詩、茵
「嗰個姐姐好黑人憎!」麗麗都飲埋一份
「喂!我講吓笑搞吓氣氛咋,洗唔洗咁迷信?」
「.................」兇啤
睇嚟我好似傷害咗依班小朋友嘅弱小心靈
「飲晒啦到你!」噹噹
「我?」
「你唔係唔飲吓?」五毒
「我點解要飲呀?」
「又話唔飲讀唔到大學嘅?」麗
「唔好咁迷信啦,讀書係靠實力架,而且我屋企大把錢讀唔讀到大學都冇所謂,唔似得你哋...........」無賴
「捉住佢!」噹噹
「哇!你哋做乜嘢?」茵、詩兩個夾實我
「一人一支你話架!」噹噹行緊過嚟
「我頭先飲咗罐汽水肚脹脹,今晚、今晚!」
「撐大口啦仲講!」隊隊隊
***********************************************************************
「咁就兩日啦!」我
「唔!初頭以為三日camp有排玩,估唔到咁快就兩日!」政
「時間可以過得好快架,你老豆我以前讀書嗰陣以為四、五十歲係好長遠嘅事,點知眨吓眼就過咗!」
「不過宜家又變返15歲!」政
「又重新玩過囉!天黑啦,無論你幾唔願意都好,過咗去嘅就係過咗去,今日好快會
變成歷史!」
「喂!仲未玩夠呀?天黑啦要走啦!」噹噹
「其實好早啫,不過6點成個天黑晒好似想趕人走咁!」我
「哇~~~唔好走啦,今晚響塘福瞓一晚啦!」茵
「唔得呀,媽媽鬧架我要走啦!」麗
「唔比你走唔比你走!」生離死別
「阿茵可唔可以比返個妹我?」原
「好似個個都未玩夠喎!」我
「但點都要走啦,由依度返出九龍要成兩個鐘架,好啦出發!」汁
「咁你哋搭車出返去東涌,我哋返塘福啦,bye bye!」噹噹
「走咗啦,得返我哋5個突然間靜咗好多!」詩
「唔捨得佢哋呀?考完mock咪叫佢哋一齊出嚟囉!」噹噹
「不過佢哋好悶架,淨係識得打機睇動漫!」政
「放心啦!有你個阿嘉響度佢會plan架啦!」茵
「真係個個都唔想走咁喎,不過今日冇咁凍,好舒服!」我
「依家氣溫仲有16、7度,今晚燒嘢食唔會凍死啦!」噹噹
「燒嘢食呀,我哋要快d返去準備!」詩
「傻妹!依度call的返去塘福半個鐘都唔洗,吹多陣先啦!」我
「..........................」
話走又唔走,結果吹風吹到7點幾,真係唔凍吹到凍,亦因為咁我係第一個嗌走嘅人!
不過睇佢哋個樣都唔想依一晚咁快結束,好啦!今晚玩夜D!
*************************************************************************
「好啦快d起火啦好凍呀!」我
「暖過琴晚好多,依家仲有14度!」茵
「有風呢!阿政攞晒d碳精出嚟倒落去啦!」我
「十幾粒!」政、噹噹
「對你哋d未起個火嘅人差唔多啦,好起壇!」
「其實你哋覺唔覺得12、3度燒嘢食有d作賤自己,暖暖哋打吓邊爐咪仲好!」我
「返屋企打邊爐啦你,嚟得依度連個天都唔望吓真係對唔住自己!」噹噹
「不過阿嘉響度震緊喎!」詩
「你冇嘢吓?你仲病緊架頂唔頂得順呀?」茵
「我比件褸你著啦!」政
「到你病啦潺仔學人扮大隻!」我
「一齊摟啦!」我同阿政一齊摟住件褸
「我覺得佢係特登扮凍!」噹噹
「你嘅、你嘅!」
阿政響度同我哋燒雞翼豬扒,冇辦法啦得佢一個男仔,做硬阿四架啦,不過衰仔
又燒得幾好喎,真係第一次燒嘢食?
「仲有乜嘢想燒呀?」政
「仲有依d!」我
「阿汁釣嗰兩條魚?乜唔係放返啦咩?」詩
「我叫佢留返比我嘅,依家可以慢慢玩!」
「玩?不過咁細條都食唔到啦!」噹噹
「都話愛嚟玩囉,放佢落火度睇住佢慢慢掙扎...........」
「變態!」4個
「放返落海啦,成日都玩埋依d嘢!」噹噹
「阿汁話依d係鹹淡水魚,就咁放落海好似會死架!」詩
「嗰邊有條河,放去嗰度啦!」政
「你哋唔係要我一個人過去吓?燒完一齊去啦!」我
「嗱、嗱.........」
一大班人有講有笑燒吓嘢食又幾feel嘅,不過噹噹一路講埋d鬼故破壞晒d氣氛,明知我最驚
依d嘢.............唔係,佢哋都唔知,唔可以比佢哋知道我怕鬼,如果唔係以後一定比佢哋玩死!
「呼~~~咁就第二晚啦,初頭以為三日camp好長,原來過埋今晚聽日就要返屋企!」我
「原來你都唔捨得呀!」詩
「咁今晚燒通頂啦!」噹噹
「凍死你呀!」政
「d碳都唔夠啦!」茵
「阿政去攞d汽水返嚟,攞夠一打!」我
「糖尿病呀!」政
「攞就攞啦!」我哋四個
「喂!襯住依家我哋去放返條魚先啦!」噹噹
「咁急?又話燒完先一齊去?」
「11點啦,燒完你哋個個都走去瞓啦仲放魚!」噹噹
「好啦好啦依家去啦,但唔係得我一個吓?」
「我同你去!」噹噹
「嗱!沿住條小路行幾分鐘已經到啦!」噹噹
「竟然為咗兩條魚毛夜媽媽行到嚟依度!」
「係囉!其實你係咪怕黑架?我講鬼故嗰陣見你好似好驚咁!」噹噹
「講咩呀你?」我
佢唔係想玩鳩我吓?都係快快趣趣放完走人!
「喂!搞掂啦,我哋走............」
走咗!條八婆真係走咗,不過冇所謂,依度嚟燒烤場7、8分鐘路程,行快兩步一個字都返到去!
「沙.......沙.........」
「噹噹!唔好玩啦出嚟啦!」
「沙.......沙..........」
唔係噹噹,都係快d走!
「嗄........嗄..........」
「爸爸!我想返香港,依度只係得我一個,一到夜晚佢哋就響出面四圍行,佢哋試過好多次想入嚟
,我用枱櫈頂住度門佢哋先入唔到嚟咋!」
「但我驚遲早有一日佢哋會入到嚟我間房!」
「佢哋係邊個?」爸爸
「鬼!」
做乜會有依d記憶架?都唔係我嘅記憶,不過後面............
「呀!」
仆街!今次真係仆街啦,隻腳好痛好似扭到,揾阿政、揾阿政!
「嘟......嘟.......」
「阿政!我依家響燒烤場對面條小路,我扭到腳行唔到呀快d過嚟啦,後面好似有嘢!」
「有乜嘢?唔洗驚我跑緊過嚟兩分鐘!」政
「嘟!」
嗄......嗄......阿政過緊嚟冇事啦,咦?電話後面倒影...........
佢哋響後面........佢哋一直都冇離開過我,佢哋跟到我返香港...........我會死!
「嘩!」連爬帶走
「呀!」又跌到
「沙......沙.......」
「我唔要、我唔要再一個人,唔好再揼低我,子政!」