(爸爸no.1)我老豆係口靚妹: 阿政no.40
阿政no.40 (將回憶存放於心裡2)
「快d執啦,12點半啦!」嘉
「邊個臨走嗰陣話玩乜嘢棉胎大戰架?執好咗又亂過!」噹噹
「咁你又玩!」嘉
「佢哋會唔會講講吓又打架?」詩
「到時執到天黑都未執完!」茵
「搞掂晒可以走啦!」嘉
「唔!」詩
「阿詩好似好唔捨得咁喎!」嘉
「第一次去camp係咁架啦!」茵
「佢會唔會今晚瞓唔着?」噹噹
「做乜呀?望多眼之嘛,我又唔係細路仔!」詩
「嘟~~~」電話
「阿頌?」
「喂~!走啦,知啦知啦今晚成家出去食飯嘛..........冇比人蝦呀...........冇男仔全部都係
女仔呀..........4、5點到啦!」詩
「阿詩嘅阿哥?我以為係佢條仔添問長問短!」嘉
「冇辦法啦,由細到大佢都錫到個妹燶!」噹噹
「有乜事都會幫個妹出頭,我忽然間都好想有個阿哥,咁我就唔洗成日比人打!」茵
「啪!邊個打你呀?」噹噹又打人
「胖虎..........」
「砰!」
「不過太保護都唔係一件好事,阿詩仍然好似一個細路女咁,任何事都要依賴人,如果以
後遇到傷害或挫折,可能就企唔返響身!」嘉
「唔好咁話人啦,阿詩性格一向都係文靜,只係冇你咁硬淨啫!」我
其實我自己都一樣每做一件事都希望依靠他人幫助,遇到難題第一時間係揾人幫手而唔係自
己想辦法解決,但爸爸依家已經變成一個女仔,下一年我同阿澤又會各散東西,以後有任何事我
都要自己解決,好!我要真真正正長大!
「做乜企咗響度郁都唔郁呀行啦!」嘉
「哦!」
2:30 東涌
「好啦!阿詩之前話想行吓東涌,我哋響依度行吓食d嘢先走啦!」嘉
「又食?」噹噹
「聽講我哋1點食完晏先返出嚟啵!」茵
「咁東涌乜嘢都冇唔係飲飲食食有乜嘢做啫?」嘉
「你啱、你啱!」茵、噹噹
「我又冇話即刻食,行完商場臨走先食啦!」嘉
「其實都冇乜嘢好行!」噹噹
「香港商場個個都一模一樣架啦,放假行商場嗰d真係低鳩能,而且依度全部都係
自由行名店,唔啱你哋架啦!」嘉
「啱架!冇錢買之嘛!」茵
「其實梅窩仲好行啦,起碼可以行吓海邊吹吓海風,行吓d巷仔、睇吓d小鋪頭,就算只係
一間士多都想入去買吓嘢,但依度就冇乜意欲!」噹噹
「冇錢就冇錢啦意欲!」茵、嘉
「啪!」
「喂!等等啦,阿詩仲響嗰邊呀!」我
「阿詩響度睇緊風景呀?」茵
「依度個景好靚好開揚!」詩
「雖然係商場,但依度可以睇到機場景架,不如我哋去隔離間coffee shop飲杯嘢慢慢睇啦!」嘉
「行咗唔夠兩個字又食」噹噹有d微言
「唔洗啦,我都唔鍾意飲咖啡,繼續行啦!」詩
雖然話冇乜嘢好行,但我哋幾個蕩吓蕩吓都成個鐘,可能大家都唔想咁快走啩?我哋宜家響對
面商場嘅餐廳食緊嘢,當食完依餐後今次嘅旅行真真正正結束,要返屋企啦!
「我要C餐,仲要加多個甜品!」嘉
「真係好食得!」噹噹
「我就冇乜胃口啦!」詩、茵
其實我都飽飽哋,不過又唔想咁快走,一大班人有講有笑,望吓窗外街景............
嗰個女仔!響青衣公園望住我影我相嘅女仔竟然響外面,又係眼仔碌碌咁望住我,仲同我笑向我點頭,
而我亦好有禮貌咁向佢點頭,不過我真係唔識佢,佢係邊個?
佢住響東涌?應該唔會跟到我哋入嚟啩?
不過佢比我嘅感覺好奇怪,好似有一種親人嘅感覺,唔係失散多年嘅兄妹嘛?
走咗啦!仲同我揮手,而我亦都向佢揮手,雖然唔知佢係邊個,不過直覺話比我聽,我哋一定會再見面!
「傻咗呀?對住隻窗揮手!」嘉
「係咪睇到d我哋睇唔到嘅嘢呀?」噹噹
「係咪見到有人奶叉燒?」茵
「你哋仲講!」阿嘉發癲
5:30pm
「呀~~~返到屋企啦!」嘉
「始終都係自己屋企最舒服!」我
「今晚可以舒舒服服瞓返一覺啦!」嘉
「喂喂喂!九龍塘好似先係你屋企,9:30要走啦!」
「其實如果我話我哋仲響塘福玩多晚,佢哋應該會信個可?」嘉
「你想點?」
「嘟嘟!」付諸行動
「係呀.......咁咁...........係囉!所以聽晚先返嚟,你同大.........爸爸講聲吖!」嘉
「我仲響塘福!」yeah
「服咗你!」
「我嘅camp仲未完架,Yeah!」發咗癲響張床度係咁跳
「你自己彈住先我要睇一睇d note!」
「一返到嚟就攞起本書,係咪開始驚啦?」阿嘉笑笑口望住我
「一個禮拜後要考試啦,當然會緊張啦!」
「唔洗緊張,依個星期我會同你一齊操paper,有我響度一定掂!」
「嗱!比d嘢你睇!」嘉
「我哋響塘福影嗰d相!」我
「仲有佢哋whatsapp過嚟嗰d,洗唔洗send咁多呀你班人!」
「阿澤佢哋都有影,連你落毒咒點着支香佢都影埋!」我
「條死毒撚!」
「不過都幾好吖,大小事佢哋係又影唔係又影,就算過幾年每一個細節我都記得清楚!」我
「嗱!依幅集體相我會print 出嚟一人一張,個個都要擺響自己間房,睇吓廿年後會唔會揾得
返出嚟,至於其他就放上fb啦!」嘉
「強烈反對!我d柒嘢同你哋打架都放上去死得都似,每人比隻手指算啦!」
「咁send個file比佢哋啦!」嘉
「依家乜嘢都入晒電腦,如果harddisk死咗又或者幾年後想睇返d相都唔知放咗響邊個file!」我
「十年後張集體相可能唔見咗,部電腦d相又可能delete咗,不過最重要嘅響依度!」阿嘉指住我個頭
冇錯!今日嘅人好多都鍾意將相片短片紀錄所發生嘅事,但正正就太多相片,影完跟本唔會再睇返,
就好似為影而影或者為打卡呃like而放上綱,但好快就成為過眼雲煙!
反而將美好嘅回憶存放於心裡,只要唔好撞親個腦(撞過一次)回憶永遠都會響我腦裡面,中學依6年我
都好似白白浪費,希望以後嘅每一天都可以成為美好嘅回憶!