(爸爸no.1)我老豆係口靚妹: 趙語聆(1)
趙語聆(1) 熟悉的感覺
「喂點呀?三日後要考mock掂唔掂呀?洗唔洗幫手?」
「不過我讀書最差都幫唔到乜嘢架啦,跑埋聽日要停啦,要有充足睡眠知唔知?」
「係啦!平時你咁當瞓點解可以起到身跑步嘅?吓!驚我一個人跑仆街要睇住我?」
「睇路呀靚仔!你仆我都未仆呀,不過你講嘢越嚟越串同粗魯,唔好跟阿嘉咁多教壞你呀,
哦!原來一早壞咗,咁我同你切咗佢啦!哈哈~~~」
「阿聆!」
「媽媽叫我唔講啦,聽日見啦byebye!」
「阿聆!依度d餸整好咗,你今晚加熱就食得架!」媽媽
「得啦!你今晚要返夜更唔好搞咁耐啦抖吓啦!」我
「係啦!頭先同你講電話嗰個邊個嚟架?唔係嗰個衰人吓?」媽媽
「唔係呀,同學嚟咋!」
「記住呀,如果嗰個人打嚟千祈唔好聽呀!」媽媽
「係囉!成日都想嚟揾返個女,你哋都要小心d呀,唔知佢又打d乜嘢主意!」媽媽都響度講緊電話
爸爸邊有你講得咁衰,反而你成日響d親戚面前講佢壞話,搞到所有人都驚咗佢!
憎一個人真係可以憎得咁犀利嘅咩?以前我哋可以一家人開開心心去街,宜家連講佢個名都唔可以
,媽媽你唔辛苦嘅咩?
又係自己一個食飯,不過政仔都係一個人住,佢應該都係一個人食!
唔係!阿嘉成日都上政仔度,佢哋應該一齊食緊飯,即係只得我一個孤令令!
唔知十幾年後我會唔會有自己嘅家庭,一家人開開心心一齊食飯,定還是仍然只係得我一個?
「早晨!」政
「遲咗喎!」我
「琴晚溫夜咗唔知醒!」政
「睇個樣都知啦,頭都冇疏!」我幫佢整緊個頭
兩個人都係一樣亂七八糟,咁大個人都唔識照顧自己,一樣比人感覺係小男人、冇出色做唔到大事,
比女人鬧又唔敢出聲,乜嘢事都要人擔心,但又一樣咁細心咁溫柔...............
「個頭好似搞咗好耐仲未得呀?」政
「呀!得啦走啦!」
「你隻手帶咗條手繩?」政
「係呀!我表妹用橡筋整架,好多細路仔依家都整依d,今晚我會去佢屋企食飯所以帶比佢睇囉!」
「原來你有個表妹架?」政
「嗯!不過今晚又要聽d三姑六婆講人是非!」我
「邊個是非?」政
「冇.............」
「你條手繩呢?」政
「冇咗?」我
「可能響嗰度跌咗,我去嗰邊揾吓!」政
「唔洗啦!橡筋繩之嘛,又唔知響邊度跌算啦!」
「我記得響入公園之前你仲有帶嘅,應該響前面!」政
「喂!黑媽媽點揾呀算啦!」
「...................」走咗去揾
真係一模一樣,都係專做埋d無聊事,就算幾努力都好,都係幫唔到乜嘢手!
但響我唔開心想有人陪嘅時候,佢哋都會響我身邊!
「揾到啦!」政
「咁你都揾到?」我
「頭先入公園嗰陣都仲見你帶住,所以沿住條路一定揾得返!」政
「條手繩其實冇斷到,只不過太鬆所以跌咗出嚟,我同你打個結啦!」政
「喂......喂!」佢捉住我隻手幫我打結
死傻仔!問都唔問就捉實我隻手,其實佢有冇當過我係女仔嚟架?
不過佢d性格可能真係冇諗到依d嘢,白痴仔白痴仔!
「得啦!不過打到個結成舊嘢咁!」
「所以我咪話唔洗打囉!唔怕啦陣間去到阿姨度我先解返佢啦!」我
「我打嗰個係死結............」政
冇嘢啦!對住佢真係唔知好嬲定好笑,不過佢個傻仔樣真係好可愛,真係好想每日都見到佢!
雖然佢話以後會一直響我身邊,但我都知道兩個人生活環境唔同咗,關係會慢慢轉淡,當佢習慣
咗大學生活之後佢就會響我身邊消失!
即使能繼續成為朋友,但佢身邊已經有阿嘉,跟本冇可能,永遠都唔會有可能!
*************************************************************************
好舒服!同噹噹一齊嘅時候有一種似曾相識嘅感覺!
我記得我小學時候有一個非常親密嘅朋友(好似係女仔),同佢一樣細過我但又要
擺起個家姐款,
乜嘢都要佢話事,唔夠人講就出手打人,響其他人眼中佢哋都係牛黃妹,但當講完鬧
完打完第二朝又好似冇事發生!
無論開心定唔開心都想第一時間將心底話同佢分享,同佢哋相處真係好自在無拘無束,
反而一d文靜嘅女仔我就覺得好唔自然!(其實我係咪有被虐狂)
唔知嗰個女仔宜家點呢?仲會唔會記得我?因為一次意外加上自己性格,身邊連一個小學同
學都冇,但今次唔會,我唔會再輕易放棄一段友誼,由其係噹噹,唔知點解我有一種好奇怪嘅感覺,
我好想每一日都見到佢!
*************************************************************************
「又話帶我睇星嘅?一粒都冇!」我
「今晚多雲睇唔到!」政
「平時冇雲我都見唔到有星!」我
「有一兩粒架,再夜d可以見多幾粒!」政
「你話帶我睇星就係睇嗰一兩粒?」
「見唔到唔代表唔存在,其實佢哋都響我哋頭上,只不過雲同光影響我咃先睇唔到啫!」政
「咁我哋睇乜呀?」我
「用心睇!我爸爸話佢小學嗰陣響西貢見到好多星,只不過香港人只係顧住拉錢,依家度度都
起樓已經再睇唔到星空,香港嘅夜空只得返月與夜,不過佢哋仍然響我哋頭上面,到我大個嗰
陣我會帶你去睇真一嘅星空!」政
「去邊度睇呀?」我
「撒哈拉!」政
「其實你知唔知乜嘢係撒哈拉?」
「沙漠囉!好似話嗰度萬里無雲,可以睇到好多星,我大個有錢帶你去吖!」政
有時我真係懷疑依個人個腦有d問題,頭腦簡單得嚟又天不怕地不怕,亦因為佢依種性格連我都感
染埋,性格負面嘅我都慢慢變得開朗!
隨住各自父母嘅期望,中學之後我哋再冇見面,到我響網上再次接觸到你,點解你好似變成另一個人?
冇自信、冇目標、冇夢想嘅張子政!
當我以夜貓嘅身份從新認識你,知道你中學生活好唔開心,無法同阿浩一齊去追尋夢想,就好似我當日
一樣睇唔到前路,有時我會覺得如果我哋響同一間中學,命運可能會完全改變!
不過一切都已經過去,因為我已經返到你身邊,你再唔係孤獨一人,你嘅夜空絕對唔止月與夜,我會帶你
去撒哈拉,我要再一次成為你女朋友!