阿政no.47           桃花盛開


旺角

「政仔!我哋去花墟乜唔係響太子出咩?點解會嚟咗旺角架?」噹噹
「你話肚餓想食d嘢嘛,太子我又驚d鋪頭收檔,嚟旺角應該穩陣d!」

「你又真係幾穩陣,其實我想話就算去7仔買d嘢食都可以,而且年宵市場都好似有嘢賣!」噹噹
「係喎!點解我諗唔到嘅?」




「張子政哥哥你好得意呀,我想問如果我話口渴你會帶我去邊度呢?」笑

「帶你去水塘!」我又笑
「去死啦仲笑,無啦啦要我行多一個地鐵站!」噹噹
「得得,行啦行啦!」我

「等等!不過依度又幾多嘢食嘅,我頭先都淨係食咗個杯麵咋!」噹噹
「你冇同你媽媽一齊食咩?」
「媽媽要返夜,得我一個冇煮呀!」噹噹





「咁依餐就當係你嘅團年飯啦,我請!」
「原來我嘅團年飯只係得一粒魚蛋!」噹噹
「仲有豬大腸!」我

「比多包雞蛋仔都得啩?」噹噹
「加多包魷魚鬚又點話!」我
「仲要...................」

要多d要多d我哋嘅掃街之旅就正式開始,好在年三十晚好多鋪頭都未關門真係食乜有乜,噹噹同阿嘉唔同佢好
細食,但係佢又樣樣都想試,結果好多都係咬一兩啖就比咗我,我已經變成佢嘅垃圾桶!





我哋每人手上都揸住兩三包嘢加一杯嘢飲,因為實在太多嘢啦所以我哋互餵,你餵吓我我又餵吓你,依種感覺真係幾甜蜜!
不過甜蜜嘅時光好快結束,因為噹噹真係好細食,佢將所有嘢食都比晒我,大佬咁多嘢點食呀?

「行得未呀?」噹噹
「食埋依兩袋先啦!」好辛苦
「你食還食唔好企正響路中心啦,阻住人陣間比人打呀!」噹噹

「唔係呀企響度食嘢都比人打?」
「江湖規矩,企響旺角唔郁就會比人打!」噹噹
「邊個咁惡呀?」我

「你話呢?」笑得好可愛
「壞人?」我
「啪!係我呀!」兜嘢打落嚟





「又話同我去買桃花,淨係顧住食D花都賣晒啦走啦!」係咁扭係咁扯
「得得兩分鐘,食埋依幾條!」
「我餵你!」
「唔..........」勁粗魯

好暴力好唔文明,依個女仔.............不過比起初相識嗰陣好似唔同咗,以前嘅佢好粗暴又成日打人(其實依家都係),
點講呢?係咪佢頭髮長咗?我覺得佢越嚟越女仔,越嚟越可愛!











花墟:

「千辛萬苦終於嚟到啦!」噹噹
「好飽!」
「政仔!雖然成兩點鐘大家都倦,不過都要比d精神!」噹噹
「好!買花!」我哋


「d桃花唔係淨得好多咋,你想買幾大棵呀?」我
「我個廳好細,我想買d細細棵嗰d囉,不過細嗰d都好殘!」噹噹
「你睇!嗰檔有好多桃花呀!」我
「過去睇睇!」噹噹

「依檔d桃花又真係幾靚!」噹噹望住中間嗰棵桃花
「小妹妹真係有眼光,依棵桃花好多花lum,$688好抵架!」老細




「靚就幾靚,不過太大棵啦好似唔係咁啱!」我

「唔係呀都好幾啱吖!」噹噹好似着咗迷
「係呀我d桃花全場最靚,買返去擺足成個月都得,只要你擺到新十五包你行桃花運!」老細

「點呀?」我
「又真係幾好,不過大咗d同貴咗d,如果可以平返小小就最好,政仔幫我同老細講價!」噹噹
「咁你嘅budget幾多呀?」我
「我原本諗住買200蚊嘅!」噹噹

「嘩!$688減到去200蚊你都好狼死吓!」我
「唔係唔係,咁大棵我屋企都擺唔到啦,其實我想老細可以劈開一半,咁二百零三百蚊我都比得起嘅!」噹噹
「咁我試吓啦!」

「老細,棵桃花太大啦,可唔可以劈開一半平小小賣比我哋呀?」我




「唔得!劈開一半咁另一半點賣呀?唔得唔得!」老細
「細細棵仲易賣啦,你睇吓你d花細嘅就賣晒淨番大棵賣唔出!」我

「係呀!其他檔口d花都賣得七七八八係得你依度賣唔出!」噹噹
「我d花都唔知幾靚呀賣唔出!」老細
「你d花真係好靚,但個價企得太硬啦,都成兩點幾減d啦!」我

「係啦減d啦!平小小我同你要咗佢!」噹噹
「都話冇得減囉!」老細死都唔減
「真係一蚊都唔減?」噹噹嬲嬲地

「咁啦加弘一蚊比多盤桔你啦!」老細
「我叫你平d你仲加我一蚊?」噹噹
「喂喂喂!加多一蚊比多盤桔你喎?$688又好意頭!」老細

「我嚟買桃花你比盤桔我把撚咩?688就688啦加嗰一蚊有幾好意頭呀?多鳩餘!」噹噹開始講粗口
「依d叫綑綁式銷售係銷售策略,你d靚妹識條春咩?」老細都火火地
「講就叻!綑咗咁耐咪又係連毛都賣唔到條,識----條----春!」噹噹冷靜冷靜

「兩個唔好嘈,其實老細依家都成兩點幾啦,d人又越嚟越小減d啦,早d賣晒早d收工嘛!」我
「係囉!過多幾個鐘天光d花就好似你咁變廢柴架啦!」噹噹你究竟係嚟買花定鬧架嫁

「係啦唔好同錢鬥氣,劈開佢兩碌易賣d架!」我
「向現實低頭啦!」噹噹
「劈佢劈佢劈佢!」我哋

「我劈撚死你哋兩個呀,唔做你哋生意走走!」我哋比老細掃咗出檔口
「今時今日咁嘅服務態度點得架?」我
「電視都有講啦,就算比人鬧到隻狗咁都要對住個客笑架嘛,一d都唔專業!」噹噹

「咁宜家點呀?睇唔睇埋其他幾檔?」我
「唔洗啦嗰d都唔靚!」噹噹
「行吓乾貨檔先啦!」我

「乾貨檔口好多人呀!」我
「兩點幾都仲咁多人,逼到行唔到.......呀!」噹噹比人夾到實
「小心呀!」我攬住咗噹噹
「呀.......」噹噹

死!我好似之前攬住阿嘉咁攬住噹噹(習慣咗?),但佢唔係我老豆,雖然話我唔想佢比人抽水先攬住佢,
但咁樣咪變咗我抽佢水?

「對.....對唔住!」我
「唔緊要喎!我哋兩個著到成隻糭咁冇事個啵,喂!有小小凍攬實d......」噹噹

佢竟然知道我心諗乜仲叫我攬實d?不過佢隻手真係好凍,響兩點幾嘅花墟實係10度都可能冇,但我依家
直頭全身發滾,唔計我老豆(嘉)我應該係第一次攬到一個女仔咁實,冷靜冷靜唔好有任何生理反應!




「嗰度有d公仔幾得意過去睇吓囉!」我
「都唔靚!」噹噹
「嗰邊有汽球!」我
「仲細咩!」噹噹

「食唔食d嘢?」我
「你食咗十幾袋仲食?」噹噹
「我仲想買返d嘢比你補數!」我
「啱先得架,唔鍾意唔洗格硬買啵!」噹噹

噹噹就係咁嘅性格!其他女仔一見到得意嘅嘢就諗都唔諗買咗佢,一兩日玩厭就唔知扔咗去邊,但噹噹只會
買自己鍾意嘅嘢,冇需要唔鍾意佢望都唔望,而且一用就用好耐,佢屋企仲有好多細個嘅玩具飾物,佢依d性格
都唔知叫專一定念舊!

依家佢個腦應該只有嗰棵桃花架咋,其他嘢佢應該都睇唔入眼,估唔到千辛萬苦嚟到花墟竟然空手而回!



「走囉!」噹噹
「都要去旺角揾返佢哋啦!」我
「不過我有小小急我想去個toilet!」噹噹

「好多人,可能要等成十分鐘!」我
「咁你都去個厠所先啦,陣間響度見!」噹噹
「好啦我都去個厠所先!」我

「................」
「688就688啦!」





「老細!我要嗰棵桃花同我劈開佢一半!」我
「又係你?都話咗唔劈囉!」老細
「688照比不過唔要咁大棵,同我劈開佢一半!」

「咁就唔同,依邊好唔好呀?依邊最靚!」老細
「就依邊啦,唔該快小小趕時間!」我
「趕住返去見女朋友呢?真係為女死為女亡,為博紅顏一笑唔理手上鈔票...........」老細你都好多嘢講啵

「嗱!見施主你情深義重我就收平D啦--------628!」我以為唔洗錢添
「哥哥仔!唔好即刻返屋企同女朋友揸住棵桃花兜個圈先,不過哥哥仔你春風滿面今年一定行正桃花運,
快D返去女朋友等緊你呀!」老細可唔可以唔好咁大聲,成條街都聽到啦



「噹噹!」
「去咗邊呀?痾完篤尿唔見咗人.........桃花?」
「係呀!一篤尿時間同你買咗棵桃花!」我

「你響邊度買架?等等,依棵咪係頭先棵桃花?」噹噹竟然認得
「唔!個老板終於都面對現實斬開佢嚟賣啦,如果唔係你太寸我諗佢一早賣咗比你喇!」
「點都好啦最緊要買到,幾多錢呀?」噹噹

「$188!」
「咁平?」
「係呀!依d嘢不嬲都係海鮮價架啦,棵桃花我送比你啦!」我

「唔得!數還數而且桃花要自己買先至靈架!」噹噹
「靈?」我
「嗱!188唔洗找!」

雖然噹噹比$188我,但其實我先至係依棵桃花嘅大股東,某方面嚟講我係送咗棵桃花比噹噹,估唔到我
第一次送花比女仔係送桃花!

「終於買到啦!」笑得好甜
雖然688得半棵好似貴咗D,不過見到噹噹咁開心乜都值得!

「好啦,我同你返咗屋企先!」我
「唔係去旺角唱K咩?」噹噹
「你攞住咁大棵花點去呀?返咗屋企先啦!」我

「唔得!老細話買完桃花一定要兜個圈(佢幾時聽到架?),而且我想比阿嘉佢哋睇吓我棵桃花!」噹噹
女仔係咪個個都係咁架?買咗d靚嘢都要第一時間炫耀一番!

「咁我幫你攞喇!」我
「唔得!我自己攞!」
「棵桃花仲大個你呀,我淨係見到棵花都望唔到你,你睇唔睇到前面條路呀?」

「你當我盲架?梗係睇到!」噹噹
「我都係幫你拎喇,你好似好辛苦咁!」
「唔好咁長氣啦我大力過你呀!」噹噹

「一人攞一陣喇!」
「你好長氣呀!」



「哎哋!」左搖右擺

佢得唔得架?響去旺角嘅路途上我哋冇講過嘢,噹噹淨係笑微微顧住望棵桃花,而我就全程望住噹噹!
好得意好可愛,就好似一個三四歲嘅小妹妹買到心愛玩具,就算大人話幫佢拎佢死都唔制,一定要自己拎
返屋企,望住佢滿足嘅表情連我都覺得滿足!

嚴格嚟講棵桃花係我同噹噹夾錢買,依家我哋算唔算一齊行緊桃花運呢?







 
已有 0 人追稿