[校園][應該純愛][友情]「我想要你，仲有你既世界。」: 刺痛

有人話過，屋企人係最好既傾訴對象。 

而家既我，或者應該搵人傾下？ 

我返到屋企樓下，望上去。 

適當時候就應該要依靠下其他人。 

正當我踏前一步，準備入大廈個陣，有人叫住左我。 



「魯路修？」 

邊個呀？我已經好煩啦。 

我回頭一睇，原來係林穎欣。 

我：「咩事呀。」 

林：「無，估唔到會係呢度見到你啫。」 



我：「我住呢度。」 

林：「我都係喎。」 

我望清楚佢，佢一身白Tee短褲加拖鞋，果然係街坊。 

我：「哦？係咩？冇野既我走先。」 

林：「可唔可以傾兩句？」 



我其實想拒絕佢，但諗到佢或者可以做我既傾訴對象，我就有興趣傾。 

我：「你介唔介意等一陣，我想上去換件衫先。」 

林：「好，十五分鐘後羅馬廣場等。」 

我倆就此暫別。 

返上屋企，家姐未返，我將行裝扔哂入房再換走套校服。 

洗左個臉，個腦總算冇咁緊。 

望望隻錶，5:30 PM，係時候出門口了。 

我無特別裝扮，因為根本無必要。 



我行到羅馬廣場，佢坐係中央，身邊有兩支野飲。 

我行過去，佢拋左支野飲比我。 

林：「坐低慢慢傾啦。」 

咁既開場白，反而令我有所戒備。 

但係我都係選擇左坐低係佢旁邊。 

我：「有咩想同我講。」 

林：「估唔到你住呢到喎，平時冇撞過你既。」 



無聊既開場白。 

我：「唔岩時間咪撞唔到，冇乜野我走先。」 

林：「你好趕時間咩？」 

我：「我只係唔想哂任何時間係無謂既問候上。」 

我轉身準備走，但卻因為佢一句說話停低。 

「同Cherry一齊，係咪好冇安全感？」 

呢句說話，深深咁刺入我心。 

不知不覺間，我開始怒視住佢。