我返到屋企,發現佢兩個都坐左係度,好似係度等我返黎咁。 

氣氛好尷尬,大家都無講野。 

我當然唔想負責開口講野啦,畢竟頭先我發咁大脾氣,而家開口好柒架嘛。 

唔知Cherry係咪睇穿左我諗乜定受夠deadair,佢開口打破左個僵局。 

Cherry:「你返黎嗱..」 





我:「嗯。」 

我故作鎮定,其實內心好複雜。 

佢個欲言欲止個樣令我確信岩岩Ada講既野係真。 

我要問。 

我:「你應該有野想同我講?」 





Cherry:「係。」 

我:「咁就講出黎啦,今次我唔會再走左去,我會聽哂你講野。」 

今次會聽完佢講,一定會。 

Cherry:「其實…去外國讀書呢件事,係我F4下學期已經決定左。」 

F4下學期?上年已經決定左但係今年先去? 





我:「但係點解今年先去?今年先去應該會好辛苦喎。」 

Cherry:「原本就係上年過去既,不過我覺得自己有件事未做,所以我就叫屋企人俾多一年我,呢件事晨哥都知。」 

我:「仲有野未做?」

Cherry:「無錯,我仲有件事無論點都想做左先走,就係同你講,我好鐘意你。」 


Cherry:「就算明知只有一年都好,我都想可以同你一齊,所以我上年九月就決定左要同你講,盡量珍惜可以同你一齊既時間。」 

我一時之間講唔到野。 

佢總係咁直接,唔會轉彎抺角,一講就入正題。 

所有事突然好似一連串爆炸咁重現係我腦海。 





晨哥以前講過,Cherry係一個唔應該存在既人。 

佢用咁既方式黎講,令我起初以為Cherry有咩病之類。 

原來係解做Cherry其實應該已經去左外國,唔應該仲係香港。 

而Dennis講既所謂美夢,原來係指呢一年我地一齊其實都只係一場夢,睇死我地唔會有咩結果。 

呃… 

我承認,係聽到Cherry佢咁講之後我又動搖了。 

佢呢一句野猶如一個震撼彈咁打係我身上。 





Cherry:「雖然時間好短,不過我呢段時間真係過得好開心,多謝你,我無憾啦。」 

佢講到好似想而家就走咁。 

Cherry:「我明白而家既你可能會好嬲我,甚至唔想見到我,我完全可以理解到,我唔會奢求你原諒。」 

我一早已經無嬲你啦。 

我呢份人就係咁,情緒可以好大波動,變化可以好大而且好快。 

但我可以點話比佢知?直接講我又做唔到。 

我:「我可以原諒你,但你要應承我兩件事。」 

我自知自己無乜可能改變局面,但至少我想反抗一下。 





Cherry:「唔?」 

我:「一,剩低既日子,你要搬黎同我住,我要日日都見到你。」 

Cherry:「lulu… 」 

我:「二,請你唔好忘記我同呢段日子。」 

呢兩個要求,完全係發自我內心。 

我無辦法確保佢呢五年唔會鐘意其他人,我亦唔想用結婚之類既野縳住佢。 

所以我想係剩低既呢段時間日日對住佢,咁樣我就夠了。 





至少呢一刻我係咁諗。 

我:「我諗呢五年我地唔會見面。」 

無錯,我怕若然呢五年內我同佢見面,會令我更唔捨得佢。 

Cherry:「無問題,我應承你。」 

區區七個字居然可以令人如此安心,難以置信。 

我緊緊咁攬住佢,佢亦攬住我。 

我感覺到自己流左一滴眼淚。