[校園][應該純愛][友情]「我想要你，仲有你既世界。」: 很普通

同居既生活其實都無乜特別，只係每朝起身牙都未刷就已經可以見到對方。 

我諗應該會係咁。 

星期一一早我就被一浸好香既氣味整醒左，我靈敏既嗅覺話我知係炒蛋既氣味。 

真係好羡慕隔離屋有早餐食，我朝朝都無早餐食架。 

咦？咪住先，陣味係係我屋企傳出黎架喎！？ 



唔通有大家樂早餐食？ 

我即刻九秒九起左身，衝左出廳睇下有無早餐食，仲差少少仆街。 

一出到去，令我大失所望，檯面無早餐係度。 

屌，都係唔好太多幻想啦，換衫返學啦。 

但係果陣香味仍然殘留係屋企喎，好似係廚房傳出黎。 



出於好奇，我一邊換校服一邊行去廚房。 

一行到去廚房門口，我就見到Cherry捧住兩碟野，我仲差少少撞到佢。 

我好快咁望左果兩碟野一眼，上面有炒蛋，火腿，多士，多士仲要飛左邊。 

哇，全部都係我鐘意食既野喎。 

Cherry：「起左身嗱？你食先啦我去換校服。」 



佢放低左兩碟野係餐檯，之後就行左入客房，呀唔係，而家果間係佢間房。 

得番我一個係廳，onon99咁望住兩碟早餐。 

我係咪發緊夢？佢煮早餐比我食？佢用左五分鐘左右就換好校服行出黎。 

Cherry：「做咩唔食？唔岩你胃口？ 」 

梗係唔係啦，對正我胃口添。 

我：「岩食呀，想等埋你啫，但點解你要咁辛苦咁早起身煮早餐？」 

我拎起塊飛左邊既多士放入口。 

Cherry：「咁做好普通啫，無理由住係人地度但又乜都唔做架，點都要做少少野架。」 



唔，態度正確，呢個女仔娶得過。 

娶得過.呀..？ 

個心突然又痛左一痛。 

算啦唔好諗埋D唔開心既野，而家專心食左個早餐先。 

我用中學五年食lunch訓練返黎既速度，三爬兩撥就食哂個早餐。 

反觀Cherry佢就好優雅，用哂刀叉咁，成個畫面好靚，我忍唔住偷偷影低佢set做wallpaper。 

食完放左D碟係廚房之後我地就返學。 



明明平時都已經同佢一齊返學，但唔知點解今日感覺特別唔同，成個人都好high。 

我甚至懶理其他人目光，拖住佢入學校。 

我而家成個腦入面都係佢，幾乎其他人講乜我都聽唔到。 

「喂魯路修！唔好再發夢！」 

晨哥用本聖經一下打落我個頭度，痛覺令我暫時回歸現實，Thanks GOD。 

我：「痛架！」 

晨哥：「鬼叫你唔聽我講野咩，點呀舞會有無興趣吖。」 

我：「武會？好地地做乜要開天下第一武道會？」 



晨哥：「on9，估到你會咁講，我講多次啦，之前su搞個聯校sing con取消左，轉左舞會吖。」 

哦，原來係咁，我好耐無跟呢單野所以完全唔知最新情況。 

我：「妖，你知我無suit架，而且舞會咁麻煩，咪搞我。」 

晨哥：「低能，向校方申請就寫舞會啫，咪又係party大家一齊顛，只限中五添吖。」 

就算你咁講我都係無興趣喎.. 

我：「哦，我考慮下啦咁。」 

晨哥：「你on9架仲考慮，帶埋芷睛去留多D回憶嘛，你地又唔係唔知自己仲有幾多時間..」 



晨哥講呢句野時候特別細聲，好似唔想俾人聽到咁。 

講起上黎，Cherry叫我唔好將佢要走同我地一齊住既事話俾人知，佢唔想太多人知。 

不過點解晨哥會知？屌，肯定又係因為佢係晨哥。 

我：「咁我問下佢啦。」 

晨哥講得都岩既，盡量留多d回憶先係正確既做法。 

雖然並非我本意，但只限一次既話就無乜所謂啦。