[校園][應該純愛][友情]「我想要你，仲有你既世界。」: 真麻煩

放學後我去接Cherry走，因為我同佢都唔洗補課。 

Cherry：「我地而家直接返屋企？」 

我：「唔係既你想去邊？」 

Cherry：「無，問下啫，走啦我地。」 

一齊返學就試得多，但一齊返屋企又好似無乜幾可。 



我：「我地好似無試過一齊返屋企？每次唔係送到你屋企樓下就係地鐵站。」 

Cherry：「好似又係呀可，唔緊要啦而家日日都可以一齊返啦。點呀今晚食乜好？」 

我：「唔知啊…等美星話事啦我想返去訓陣先.. 」 

Cherry：「訓？你做好哂功課啦？」 

我：「做哂啦，呀，話時話，你有無興趣去聯校舞會？晨哥今日問我。」 



Cherry：「舞會？我地學校會搞呢d野架咩？你想去我咪陪你去囉~ 」 

哇，講到我好恨去咁既，不過學晨哥話齋，留多d回憶嘛，就去啦。 

返到屋企我就即刻除低鞋同套校服，跳上張床大覺訓。 

我唔知我訓左幾耐，不過我一訓醒望出窗見到個天已經黑哂，我諗起碼訓左兩個鐘。 

不過點解間房咁光既？我又無開燈。 



我擰轉身一望，發現Cherry戴住副眼鏡坐左係我電腦前面用緊電腦。 

仆街啦今次，佢會唔會睇到… 

唉原來一齊住都有野麻煩。

我：「你係我房做乜..？」 

Cherry：「咦你醒嗱，無啊我想查少少野咪用你部腦囉。」 

査少少野？唔通查我口味？ 

我開始諗辦法令佢遠離我部電腦。 

Cherry：「我岩岩查完啦，你部腦好似壞壞地。 」 



我：「壞？咩事？ 」 

唔好嚇我呀，電腦係我第二生命黎架！ 

Cherry：「無呀見你harddisk咁少位咪想睇你儲左d乜囉，點知有成40gb唔見左，係咪中左毒？ 」 

40gb？係喎！上次開p我以防萬一將裝住所有珍藏既資料夾hide左架！ 

屌！我真醒目！ 

我：「唉可能係啦 ，算啦唔好理啦，我肚餓呀今晚食乜？ 」 

Cherry：「Pizza呀為食豬！家姐買緊返黎啦。」 



呼，總算轉移到話題。 

佢企左起身開房燈，令我可以清楚睇到佢戴眼鏡個樣，好靚。 

我：「點解你戴眼鏡既？」 

Cherry：「唔？哦，我見家姐檯面有副無鏡片既眼鏡咪拎黎戴下囉，靚唔靚？」 

靚，戴唔戴都靚架啦。 

我：「ok la。 」 

唔想成日讚佢，怕讚壞佢。 

之後無耐美星帶左pizza返黎，作為三個人既晚餐，岩岩好，食完沖完涼打陣機我都去訓，Cherry就一直陪住美星，無乜理我。 



就係咁，好麻煩又危機四伏既同居生活過左兩日。