[校園][應該純愛][友情]「我想要你，仲有你既世界。」: 太放肆
呀，唔記得同大家講，今個週會比較特別，無老師監場，得堆TA係度。
因為堆老師去哂開會，所以今個週會比較FREE，不過大家都唔係話好嘈。
我眼見大家都好專心望住台上，可能因為有晨哥係度掛。
晨哥個朵係班籃之後更響，連D Form1仔都識佢。
我估大家都好期待晨哥講野，畢竟係傳說級人物。
係兩位通識TA既引領下，好快就進入左分享環節，十個人入面要搵兩個人出去。
TA話不如一男一女，所以我就確保左自己唔洗出去講，因為晨哥一定唔會辜負大家期望出去講。
至於女仔果邊…應該係Cherry架啦。
果然，晨哥接過支咪，睇黎佢已經準備好發表佢既偉論啦。
台下見狀隨即傳黎陣陣既掌聲歡迎，屌好提子。
好啦…我要點做先唔俾人發現我訓覺呢…
晨哥講左D乜我就唔多講，因為我都無乜點細心聽。
大概都係話自己識到好多新朋友，見到好多係香港見唔到既野，擴闊左自己眼界咁。
其實都係D行貨，但唔知點解D人咁受落，拍哂手掌咁。
可能個原理同D泡菜oppa好似光洙個種講句I Love Hong Kong就令班女尖叫一樣啦。
講到尾，靚仔玩哂，這就是現實。
雖然我唔係話憎晨哥，但我真係對學校呢個以貌取人既小型社會死心。
我睇到既係，靚仔hea做都有好多人歡呼，但毒撚做得幾好都無人會理。
「可能出到真正既社會就唔係咁。」
我只可以咁樣安慰自己。
好啦而家輪到Cherry講啦，打醒十二分精神聽先。
出奇地，台下突然靜哂，好似所有人都等待緊佢咁。
Cherry：「好似頭先藍同學講既咁，今次呢個trip我都獲益良多，見到好多唔同既野，好似水壩咁，平時係香港我根本無機會入去參觀…」
嘩，呢個直頭係演說級既分享啦，佢未講完我已經想拍手啦。
「我地參觀左水壩，親眼睇到水力發電既過程，呢d野係書上面係睇唔到，亦令我feel到香港係可再生能源既發展並未夠，需要加大力度。」
唔，講得好，活學活用。
「另外，我印象好深刻既係我地去左個圖書館。」
圖書館呀…我係呢個圖書館幾乎出事。
正確d講係出左事，只係好彩救得番。
「我地去既圖書館好大，有成十五層，仲高過香港既中央圖書館，每層都係唔同種類既書。」
「我想講既係，國內一個城市都有一個咁具規模既圖書館推動閱讀，但我地香港呢個國際大都會反而好似忽略左䦧讀，真係好值得反思。」
嘩下下拮到入肉喎。
「另外，我留意到人地好多地方都有做綠化，令成個城市都好靚，就連圖書館都有空中花園。」
「我知香港都有做緊，但比我既感覺真係為起而起，出到黎完全唔靚，咁又有乜意思？」
「最後我想講既係，呢個trip令我覺得香港可以做得更好，政府要俾多d心機去做，而唔係一味跟住大陸後面，多謝大家。」
嘩，呢個收尾掂呀！
不出我所料，全場拍爛手掌，d聲甚至響過頭先晨哥個陣。
晨哥：「芷晴講得好好喎。」
我：「洗乜講，我女朋友黎架。」
我不禁沾沾自喜。
掌聲過後，就準備進入最緊張刺激既問答環節。
聽完頭先Cherry既演說，我完全諗唔到台下班契弟會問D乜。
班TA開始拎住支咪落台下睇下有無人想問下野，反應都幾湧躍。
大家都問D圍繞返個trip既問題，例如問覺得香港做唔做到水力發電之類。
仲有人問我地覺唔覺而家大陸係咪已經好過香港，嘩聽到我幾唔高興。
不過總有會有d契弟會帶你離題，上高登睇人講考DSE Oral都有唔少呢d仆街。
「聽講你地同其他學校既人鬥波喎，我想問係咪真架？」
唉又係呢件事。
晨哥望住我，個眼神好似同我講：「我唔想答，你幫我答啦。
」 唔通我就係為左呢d時候先出現於此？
我接左支咪，諗左兩秒應該點答好。
佢咁問得應該都大概知道件事啦，即係代表我唔可以否認啦。
而佢既問題只係問係咪真，咁即係話我只需要答佢一句就夠啦。
唔，我真聰明。
我：「唔，件事係真既同學，多謝你既發問，不過我希望可以問返d貼近個trip既問題，以你既才智應該明我講乜。」
有必要阻止呢d無聊問題。
但非常可惜，呢d無聊問題係會猶如病毒般擴散開去，一發不可收拾咁。
「場波打成點？」
「因乜事會無啦啦打波既？」
「聽講輸左有懲罰喎，係咩懲罰？」
班垃圾TA聽到呢D問題都知唔正路，用手勢示意我地唔洗答。
但疫情早已不受控制，大家繼續問，甚至開始有人屌做乜唔答。
直至一條問題出現左。
「我睇Sercet話今個trip我地學校有個女仔被人強吻wor，係咪真架？」
呢句野就好似史瓦妮招大咁，凍結左全場。
大家都開始議論紛紛，我偷望左若睛一下，成個人down哂。
晨哥就無乜反應，繼續玩手指，睇黎無諗住插手。
咁即係話我要靠自己？
但為左朋友，我無得再避，再麻煩既野都要做。
之前呢件事我處理得唔好已經令若晴唔開心左一排，我唔可以犯同一個錯 TWICE。
我叫人遞支咪俾我，仲深呼吸左一下。
「你班友唔好太放肆，而家唔係咩藝人既記招，我亦無必要滿足你地既八卦好奇心。
」 全場人再次陷入一片寧靜，對我係一個大好機會。
我要連技。
「你地講野之前有無用腦？無諗過講出口會有咩後果？」
無錯，我係最有資格講呢句野既人，因為我已經試過講錯野無數次。
我決定要用地圖炮結束呢埸鬧劇。
「我同所有頭先無答你地問題既人講，可以係呢種場合問呢種問題，你地質素好極有限，太令我失望。」
呢個時候轉堂聲響起，代表週會係時候結束。
呢下鐘聲令我意識到，我好似突然吸引左好多仇恨值。
但我唔後悔，反而仲有少少開心。 因為我終於有勇氣去保護想保護既野。
唔知我幾時有足夠既勇氣向Cherry佢講出果三個字呢…