[校園][應該純愛][友情]「我想要你，仲有你既世界。」: 消失了

係佢屋企坐多左一陣我先勉強平伏到心情。 

我地之後無去邊度行街，而係直接返去。 

佢好似執左一袋野走，但入面既係咩我並無留意。 

應該話，我無餘力留意。 

我而家成個腦實哂，咩都唔想諗。 



明明已經淡忘左既事，突然被自己無心咁挖返出黎，感覺超唔好受。 

返到屋企，我將自己收埋係房，咩人都唔想見，電腦都無開。 

訓上張床，小學既事就不斷湧上黎，好似一個黑洞咁吸我入去。 

無人會估到，尋日仲一齊玩緊既朋友，今日就已經見唔到。 

明明講好「聽日見」，但就再見唔到。 



留低既，只有對佢既印象，同一本佢借比我既漫畫。 

朱雀佢係六年級果陣既一日突然消失左。 

起初大家都以為佢只係病左，過兩日就會出現返。 

但兩日過去，四日過去，一星期都過左去，大家都無見到佢。 

大家開始搵佢，用當時大流行既MSN，Yahoo Blog去搵佢，但都無回音。 



對於佢地黎講，一個同學唔見左。 

但對我黎講，係一個最好既朋友突然唔見左。 

朱雀係小學六年都同我一班，好自然，我地特別friend。 

有時候我老豆老母出左trip，得番我同美星，我地就會去朱雀屋企住兩三日。 

我甚至已經當左朱雀係我既親兄弟，每日都一齊玩，無所不談。 

一齊去買魚仔餅食，去公園玩，爬下學校後山，好多好多回憶。 

最後一次見佢，係係個公園，我地玩到太陽落山先走。 

之後就無再見過佢。 



後來Miss話我地知朱雀佢移左民，我先知道佢永遠消失左。 

我當時唔開心左好耐，身為兄弟，移民咁大件事都唔同我講，真係會傷心。 

當時我甚至懷疑過自己係Gay，但後來我發現咁代表我係好珍惜，好緊張朱雀呢個朋友，先會咁唔開心。 

所以我上到中學都唔敢太交個心出黎，總會留返少少秘密比自己。 

因為我怕類似既事會再發生。 

但原來，我漸漸咁變返小學果時咁，交哂個心出黎。 

唔知上天係咪想提醒我，佢再次安排左類似既事發生係我身上等我知道我變舊時咁。 



今次既對象，係Cherry。 

不過今次有少少唔同，Cherry同左我講佢會走，而且會返黎，五年後。 

但我一諗起朱雀既事就有種好強烈既意識唔想俾佢走。 

因為我怕最後Cherry會同朱雀一樣，永遠唔會返黎我既世界，永遠消失係我既世界。