以下係Cherry視角,請注意 

今日心情起伏真係好大。 


原先我係打算返去屋企執定套衫俾佢去ball個陣著。 

嗯,其實我一早已經幫佢買左套suit,因為我知道佢唔鐘意著suit,所以一定唔會有suit。 

但我真係好想睇佢著suit既樣,一次都好,一次就夠。 





我偷偷地係聖誕節左右買左,唔俾佢知。 

原本我只係諗住臨走前叫佢著一次俾我睇,陪我影張相就夠。 

但估唔到佢突然問我去唔去ball,令呢套suit可以派上用場。 

果時我口講就話佢去我就陪佢去,其實我個心興奮到不得了。 

執呢套suit果陣,我已經係度幻想緊佢著起黎果個樣。 





一定會好型,至少係我眼中會好型。 

我甚至無留意到佢係等我果陣係我屋企做乜。 

直至佢突然開聲問我檯頭張相係幾時影,我先知佢原來入左我房。 

我房入面有好多張我同佢既所謂「合照」,其實都係我專登搵人咁影,令我可以同佢出現係同一張相。 

檯頭張相係我小學同學去迪士尼影既,但佢竟然話我知原來佢都係張相入面。 





原來佢一早已經出現過係我既世界入面。 

原來我地係小學六年級果陣已經相遇過。 

我即時諗起外國果對情侶,成件事都好浪漫。 

我開心左一瞬間,但佢突然開始喊,嚇親我。 

我開頭以為佢只係開心到喊。 

直至佢講左呢句。 

「唔好走,留係我身邊,我唔想又得番自己一個… 」 

佢又諗起我地只係得番好少時間… 





係知道左我地原來咁有緣之後,我真係有一瞬間想講「我唔走啦。」 

但我真係無咁既勇氣去挑戰現實。 

我真係覺得命運係度玩弄緊我地兩個。 

明明咁有緣,仲要大家都需要對方,但又偏偏不得不因為現實而被迫分開。 

我開始後悔最初唔係同Daddy佢講「我唔去」,而係講左「一年後去。」 

一諗到呢度,我就好嬲自己點解咁蠢。 

但儘管如此,我仍然去安慰佢,嘗試令佢安心唔再喊。 





我選擇左輕輕咁摸下佢個頭,希望佢冷靜下來。 

我:「我係度啊,而家我邊度都唔會去。」 

我都唔想你得番自己一個… 

原本好開心好激動既心情,係短短一句話之後一瞬間跌到落谷底。

係返屋企既途中,佢一句說話都無講。 


佢只係一直係度擔天望地,完全唔知佢想點。 

最令我擔心既係佢對眼,佢既眼神好空洞,無哂神釆。 

直覺話我知,佢唔止擔心緊我地既事,可能甚至無在意我地既事。 





應該有另一件事令佢突然變成咁。 

原本開朗傻傻地既lulu,係睇左我屋企既相之後就變到一言不發,我好驚。 

我原先打算返到去就好好同佢傾下,睇下佢發生咩事。但佢一返去就困自己係房。 

我起初無去騷擾佢,由佢一個人靜下。 

我一直坐係廳,望住佢房門,希望佢儘快開門出返黎。 

但我等左好耐佢都無出黎,房入面無任何聲,我以為佢已經訓著左,所以偷偷地打開佢房門睇下佢。 

一入去就見到佢大字形咁訓係張床度。 





我問佢有無事,佢無答我,只係張開返對眼等我知道佢無訓。 

我想睇清楚佢,所以我開左房燈,發現佢對眼紅哂,眼角仲有涙痕。 

我:「你又喊..?」 

其實我自己都覺得問黎多餘,明明已經咁明顯,但我一時之間真係諗唔到要講乜。 

佢聽到我咁講就摸下佢自己塊面,之後就掩住塊面開始傻笑。 

係我眼中,佢而家好似一個斷左缐既扯缐公仔。 

我個心好痛,我唔想佢咁。 

我一定要拉返佢起身,就好似以前咁。 

所以我打左佢一巴。 

唔知因為我呢一巴定係其他野,佢好似成個人醒哂。 

佢話自己已經無事,仲話要同我解釋點解佢今日會咁。

原來係咁。 


佢一五一十咁話哂我知。 

原來係因為張相入面有佢一個已經見唔到,對佢好重要既朋友,勾起左佢既回憶。 

朱雀既不辭而別,令佢大受打撃,久久未能平復。 

呢張相加上我地即將分別既事,兩者係佢心入面加埋,令佢一下就崩潰,開始不停咁喊。 

佢同我講,即使去到今日,仍然未有一個人可以取代到呢個「朱雀」。 

老實講,我聽完心情有少少複雜。 

我一方面好開心我眼前呢個男仔咁重情重義,竟然會為一個朋友唔開心到呢個地步。 

另一方面,我又有少少妒忌呢個「朱雀」,佢竟然可以係魯路修心入面佔一個咁既席位。 

直至我聽到呢句說話。 

「對於我黎講,你就係另一個佢,另一個可以令我無保留付出既人。」 

原來我都同朱雀一樣,係佢最重要既人。 

妒忌一瞬間就灰飛煙滅,佢成日都係d關鍵時刻講d好觸動到我既説話。 

我默默咁望住睇漫畫既佢,其實我又何嘗唔係呢..? 

我仲有一句說話一直都好想同你講,但怕講左出黎,大家都會係一瞬間崩潰。 

所以我諗都係唔講出黎,由得呢句說話留係我心入面啦。 

取而代之既係,我選擇左緊緊咁抱住佢。 

「我果然無揀錯人,魯路修,你都係我唯一一個可以令我無保留付出既人啊。」 

我同佢,仲有兩個幾月時間。