[校園][應該純愛][友情]「我想要你，仲有你既世界。」: 是我的
仆街，點解佢會係呢度？
我著住套校服係人地學校度跑，令我突然變得好惹人注目，不過我唔理。
佢好似俾仔圍，我唔容許呢d事發生。
我唔可以再比呢d野發生！佢係我既！
我好似失去左理智，一味向住門口衝。
我望到人地D老師好似想叫停我，但好似因為我套校服而卻步。
我好快就衝到學校門口，真係腳都跛。
佢見到我喘哂氣咁跑出黎，個樣好似有d驚訝。
但佢好快就用個一如既往既招牌笑容望住我。
Cherry：「行得嗱？
」 一聽到佢咁講，係佢旁邊既男仔即刻望住我，個表情完全係「唔撚係掛」。
我要冷靜，要表現得自然d去處理。
我深呼吸左一下，等自己調整下呼吸先。
我：「嗯，要你等添，行啦我地。」
我一隻手插袋，另一隻手搭佢膊頭，準備速速離開此地。
我以為咁就可以解決，但係我錯了。
「喂！咪走住！
」 FUCK MY LIFE。
我擰轉身，望下係咩人叫住我。
係一個偽毒，著住子琪學校既校服。
點解話佢係偽毒？因為佢俾我既feel係MK仔扮毒撚囉。
肯定成日扮毒撚去溝女個D人黎，我好憎呢種人，呸。
我：「有何貴幹？」
我繃緊身體每一寸神經，因為而家係有人嘗試侵犯我主權。
偽毒：「你唔見我同呢位小姐傾緊計？你咩意思？」
哇屌，乜撚野對白黎架，好out呀。
搞到我都唔知點應佢好了。
我：「哦。
」 我真係諗唔到點應佢，唯有「哦」一聲就算。
Cherry全程都無出聲，企係我旁邊。
我又再次擰轉身準備走。
「我叫你企係度呀！
」 佢好大力咁拍落我膊頭度。
OKAY，你做錯事了。
「不知者不罪」呢條規則今日並不適用。
我鬆開搭住Cherry既手，緊緊咁捉住果隻放係我膊頭既手，一下fing甩佢。
我：「無人可以搭我膊頭。
」 一直積存下來既壓力，都係時候要釋放了。
老實講，我打交唔叻，甚至可以話零，但力我都叫做有少少既。
加上，佢地班人見到我搭住Cherry已經知道無行，走哂咁濟，得番呢個偽毐。
人數上大家打和，但地理上我有優勢。
呢度係佢學校門口，諒佢都唔敢亂黎。
亦即係話，最後可能連打都唔會打。
所以話做人有腦幾好，勝利一定係屬於我既。
偽毒：「關我撚事？我係鐘意搭呀。
」 唔？
佢突然向我揮拳。
好彩以前晨哥佢地用波訓練過我既反應力，令我可以簡單避開。
不過我都有少少surprise佢居然真係夠膽郁手。
我望下周圍，開始有人對我地指手劃腳。
嗯，都可以了，條件已經齊集。
我：「單細胞生物真係容易理解，果然咩都鐘意用武力解決。
」 再挑釁下佢就應該夠了。
我：「講埋俾你聽啦，呢位小姐係我女朋友，所以我帶佢走根本唔洗理你係咪同緊佢講野。」
我見佢咬牙切齒咁，好似想食左我咁。
我：「加上，佢好似無理你？單方面既講話根本唔可以構成「傾計」，最多只可以叫撩人，人地隨時走都可以。」
搞掂，咁應該可以啦。
偽毒：「收聲呀！」
嗯，如我所料惱羞成怒呢。
但我有少少始料未及既係，佢會推我埋牆，仲準備再揮拳。
仆街啦，一埋牆可以避既空間都會少左好多，今鋪可能要硬食佢一拳。
我見Cherry係旁邊，個樣好不知所措咁，突然好似幫我加滿油咁，一下踢走哂我心入面既不安同恐懼。
無錯，係踢走，因為我起左腳。
我係佢臨出拳個下踏左下牆，用膝頭哥撞佢個肚。
原先無故意瞄準，但我唔想拆人祠堂所以先遞高少少隻腳撞佢。
其實，諗落我都幾好人吖。
撞完佢個肚之後，我就用右手㩒住佢塊臉，一下推開佢，行番去Cherry身邊。
出奇地，我明明無郁手，但我有種好舒暢，好似如釋重負既感覺。
呀，要用比喻既話，就好似打完飛機果下咁。
一時分神，我無留意到佢已經企左起身，又準備打我。
今次真係走唔甩，唔通我要係Cherry面前俾人打？
「啪！」
一個橙色波係我眼前經過，打中個偽毒隻手，令佢停低左。
晨哥：「到此為止，如果唔係既，下次就唔係掟手，而係掟頭。
」 晨哥拎住個籃球同子琪一齊行出門口。
佢兩個震懾全場，觀眾都開始四散。
呼，安全了，晨哥果然係最好既。
我望下Cherry，想同佢講無事啦，但發現佢臉色唔多好，鄒哂眉扁哂嘴咁。
子琪好似識個偽毒，一下打落去佢個頭仲開始起勢咁鬧。
呢份氣勢，不亞於晨哥啊…
除左鬧人之外，佢都有同我仲有Cherry道歉，話係佢地既學生唔啱，叫我地大人有大量，唔好追究。
咁我又無諗住追究既，畢竟多得條友我先咁爽，拋開所有煩惱。
不過睇黎條友都應該無臉見人了。
中二d講，徹底摧毀一個人既感覺真係好爽。
講多兩句之後，我就開始同Cherry踏上歸途。
我：「哇頭先真係好驚險。
」 Cherry：「嗯…」
我：「我差少少就食左一拳，好彩有晨哥。」
Cherry：「魯路修，點解一開頭唔直接走？點解要同佢地糾纏？仲打交…我真係好怕你受傷..
」 哇…我無預計到佢會咁…
不過，我可以答到佢。
我：「因為你係我既，以前係，而家係，將來都會係，我唔會俾任何人騷擾你。
」 我講呢句野果陣係心無旁鶩，完全無考慮其他野。
應該咁講，事到如今仲要考慮d乜？
佢就係我面前，我仲咩好怕？
我：「不如你唔好走，得唔得？」
我再一次問佢。
但佢再一次無答我，只係錫左我一啖。
「傻佬…」
呢個吻，係一個感動既吻。
就算佢既回答係點都好，我都唔會有任何不滿。
因為，我愛佢。