我無即時換上套衫,反而係將套衫收入房。 

我唔想咁快俾佢睇到我著起上黎個樣。 

一黎,我怕自己著上黎唔好睇會令佢失望。 

二黎,我想俾驚喜佢。 

其實諗落係有少少矛盾,若然我著上黎唔好睇,又點比驚喜佢呢? 





為左防止呢件事發生,我決定偷偷地試著一次先,睇下個效果係點。 

咦?出到黎又唔差喎,不過自己始終係第一次著suit,感覺有少少怪,總係覺得唔夠好。 

「幾好睇喎,阿妹眼光真係唔差。」 

屌!!嚇死人咩!!! 

我:「嘩真係比你嚇死,敲門先啦八婆。 」 





美星:「我有敲啊,係你太入神聽唔到啫。 」 

係咩?我真係完全聽唔到。 

我:「咁有何貴幹啊小姐。」 

美星:「差d唔記得,老豆佢地又要返黎啦,今個星期五到。」 

我:「哦。 」 





又返黎?今年返咁密既? 

嘛,無所謂啦,又唔係咩壞事。

之後幾日都唔洗返學,我都同佢留係屋企睇佢打機。 


無錯,係睇佢打機,我無份玩。 

不得不提既係,佢打機個陣果個投入樣真係好過癮,我又影低左。 

好快,就到ball果日。 

Cherry好似前一晚同美星煲唔知咩韓劇煲到三更半夜,成十一點都未起身。 

我就已經梳洗好,準備食少少野就換衫出去。 





點解要咁早出去?因為我係staff囉咁簡單。 

晨哥係早兩日WTS我,叫我三點左右去到子琪學校準備。 

但個ball係六點先開放,七點先正式開始囉好無,早三四個鐘去托柒咩。 

不過晨哥既命令一向都係絕對既,我無反抗。 

晨哥特意提醒我叫我唔好直接著suit去,叫我另外帶去,睇黎係要我搬野。 

啊,感覺好麻煩。 

我先將套suit摺好放入紙袋,再搵左套衫換左去準備出門口,因為原來而家已經幾乎一點半。 





正當我準備出門口個際,美星叫停左我。 

美星:「咁早出去?唔係六點先開始咩? 」 

我:「我要去幫手set場嘛,係啦家姐,我想拜託你幫我做件事。 」 

我唔敢用平時既語氣,怕美星拒絕我。 

美星:「小可喎咁低聲下氣同我講野 ,講啦咩事吖。」 

我:「我想你載Cherry去…我唔想佢著成咁去坐地鐵巴士。 」 

美星:「幾細心喎好細佬,得啦無問題,我應承你。 」 

我:「多謝你,咁我走啦。」 





美星:「喂咪住先,你想就咁出去? 」 

我:「我套suit係袋啊,有乜問題?」 

美星:「唉過黎啦等家姐幫你gel個靚仔頭啦。」 

佢捉左我去餐檯,仲拎左塊鏡同gel野幫我gel頭。 

美星:「搞掂啦,型仔哂!你覺得o唔ok? 」 

嘩,好型,塊鏡就裂。 

我:「唔該哂你,我真係要走啦。」 





美星:「嗯,玩得開心D。」 

佢目送我出門口。 

其實,呢個家姐都幾錫我吖,點解我平時感覺唔到? 

坐左陣車,我又去到子琪學校門口,晨哥佢地已經係度。 

咦?肥豬,Jason,Aaron,師父,十四仲有阿偉同得仔佢地都係度既? 

晨哥:「唷,魯路修,大家都係度等你吖。 」 

呃人咋?大家都去呢個ball?我唔想Cherry俾佢地睇蝕哂喎!

我:「大家都去? 」 

晨哥:「唔,有少少唔岩,大家唔會全部都參加,參加既只有我,你同Jason啫。 」 

我:「咁點解大家都係度? 」 

晨哥:「大家都俾面我黎幫手set場囉,作為報答,大家今晚都可以用「睇場」名義留低。 」 

好明顯係因為咁先會黎幫手啦。 

唉,無呢班咸濕仔收,由佢地啦。 

「喂~跟我入黎啦!我同班校工講左架啦! 」 

哦?把聲係子琪喎。 

大家一聽到咁就開始入去,原來子琪企左係操場。 

子琪:「哇阿晨係好野喎,班到咁多壯丁,咦?魯路修你個頭好型喎,溝死女啦。 」 

俾佢咁講搞到我有少少唔好意思添。 

我地無再留係操場閒聊,直接去禮堂set野。 

哇真係好撚多野搞,又要set堆裝飾,又要搬檯搬櫈,已經拎走左我半條命。 

我都係第一次咁想咒罵人地地方大。 

不經不覺已經搞到五點幾,終於搞掂。 

我大字型訓左係禮堂台上,郁都唔想郁。 

子琪:「魯路修。 」 

我:「唔好再叫我做野啦我唔想郁啦大佬。 」 

子琪:「死懶鬼,同以前一樣,夠鐘換衫啦,阿晨想你去做招待。」 

大鑊,唔記得換衫添!呢個look俾人見到實笑死我! 

我狗衝去拎袋衫入男廁換衫,咁岩見到晨哥佢地都換緊衫。 

晨哥:「哈,慢慢啦仲有時間。」 

我:「屌!又唔叫埋我自私換! 」 

晨哥:「話時話,芷睛有無見過你著呢套suit? 」 

我:「無啊…我無比佢睇過,想比個驚喜佢。 」 

晨哥:「咁我一陣直接帶佢入去,唔好比佢見到你啦。 」 

喂!好喎!點解佢咁醒目? 

我:「好吖唔該你! 」 

我對佢真係好感激。 

我換好衫就坐左係接待處等,無聊揭下個參加者list。 

哇,我學校top class堆女都有份咁濟喎,不過都係得10個左右。 

呸,分明係為溝仔啦。 

六點鬆d,開始有人黎,我學校堆女都到咗,仲要一齊到,肯定約埋一齊黎。 

「嘩魯路修? 」 

「呃人架gel個頭換套衫型左咁多既?」 

「Cherry真係㨂左隻潛力股喎。」 

「唔差得過晨哥喎,我都有少少鐘意左佢。 」 

八婆們,我聽到架。 

晨哥行埋黎話我知佢已經安頓好Cherry,嘩成個人即時放心哂。 

「唔該…」 

我:「係! 你叫咩名?等我幫你mark低你到左。 」 

我開始投入工作,揭名單。 

「林穎欣。」

OH SHIT… 


我抬頭望,真係佢。一身白色連身裙,唔差得過Cherry。 

一時之間我唔識應對,好彩肥豬行左出黎。 

肥豬:「Ada你到咗嗱?我帶你入去。 」 

Ada:「嗯,唔該你。 」 

呼,safe~ 

Ada:「魯路修。」 

佢突然停低叫我,嚇到我個心離一離。 

「你今日幾型,咁著好岩你。 」 

佢無等我答就跟左肥豬入禮堂。 

廢話。梗係啦,套衫Cherry買架,一定型架。 

不過佢呢款高傲既姿態,同以前我對佢既印象一樣,好型。 

希望佢今晚都玩得開心啦。 

就快七點,我望下名單,都幾乎到齊哂。 

好,去大幹一場吧! 

我企起身,雙手推開禮堂既大門行入去搵Cherry。