嗯,呢下推門我覺得好似鳴門打開八卦封印同九喇嘛並肩作戰咁,好型。 

應該會好型。 

問題係,而家禮堂熄哂燈,成個場好暗,要點先搵到Cherry? 

弊啦,我feel到大家開始望住我,今鋪真係瞬間變柒頭。 

唔可以再企係度,要郁先得,點都要郁左先。 





突然間,有人打燈打左落人羣度,正正就係Cherry所在之處。 

咦..?佢唔止著住上次條黑色連身窄身裙喎!仲搭住條白色披肩!! 

條披肩!係我上年聖誕節送比佢果條!! 

佢咁著加上化埋妝,嘩好有貴氣,靚到講唔到野。 

到頭來,被驚喜既係我嗎..? 





我望下燈光控制果邊,有十四同師父係度,佢地對我打出隻手指公。 

多謝你,兄弟。 

我好似得到燈塔既指引咁,慢慢行去Cherry旁邊空左既座位。 

睇黎阿欣同若睛都幫我唔少,力排萬難咁留左個位比我。 

多謝各位,真係好多謝你地。 





我行到去,問佢: 

「小姐,我可以坐呢度嘛? 」 

Cherry:「當然可以,隨便。 」 

我掃掃張櫈,坐左落去。 

「你今日好靚。」 

「你今日好型。」 

我地同一時間講,結果我地都忍唔住笑。 

呢個時候,晨哥同子琪都行左上台。 





晨哥:「要各位久等了,Party即將開始。」 

開始有音樂播出,英文歌,我唔識咩黎。 

子琪:「阿晨啊,你係咪應該要跳第一隻舞,為Party揭開序幕呢? 」 

大家都拍手鼔勵,我都有份拍。 

晨哥:「唔,雖然我都好想咁做,但得一pair人跳好似太單調,不如搵多pair人?」 

佢炒熱氣氛的確有一手,大家都歡呼示好。 

晨哥:「多謝大家!有請燈光幫我地揀多一pair人! 」 





燈光?仆街中伏。 

果然,如我所料,燈光打左落我同Cherry度。 

呀…老子我唔識跳舞架… 

Cherry好似無乜反應,唔通佢識跳? 

晨哥好快就跳左落黎,拖走左係我旁邊既阿欣。 

晨哥:「係你地啦,快d唔好要其他人等啦。」 

唉!仆街頂硬上啦! 

我徐徐企係身,面向Cherry,伸出我既右手。 





「May I?」 

佢咩都無講,只係交左隻手比我。 

好,起舞吧。

老老實實,我而家精神處於極度繃緊既狀態,成個人都好緊張。 

我好怕出醜,因為我真係唔識跳舞,又唔係話禁個Ctrl+3就可以跳到,真係會驚。 

大佬呀,我自己出醜無乜所謂呀,我怕連累到Cherry搞到佢俾人笑咋。 

我每一個動作都好僵硬,十足十d上鍊機械人咁。 





Cherry:「無事架..放鬆D。」 

放鬆?咩黎架?食得架? 

真係架,你同一個好緊張既人講話唔好緊張就好似警察捉賊嗌唔好走一樣。 

係唔會有用。 

唔知佢係咪意識到呢點,佢用行動表示。 

佢好大力捉緊我隻手,大力到我想嗌出聲。 

之前我都有講過,痛楚好有用,可以拉人返現實,今次都唔例外。 

我;「痛..」 

Cherry:「痛就好,而家聽到我講野未?」 

我:「聽到…」 

我地兩個企係禮堂中央交談,情況好似啊媽教仔咁。 

Cherry:「今次,我要你,唔止係你既世界,今次我要埋你既身體,將你既手腳都交比我。」 

呢句說話,真令人懷念,又令我好想笑。 

緊張感一下就無哂,成個人輕到好似一舊棉花咁。 

我深呼吸左一下,將兩隻手都交托比佢。 

既然佢咁有信心,我就相信佢,將所有野交比佢啦。 

音樂徐徐奏起,係一首純音樂,又係我唔識既範疇。 

我既身體好似已經唔屬於我既咁,開始自己郁起黎。 

由始至終,我都係同佢四目交投,完全無理會過d手腳點郁。 

我覺得全場人都係度望住我地兩個。 

我好想有人幫手錄低呢一幕,因為我知道呢片景象一定美如畫。 

我係咁諗,相信佢都係咁諗。 

跳跳下,我既視綫開始糢糊。 

「可能D射燈搞到我出汗掛。」 

我咁同自己講,但其實我好清楚自己發生乜事。 

我係度喊緊。 

我為終於可以同佢跳上一支舞而感動落淚。 

今次係第一次,亦可能係最後一次。 

咦,點解..? 

係糢糊既視野中,我見到佢臉上有閃亮既水珠流過。 

原來係咁,原來你都一樣啊。 

「要好好記住呢一刻啦,知唔知吖?」 

我好細聲咁同佢講。 

直至呢支舞之前,我都無聽到佢把聲。 

音樂停下,我地都停低,換黎既係響遍天既掌聲。 

啊,咁就跳完嗱,好似只係跳左好短時間咁。 

Cherry:「話左架啦,叫你交托一切比我就無事。」 

佢把聲唔同左,好沙啞。 

我咩都無講,只係錫左佢額頭一下就帶佢返位。 

音樂再次響起,今次係比較膨拜激烈既音樂,正好用黎炒熱氣氛。 

大家,都起舞吧。