[毒撚][少甜]點解我會變左做索女架????: 12
點解老竇會咁早起身嫁﹖放假唔係應該學我咁，訓到一、兩點先起身嫁咩﹖失策﹗我淨係帶左件運動bra同 打底褲入黎，最多連埋條毛巾。
觀乎我咁婀娜多姿既體態，就算攬住條毛巾行出去都會出事；配合埋我對腳，除左盲人，無咩人會覺得我唔係女仔。
「邊個係裡面﹗」老竇威嚴既聲線再一次響起。
我趕緊壓低聲線：「啊…我係入面啊…」。
半晌，老竇態度狐疑：「你係入面…﹖」。
「係啊﹗」我呢把聲極之無說服力。
「點解你個衰仔把聲會咁架﹖」老竇異常凶狠。
「…琴晚訓覺凍親所以喉嚨唔舒服﹗」我睇TVB D人都係咁答。
外面又片刻沉默。
「咁…你好快D出黎﹗霸住個廁所咁耐，你估個廁所係你架﹗」。
「吓…我仲未沖完喎…不如你去訓多陣先啦﹗」我結予微弱的建議。
訓多陣，人又懵D﹗視野又蒙D﹗就唔會咁容易識穿我啦﹗
「你好出黎啦下﹗唔好逼我趕你行出黎﹗」。
老竇一腳就踢開左我既建議。
「五分鐘﹗俾多五分鐘我﹗」我作最後的掙扎。
「即—刻—出—黎﹗」老竇怒不可褐。
我挨住道門，心跳得非常急速，呼吸都變得異常劇烈。
唔係掛﹖我岩岩先講完今朝有幾咁美好就有大鑊野﹖我唔要出去啊﹗
「出黎﹗」。
「等陣先啦…真係一陣啊…」聲音變得愈來愈緲小。
阿媽呢﹖佢仲唔出黎禁住老竇既﹖
「好﹗」，「你唔肯出黎丫嗎…」。
鎖匙聲從遠至近傳來。
仆街﹗老竇拎鎖匙開門﹗我手震震地換上胸圍，著上打底褲然後披上毛巾…
不消一刻鐘，大門為我而開；迎面出現既係盛怒既老竇。
我D頭髮仲滴緊水。
「阿…阿媽呢…﹖」出事總係希望有阿媽擋下既。
「佢出左街。」老竇冷冷地回應，極為嚴肅地注視我怪異地披住毛巾。
「…哦…咁我返入房先啦…」捉緊浴巾，急速走過老竇身邊，意欲逃返我既避難所。
「企係度﹗」命令又一次傳達，我僵硬地企係原地，顫抖地緩緩擰頭：「咩…事啊…﹖」。
老竇扭曲著臉，一臉難以接受：「除左條毛巾佢。」但說話卻出奇地冷靜。
「吓…﹖」輪到我一臉難以接受。
「除—左—佢﹗」老竇忽然瞪大雙眼怒吼。
我嚇一跳，然後得啖…然後驚恐地回望老竇，同時向後退：「唔…唔好啦…」。
「係男人就除左佢﹗」語氣仍然充滿憤怒。
「啊…唔好啦老竇…」處於驚恐狀態下，我淨係識咁回應，同時慢慢地向房門後退。
「你唔肯除丫嗎…」老竇突然向前衝，一手就捉住我條毛巾：「除左佢﹗」。
「唔好啊﹗」。
我同老竇你拉我扯，身為女兒身既我當然處於下風；但係我死命保護條毛巾下，老竇既行動都唔順利。
「除左佢﹗」。係持久戰下，我既凈力逐漸用盡，對毛巾既掌控迅速陷入老竇手中。
「唔好啊…」虛弱女聲作最後反抗。
我雙手抱胸，琴瑟坐係地下，恐懼地對望父親既一臉不解。
「你個衰仔…你做過D咩黎啊﹗」老竇難過地搖搖頭，然後恢復咆哮。
「…我無啊…」我可憐地、難過地流下淚水。
「無，你會搞成咁﹗」，「你睇下你而家似咩﹖男人老狗學人戴胸圍﹖除左佢﹗」老竇表情複雜；時而憤怒、時而難過、時而沮喪。
「唔得…唔除得架…」我依舊回復女聲。
老竇搖搖頭：「你到底做過D咩啊﹖而家人唔似人鬼唔似鬼，男唔男女唔女…」。
「你做過D咩啊…」。
老竇一邊搖頭，一邊行去梳化，然後攤坐在上。
「你估我真係咁懵啊﹖唔知你搞邊科﹖」老竇很是難過。
「我第一日返黎就覺得你唔妥；話就話你由細到大都無忽似男人，但有乜理由今次返黎見你變得咁似女人架﹖姐聲姐氣、姐手姐腳。你估壓低把聲就似男人啊﹖」。
我仍然瑟坐在地上。
「行步路、講句野都成個姐仔咁…有次夜晚我經過你房門，聽到你發開口夢…把聲同女人無分別…」，
「我仲以為係自己未訓醒暈暈鄧鄧聽錯…俾我今朝又聽到﹗」。
老竇愈講愈激動。
「見你兩母子都古古怪怪…仲有個胸圍啊﹗我對左你阿媽幾十年，佢鐘意D咩著開咩我會唔知﹖仲有要日日洗咁頻密架咩﹖」。
「係果時，我就肯定你一定有D野。」語氣十分肯定。
老竇將憤怒視線放係我身上，沉默良久。
「你係唔係學人去變性做女人啊﹗」又開始激動。
「唔係啊﹗」我趕緊回應。
「咁你點解會變成咁架…你而家算點啊﹖人妖啊﹖」。
「我…我都唔知啊…淨係知一醒左就…」。
「你仲想呃我﹖」老竇猛然站起，異常激動。
「我話你知﹗我陳家淨係會認返個仔﹗你唔變返以前咁你就以後都唔好叫我做老竇﹗」。
「唔係啊…老竇啊…」聽到父親決絕無情，我瞬即難過地喊起上黎。
「唔好叫我老竇﹗我淨係得一粒仔﹗」。
「唔準喊﹗你睇你丫﹗成個女人咁﹗由細到大都無忽似男人既﹗我究竟做錯D乜野會生著你咁無用啊﹗」。
「真係唔關我事架…」我卷縮起黎哭泣。
估唔到今朝會咁大鑊。
「唔關你事﹖你自己搞成咁同我講唔關你事﹗…起身﹗唔準喊﹗」我既哭泣更加激起老竇既怒意，佢一下的起左我：「唔準喊啊﹗」。
「…我…我…對唔住啊…對唔住啊…對唔住啊…」但我依然控制唔到眼淚，面對怒漢老竇，我個腦只有對唔住。
老竇見我表現得更加軟弱，憤怒黎個昇華；佢捉起我掉落梳化：「我同你講﹗如果你變唔返做男既﹗就呢一世都唔好再叫我做老竇﹗呢一世都唔好再返黎﹗我就當無生過你﹗」講完就怒氣沖沖咁開門走人。
哭泣持續；我反思自己變左做女仔到底做錯d乜野呢﹖呢個會唔會係上天俾我既懲罰﹖懲罰我對小善有非份之想﹖毒撚係唔係要安份守己﹖
我一直都姑負人地既期望，特別係老竇；如果有一個人係心中特別對唔住既，我諗就係佢。
但可惜，我又一次令佢失望，而且今次完全無彎轉。
我掙扎入房換好校服—因為我無咩衫見得人。再將行裝塞入背囊，回望屋企。
散亂既頭髮掩蓋紅腫既雙眼，我茫然地係街上行走；離開左屋企，我仲可以去邊呢﹖
肥輝阿康﹖阿恆﹖表姐﹖…獅兄﹖
睇黎訓街係我最好既選擇。
「唉…」成世人都咁失敗，實在唔能夠唔嘆息一番。
俾老竇趕左出門口，我應用點抉擇呢﹖
真係訓街﹖我vs流浪漢，隨時連隻豬都不保﹗
到底我要點做呢…終於到左唔可以唔承認自己係女仔既一刻…好唔好搵阿媽呢﹖…以阿媽既性格，實同老竇炒大鑊…如果係因為自己唔生性而搞到家變…我個人會更加過意唔去…
點算好呢﹖
原來我漏左帶生活態度出黎。
我企係觀塘街頭，隻手插落空空如也既校褲袋。
「唉…」連著草都帶漏野，實在唔能夠唔嘆息一番。
不經不覺已經8點鐘，我已經坐係m記一角發左好耐吽痘。呢到開24小線，睇黎我可以係度寄居一日。
細細個果陣成日諗，如果自己係早上八點鐘可以咁有性格，坐係m記從容不迫咁同返工返學既蛋散們對望， 而且面露恥笑係幾咁爽既事。而家俾我試一次，我只係想仰天長嘯一句屌你老母。
係悠長既時間裡我整理好思緒，將煩惱既事擺去最後先研究，我決定研究下點消磨時間；其他問題等中午先解決。 於是我轉戰圖書館，我決定暫時融入係哈利凹凸既世界；最起碼…哈利凹凸係死老竇既。
但我發覺，無論我睇到邊都可以聯想起老竇：睇到海格就諗起佢個普通人老竇、睇到馬份就諗起佢個食死人老竇、睇到榮恩就諗起佢個好戰老竇。 老竇充斥腦海，點解鬼佬既老竇咁friendly、而我老竇就咁怒漢呢﹖
因為鬼佬叫daddy，我果個先係叫老竇。
「唉…」。
如果老竇好相遇d，其實問題就好容易解決；或者到時候佢會好歡喜多左個女而唔係失去左個仔。
或者到時候佢會話其實佢一直都想要個女多d而唔係仔。
或者到時候佢會講佢覺得我可以獨自處理女性生活好叻叻豬。
但現實係佢趕左我出門口。
我仲可以點做呢﹖其實番海傍俾mk打係好戇居既；因為mk想同你大戰多過想打你；到時候我可能會生個仔出黎而唔係變返男仔。
做未婚媽媽，我諗老竇會激到爆血管3次。
而且我怕黑又怕痛。
我繼續係圖書館打躉，係呢度我要感謝英國佬留低圖書館俾香港人同我：Thank you very much﹗
Well，我岩岩又諗到；如果自己唔返屋企，阿媽會唔會報警呢﹖
但睇tbb成日話要失蹤48小時先報得警，由今朝計到而家…總之仲有三十幾個小時淨啦﹗
即係我又淨返三十幾個鐘…如果到時候唔返屋企…就會有差人叔叔黎捉我…認後又會見返老竇…跟住佢大鬧差館…有記者黎…上報…
仲會唔會俾變態科學家捉去研究架﹖
手上既哈利凹凸應聲落地，今次仆街鳥；等我仲hea走左咁多時間﹗
我唔要上報唔要做文西啊﹗要點做好呢﹖要點做好呢﹖
如果有一份極具權威既報告…我諗多多少少都說服到老竇掛…﹖
權威報告﹗醫生﹗醫生﹗表姐﹗…我要照去身體檢查﹗然後等表姐俾份report我﹗再返屋企說服老竇﹗ 無錯啦﹗一定可以解決到問題既﹗
係呢一刻，我目光如炬，神情堅毅；話唔定仲可以請埋表姐返屋企幫手說服老竇呢﹗
我個腦淨係諗到呢d解決方法。忽然諗起獅兄；如果我有佢咁古惑聰明就好啦…就算去到咩環境都一副運籌帷幄。
獅兄曾經講過，就算淆底都要保持冷靜同笑容，可以凶一凶對手﹗
如果我頭先仲笑實俾老竇打死。
俾老竇知道我長期俾獅兄非禮，唔知佢又會有咩感受呢﹖又或者獅兄知道我本來係男仔，佢又有咩feeling呢﹖
實嚇到佢瞬間學識縮陽大法。
諗起佢笑都笑唔出個樣；既好笑，又…可惜﹖
乜撚野啊﹖我點會覺得可惜架﹖最近次次有危險發生我就諗起佢…唔會係我脆弱既內心對佢泛起左漣漪啊﹖
唔得﹗打死都唔得﹗就算我承認自己係女仔，都要做同性戀﹗
食完呢碗雲吞面，我就起程去QE做身體檢查。
我唔想將每件事都睇得咁嚴重，但擁有毒撚心態既我難以避免。總言之...我好撚淆底。
雖然我既人生大部分時間都孤身上路，但佛羅多去末日火山都有SAM陪佢啦﹗
我都要做佛羅多﹗我都要有阿SAM陪﹗
結果係我自己一個坐係醫院既輪候區。
我同過D護士姐姐報過表姐既大名，佢地好冷淡咁問我拎身份證登記，然後就叫我埋一邊坐低等嗌名。
OK﹗被人無視我都慣曬；而家最重點係等檢查完果張證明姐﹗最好係雞腸﹗咁就更加拋到老竇一棟都無﹗
其實我都係想返屋企…同唔想俾人打姐…我既願望簡直係卑微。
係輪候緊既無聊時間，除左有部做緊放學ICU既電視發出聲音；同偶然既叫號與醫療機械運作聲外，周邊一片死寂，大家都無神地專注電視，無人交談。
如果而家唔係日頭，我實以為自己撞鬼。
我揹住個毒撚背囊，注意力竟逐逐地被放學ICU吸去...
啊﹗係久違既蔥蔥同巴鳩閉啊﹗嘩…靠﹗巴鳩閉仲講左個極之吸引既爛GAG﹗內容如下：
蔥蔥：巴巴閉，你做乜喊啊﹖
巴鳩閉：嗚…蔥蔥…我頭先見到大象伯伯跌親啊…
蔥蔥：哦﹗原來你因為見到大象伯伯跌親，所以傷心得制﹗你真係有愛心啊巴巴閉﹗
巴鳩閉：唔係啊…岩岩我見到大象伯伯跌親…我笑佢…所以俾佢踩左一腳…而家好痛啊…
蔥蔥：!@#$%^&*
我笑撚左啊﹗
回一回神，電視上出現既係一男一女同班虛偽既小朋友主持人。
點解我會見到蔥蔥同巴鳩閉架﹖
我震左震，再望下周圍一致投向電視既蒼白目光；好撚詭異，蔥蔥同巴鳩閉係邊度出現架﹖
「陳俊樂請去8號房，陳俊樂請去8號房。」叫號及時將處於不安氣氛下既我拉回現實；我整理好行裝同心情，惴惴不安地向8號房進發。
係拉開房門，連把口都準備講表姐你好既瞬間；我發現間房根本無人。電腦枱放置一份文件，係我希望既全雞腸。「Chan Chun Lok…」嗯…睇黎呢份野就係講緊我身體既秘密。
房間大概有課室既一半，由房門直視，左面係有我機密文件既電腦枱，右面係一張床；我諗就係用黎檢查既。
我仲以為我身體突變應該會引起瘋狂科學家既高度關注，所以我份文件亦都要放係類似夾萬咁既物件好好保護添。
睇黎我都係好小事姐…可能年中有唔少人由男變女…又由女變返男…
咁一直以黎我咪係自己嚇自己﹖可能政府仲有個秘密部門專處理呢d問題，我既問題根本唔係問題，我可以好輕鬆咁接受完檢查再拎埋新身份證返屋企﹗
Yeah﹗突然變左樂觀的人令我心情愉快，我面帶笑容地坐係應該屬於我既座位上等表姐到來。
如果我可以好順利咁搞掂曬一切證明我係女仔既事，咁老竇都無得唔認我係女仔啦﹗我有身份證喎﹗我有醫學報告喎﹗
到時佢最多係嬲多陣姐，嬲多陣就唔會再嬲我﹗…應該係掛…﹖
我會唔會又太樂觀呢…
房門忽然打開，再次吸引又一次陷入不安既我既注意力。
「表姐﹗…阿媽…老竇…﹗」
點解佢地會係埋度架﹗
我震驚到無法動彈，身體僵直到好似舊木咁。
阿媽係度都算…點解老竇都黎埋架﹖山長水遠黎到，老竇唔會係按捺唔住怒火，轉登過黎抽我兩野啊﹖ 老竇既面色黑過包公，雙目好似有火咁堀住我，我瞬即DUP低頭，迴避老竇既目光。
「你﹗」，表姐搶係老竇發作前發言：「我諗兩位都清楚今日係黎幫樂樂—即係陳俊樂做一個身體檢查架啦﹖」
老竇聽到表姐用樂樂呢個咁女性化既稱呼，臉色更濃。
我如坐針氈，又似熱鍋上的螞蟻。
「兩位家長都係度，不如首先等我講解下今日身體檢查既流程等大家有個認知。」說罷，表姐微笑望向家長。
阿媽有D緊張地點點頭，而老竇繼續穩如泰山—一座黑色既泰山。
「阿姨你唔駛咁緊張，今日既檢查好簡單既姐；主要係睇下樂樂身體有無其他問題，仲有本人有無咩唔適應。」同阿爸阿媽相比，表姐顯得極輕微自如。
「做左十幾年人，會有咩唔適應啊﹗」老竇既語氣充滿不耐煩。
表姐你一定要禁住老竇，唔好俾佢係度發作啊﹗呢度醫院黎架﹗有咁多人出出入入﹗我呢個秘密緊係愈少人知愈好啦﹗
表姐保持微笑，語氣充滿諒解：「我希望你地接受呢個事實，你地亦唔應該將個責任推係樂樂身上；佢唔係做變性手術。佢生理上既轉變完全係自我轉變，與外界接觸無關。簡單D黎講，係純天然既。
呢樣野連我都唔知喎﹗乜唔係因為班MK咩﹖
老竇臉上有點抽搐，繼續反駁表姐：「佢無做過其他野會搞成咁﹖阿琪你唔好呃我讀得書少咩都唔識喎﹗」。
表姐確係專業﹗面對老竇既步步進逼仍從容不迫：「姨丈，無論你幾唔肯相信呢個係事實都好，樂樂的而且確係進行左第二次性別轉換；正常黎講人係媽媽肚裡面會進行一次，然後就會定形。樂樂呢個CASE非常罕見，甚至係從來未聽聞出現過，我地既團隊都好震驚。」
咩話﹖團隊﹖唔通表姐就係瘋狂科學家﹖
老竇依然堅持立場：「我唔理﹗佢點都要變返黎﹗」
「咁我恐怕你會失望啦。」，「樂樂而家係一個完全既女性，而且具備生育能力—即係可以做媽媽。」
「生…生產能力﹖」老竇驚訝異常。
係啊老竇。
「生仔…﹖個衰仔生到仔…﹖」老竇身體逐漸顫抖起來：「阿琪…你唔好呃我…有咩可能啊﹖…個衰仔係仔黎架﹗」
表姐點點頭：「上次樂樂暈低入左醫院果陣，果陣我地幫佢做左個詳細既身體檢查；發現佢既子宮發育正常，亦有排卵既情況—即係月經。」
「而其他性徵都發育正常，不論樂樂出世時係咩性別；但好肯定，佢而家係女仔。」表姐總結。
表姐終於順利擊敗老竇，令佢擘大口得個窿。
剎那間，成間房都變得鴉雀無聲。
「咁…即係算點啊…我無左個仔啊…﹖」
「姨丈你無左個仔，但係多左個女。」表姐一貫冷靜。
「點…點會咁架﹖個衰仔唔係學人去做變性手術咋咩…﹖應該可以變得返黎架﹗」老竇非常心神恍惚。
「樂樂無做過變性手術，佢性別既轉變係純天然。」表姐不厭其煩地續說。
氣氛再次沉默得可怕。
「咪咁啦老野﹗生男生女咪一樣﹗而家咩時候啊﹗諗野仲咁古縮﹗」阿媽都覺勢色唔對，趕緊安慰老竇。
點知老竇突然激動起黎，嚴厲反駁：「咩生男生女都一樣啊﹖我陳家仲要靠佢繼後香燈架﹗而家佢搞成咁樣﹗仲得咩﹗」，「男唔男女唔女咁，我要點同D親戚交待啊﹖…你真係丟清曬我個架啊﹗」講得激動，老竇直情彈起向我步步進逼。面對極憤怒老竇，又令我回想起朝早既經歷；我恐懼地向後縮，害怕地說：「唔好啊老竇…」
就係咁千鈞一髮，老竇就黎埋到身抽我兩野之際；表姐又一次快人一步，搶先攬住我：「姨丈﹗今次搞成 咁樂樂都唔想﹗亦都唔關佢事。佢得十六歲人都咁堅強渡過，你地作為家長既係唔係更應該幫下佢，而唔係怪責佢﹖」係嚴肅既氣氛下，表姐語氣亦逐嚴肅。
「阿琪，呢D係我地家事，你…」表姐插話「問題係究竟姨丈你係愛你既仔女，定愛你自己﹖」
表姐咁到肉既問題，直插入老竇既心深處。
老竇企起原地，不知如何是好。
老竇表情複雜，五味雜陳；因為連佢自己都講唔清，究竟佢愛我多D丫，定係自己多D。
答案會唔會係赤裸裸地，最難於啟齒既一個呢﹖
望住老竇為難既表情，連我都有d心有戚戚然；我相信老竇係錫我既，但對比起傳宗接代呢d歷史遺留落黎既問題，究竟邊樣重要d呢﹖對於老竇黎講，呢條問題難過百萬富翁一百萬既問題。
連空氣都近乎凝結，表姐又係時候展現佢專業既一面：「姨丈，我信你係愛樂樂既，只不過係唔識點表達姐。」
連我都對老竇出現信心危機，表姐你仲咁老定﹗
「啊…」係咪呢﹗…老竇你千祈唔好唔要我啊﹗我想返屋企啊﹗「老竇啊…」我禁不住哀求。老竇聽到我把女人聲，怒容好似蠢蠢欲動；但無幾耐，又變成一臉無奈：「唉…」
呢一唉，又揭起沉默。
「不如咁啦，姨丈同阿姨落去CANTEEN飲杯野先；我幫樂樂做完檢查再出黎搵你地丫。」
「啊…」，「仲啊乜野丫老野，落去飲杯野等個女做完檢查黎搵我地啦﹗」阿媽好爽手咁拉走老竇，完全唔理不滿既目光。
「咁…一陣見啦阿琪…」
呼…同老竇既對峙終於告一段落。讀得書多果然零舍唔同，表姐係度輕易咁化解風波；仲唔駛俾人抽兩野。
我情不自禁咁笑起黎。
「傻妹。」表姐無問點解，淨係輕輕地掃一掃我額頭。
「黎啦﹗要做身體檢查啦﹗黎﹗訓上床放鬆…」
「…咪住先﹗表姐你頭先話你有個團隊…表示你係唔係另有企圖架﹖」
「你而家先知…﹖太遲啦﹗」，「吓﹗」
「傻妹…」表姐不禁一陣竊笑「醫學團隊黎姐，對你咁特別既CASE，點都要有返隊觀察團隊既。」
「哦…咁檢查駛唔駛剝光豬架﹖」
「訓上去你咪知囉…」
風波輕易解決，睇黎我真係太神經質，對一切都過度緊張。
係極度緊張既情緒下，就咁完成左身體檢查。出乎意料，表姐連丁點非禮既意思都無。
「緊係啦﹗我係專業嫁嗎﹗私事留返第時再做﹗」表姐用食指輕挑我下巴。
哎呀﹗咪搞我啦﹗無論係邊個﹗都唔搞得﹗
「你著返條褲先啦傻妹﹗」仆街﹗檢查完唔記得著褲添…今次真係醜死人啦...
「好啦﹗檢查完我係時候返屋企啦﹗」我一本正經，若無其事。
完事嘛…緊係爭取時間鬆人架啦﹗但係枱面整理緊文件既表姐一個轉手，又叫停左我：「咪住﹗我都係要同返家長講返兩句。係啦﹗你做咩唔同阿姨講你要做身體檢查啊下﹖好彩我打去你屋企confirm一次姐﹗嗯…你係唔係有咩古惑啊下…又唔同屋企人講身體檢查，一陣又話鐘意左個女仔要同居…嗯﹖」表姐瞇起一隻眼，笑得奸險。
「邊…邊有呢﹗」
你又話私事留返第時先做既﹗
「表姐要趁呢個場合好好教育一下你﹗唔算係私事﹗」
結果我又被人識穿左。我一心急，真係好難控制自己個樣唔心急；而我個樣一心急，對手就會好心急咁郁黎郁去；眼神仲會好遊離。總之成個人就好心急啦﹗以表姐既聰明，點會唔識穿﹖
但我都無將同獅兄同居既事實講出黎，嘩﹗講出黎點知表姐會點諗架﹗
「講﹗你到底有D咩陰謀﹗」表姐繼續進逼。
「無啊﹗…我唔記得講之嘛…」而我就轉移視線。
「我講緊你同你「女朋友」呢單啊﹗你係唔係有咩隱瞞﹗」
「邊係呢…」，「講﹗唔講就打你PATPAT﹗」。
我條件反射地用雙手護臀；呢個舉動自然惹來一陣訕笑：「你以為咁有用咩﹖」
從表姐臉上既陰險笑容睇得出，佢已經唔係十幾分鐘前既專業醫生；而係演化為一個女色魔﹗
係我被趕至牆呢個咁重要既一刻，護得前又護唔後既我已經宣告玩完。表姐嘻嘻左兩聲就如猛虎撲前﹗
「啊﹗」我唔敢面對將會發生既一切﹗閉上雙眼﹗…表姐彈左我額頭一下：「唔玩啦﹗仲要落去搵阿姨佢地﹗你仲有緊要野要做啊﹗」
死裡逃生，我睜開眼睛，惶恐地問：「仲有咩要做啊﹖」
「你既身份證明﹗」
表姐好瀟灑地拎起疊文件，然後推開道門示意跟佢出去。
從老竇緊閉既雙唇睇得出，佢仲係度天人交戰緊。
我同表姐係canteen搵到兩老；明眼人都睇得出佢地缺乏交流。
重複出現既寂靜再次由表姐打破：「阿姨、姨丈，等左好耐啊﹖」
「唔係﹗我地出左黎半個鐘喳嗎﹗」即使阿媽盡力表現熱切，都無助抒緩冰冷氣氛。
一切，都睇老竇點表態。
「其實我有個諗法，唔知兩位想唔想聽下呢﹖」表姐又一次破冰，呢一次，連老竇都表現出興趣。
「樂樂有咁大既變化，我諗大家都需要有一個適應期；就算姨丈你就黎上返大陸…」
「我同上面講左，今個月調返落黎。」老竇生硬冰冷地說。
吓﹗
「啊…咁更加需要時間適應啦；我係話兩位會唔會放心俾樂樂黎我度住一段時間，等大家冷靜下呢﹖」
咦﹗
陳家三人都不約而同面露錯愕。表姐你話要保我，就係要保我返你屋企啊﹖
「唔知兩位意下如何呢﹖」表姐微笑著說。
問題一到，老竇又重回沉默，而阿媽又強顏歡笑地望住老伴。
「樂樂呢﹖你點諗啊﹖」你竟然係呢個時候推個波埋黎﹗
「啊…啊…唔係話唔好…之但係…啊…啊」
表姐笑笑摸一摸我越垂越低既頭。
「去你度住，唔會阻到你咩﹖」阿媽有d唔好意思。
「唔會﹗我而家都係一個人住喳嗎﹗有樂樂陪我仲高興啦﹗」睇黎你真係好高興咁喎﹗
「搞到你唔係幾好意思既﹗」阿媽繼續客套。
「真係唔緊要架﹗我都要出一分力幫下表妹架嗎。」
唔知係有心定無意，我硬係覺得表姐係專登用女性稱呼黎試探老竇既反應。雖然老竇不動如山，但從佢臉上不時既細微動作，我諗，佢仲係心有戚戚然。
「咁阿琪你係醫生…我地都放心既…你點啊老野﹖」阿媽推一推老竇放係枱上既手。
「我無意見。」老竇保持冷淡。
呢一句，我彷彿get到另一意思，係老竇放棄左我。
老竇目光停留係餐枱上，眉頭緊鎖。
「啊…其實我可以返屋企架﹗」
感覺上，我就好似係鐵達尼號無份上救生船既船客；船長老竇：「只有我個仔先上得救生船。」，「我係啊﹗你俾我上船啦﹗」、「你唔係﹗你只係個不男不女既怪物﹗」、「唔好玩啦﹗架船就黎沉啦﹗俾我上啦﹗」、「唔得﹗只有我個仔先上得﹗」、「老竇啊﹗係我啊﹗樂樂啊﹗D水浸到上黎啦﹗唔好玩啦﹗」、「樂樂﹖我—個—仔—係—唔—會—叫—樂—樂—既﹗係咁啦﹗」我企係甲板，遙望漸漸降落大海、最後一艘救生船…
「唔駛啦…你去阿琪屋企啦」
情況真係發展到我想像咁﹖
「唔係喎﹗我可以返屋企架哈哈…」我強作輕鬆。
「去阿琪屋企啦。」老竇語氣愈發冷淡。
我頓一頓，氣氛似沉靜左數秒：「吓…﹖真係唔駛喎﹗…我返…」
「我返屋企」都未講完，老竇猛然抬頭，怒目與我對視：「你去阿琪屋企啊﹗」聲音響徹整個CANTEEN，所有人都同時將焦點投射黎我地既方向。
呢次唔係好似，係成間餐廳都靜曬。
老竇意識到自己引起既風波同注視，有點尷尬：「總之你就唔駛返黎啦﹗」說罷便拂袖而去。
「喂﹗阿琪你幫我睇住樂樂先啦﹗…老野…」阿媽隨後急步追前。
咁即係點啊…﹖我抬頭，不安地迎視表姐，佢報以一個安慰既眼神再拍拍我膊頭：「姨丈係需要D時間冷靜下架姐…」
「如果﹗…如果唔係呢﹗…係真係唔要我呢…」我逼切表達內心既恐懼。
「一對父母，又點會咁忍心放棄自己既仔女丫…」表姐突然陷入另一段回憶。
「表姐﹗」表姐自顧自地表達哀愁良久，係時候拉佢返現實：「如果老竇真係唔要我呢﹗咁點啊﹗」
「一陣放工，我陪你返屋企話執兩件衫睇下點囉。」，「再唔係，你黎表姐度長住，表姐養你﹗」
原來你係大老竇架喳﹗
無可奈何地，我仍然企係表姐將近失敗既計劃中心。
表姐正怡然自得地，吹埋口哨掌控軚盤。
係吹到「有隻雀仔跌落水」呢段既時候，我按捺不住心中既疑惑，「表姐你究竟有咩打算﹖」衝口而出。
「咪同你返去執衫囉。」表姐依然故我。
「你唔好玩我啦表姐﹗我無屋企返啦﹗」
「放心啦﹗希望在明天啊﹗」
我屌﹗但縱使萬般唔願意，但我既前途恰恰操縱係表姐既手上；我緊跟表姐腳步，歷經千辛同萬苦，
又企係屋企門口：「準備好…」
說時遲那時快，大門經已打開；我都未黎得切驚訝，阿媽已經四萬咁口：「你地返黎啦﹖」
鐵閘迅速打開，表姐領我返屋企。一轉頭已經見到老竇又不動如山坐係飯枱發…沉思緊。
「姨丈﹗我帶樂樂返黎執幾件衫啊﹗」表姐繼續保持笑容。唔知佢會唔會有笑到僵硬既一日呢﹖
「嗯。」呢個咁精簡既回應令我個心又沉一沉。
「咁樂樂你入房執野先啦，等我坐低同姨丈傾下計。」
係我入緊房想轉身回應表姐既一剎那，我見到表姐既笑容…原來係帶點陰險既﹗就好似睇tvb鄭子誠一個轉身奸笑咁。
「表姐你…」，「得啦樂樂，我會俾你處理好架啦…」表姐行埋黎，幫我慢慢閂好房門…
唔通呢一切都係圈套﹖唔通表姐太寂寞想搵我陪佢﹖又或者表姐係LES睇中左我…
咁又幾好喎﹗但咁樣唔係亂倫咩﹖…女對女已經極富爭議性啦﹗
其實表姐個BODY真係幾正：皮膚呈小麥色，有前有後；加上表姐天生麗質既樣貌…點解佢仲係單身架呢﹖
講明先，而前既我係無J過表姐咁變態架下﹗至於幻想呢…
講返轉頭，唯一解釋就係佢係LES…仲要睇中左我﹗由知道我出事就開始﹗
諗到呢度，我打左個幸福既冷震。
係百感交集下，我繼續執捨細軟。
唔知比表姐豐滿既胸部圍繞既感覺係點架呢﹖唔知表姐訓覺果陣會唔會淨係著內衣呢﹖唔知表姐興唔興同其他人一齊沖涼架呢﹖
右手反射性地禁住下體…屌﹗我而家都無鳩﹗
抽返隻手上黎，其實我要帶走既野真係唔多；毒撚有咩身外物架﹖…獅弟﹗啊﹗點解你會訓左係度架﹗ 我今朝竟然帶漏左獅弟﹗如果佢俾老竇掉左咁點算啊﹗我不禁緊緊地抱住呢隻獅子公仔。
自從呢隻野係屬於我既之後，我晚晚都攬住佢放；真係唔能夠想像無左佢我要點生存。
呢隻野真係好頂癮，肥滕滕咁；有時我訓唔著就同佢傾計直到眼訓為止。
而自從肥輝同阿康同我反面，佢就係我最親密既朋友。
「獅弟…」半日不見，如隔1.5秋；慶幸老竇無掉左佢，令我仲有機會感受佢既柔軟。
「樂樂，你執好未啊﹖」表姐係門外詢問。
沉醉係與獅弟快樂世界既我嚇左嚇，遲鈍地回應：「就得啦…﹗」
「你慢慢啦，我一定會捉埋你先返屋企架﹗」表姐甚有玩味。
「嗯…」我與獅弟對望。
我諗都應該執齊曬；今朝仲賴係野咁回望一下屋企…其實可能而家係係最後一次…
坐係床邊，細細地觀看自己間房；雖小，但總算係自己既竇。有咩唔開心，俾人蝦、俾老竇鬧…只要哩返入自己既小天地…咁就乜事都無。
唉…天意弄人啊…
抖擻精神，準備開門再次迎接一切問題；嗯…原來我又漏左手機無拎…
一望，8個未接來電：四個係小善，四個係獅兄。搞到咁，我都無興趣再JOIN咩同居訓練…反而係小善要點兜呢…
好撚煩啊﹗點解煩惱既事硬係一次過出現架呢﹖唔可以逐個出現等我1ON1架咩﹖仆你個臭街﹗
算啦﹗我都nothing to lose﹗見步行步啦﹗
「你個衰女﹗今朝漏低個電話就走左去﹗做咩唔打俾阿媽﹗」阿媽連珠炮發。
原本我係想講其實我係漏左帶，但阿媽又閘住我：「咁大個人都仲要阿媽擔心﹗搞到咁大件事都唔同阿媽講﹗自己一個走左去﹗你知唔知阿媽好擔心架﹗」
「我…」，「我咩我﹗次次有事都係咁﹗一陣係街撞到個色魔你話點算﹗」
「但係…」，「但咩係啊﹗而家係唔係大個啦﹗有毛有翼啦就咩都唔駛講啊﹗」
係被打壓言論自由之下，我被阿媽禁住狂攻。
表姐繼續係一邊微笑食花生。
「唔係啊…」，「唔咩係啊﹗要阿媽擔心好過癮啊﹗咁大個人都唔識生性﹗」
阿媽嘆左啖氣，語氣旋即軟化：「咁大個女仲要我擔心。」
「阿媽…」，「呢句你講左兩次啦…」
我竟然咁不知好歹地挑老母機。
「哎呀﹗而家阿媽係咪話得你唔岩先﹗仲駁阿媽嘴﹗你個衰女…」
原本應該停止既訓話又漫延多五分鐘。表姐終於出手幫拖：「阿姨啊…你放過佢啦﹗你睇佢個頭DUP到就黎掂地啦。」
「啊…嗯﹗睇黎你都知錯啦﹗」表姐幫拖奏效﹗阿媽再次收斂。
「嗱﹗去表姐度要乖乖地﹗唔準亂黎啊﹗」
「啊…嗯…﹗」本來想回一句「我點會亂黎喎﹗」但係0點17秒我考慮到利弊，所以收口；轉用模糊應對。
「放心啦阿姨，樂樂會好乖乖既。」表姐順勢搭住我膊頭。
唔知點解，我覺得呢一下甚有GAY…LES味。
「係啊…﹗」虎軀一震，我下意識回應。
「唉…我勸掂你老竇你就可以返屋企嫁啦…」阿媽又突然一臉多愁善感。
「姨丈都係需要D時間適應架姐...」表姐安慰道。
「希望係啦…」係我內心彈出呢句既時候，阿媽同時用口演繹。
如果唔係…我都幾大鑊…唔通一世住係表姐屋企咩﹗佢都會結婚生仔嫁嗎﹗…除非佢係LES姐﹗
「啊係啊阿姨，成日都唔記得講；我幫你地SEND左份醫學證明去入境處，佢地回覆話一個月內約時間做身份證。咁到時我陪樂樂去定阿姨你黎埋﹖」
「…咁大件事啊…我黎埋啦﹗…真係唔該曬你啊阿琪﹗麻煩你咁多﹗又阻你時間…」
時間就係客套中一分一秒地過去。
「嘩﹗真係好撚華麗啊﹗」呢個係我岩岩步入表姐屋企樓下既感覺。
看更親切有禮，令你有屋企人做緊看更既感覺。周圍又椰樹啊又噴水池；唔知果面個扶手係唔係鑲金嫁呢﹖
嘩﹗大堂富禮堂皇唔在講﹗仲要擺幾張懶鬼佬貴族FEEL既梳化，看更緊係四萬咁口啦﹗真係唔怪得住私樓會有雞脾食﹗
「有LIFT啦﹗」表姐令我由陶醉狀態轉換成清醒狀態，我好大鄉里咁哦左聲就跟表姐尾入左LIFT。
細個果陣黎拜表姐屋企拜年都無咁豪華架喎﹗佢地搬左屋咩﹖
「DADDY佢地臨移民果陣買左呢層樓，得我留低；咪過左我手囉。」
買樓講到買粒糖咁，有錢人真係唔同D。
連部LIFT都升得快過人；眨下眼我就企左係表姐屋企門口。
連鐵閘都唔裝，唔怕有賊咩﹖
「準備好未﹖」就係差唔多入門口呢個咁臨門一腳既一刻，表姐用其婀娜多姿既身段擋住道門。
「要準備D咩啊﹗」我又真係俾表姐拋左拋喎。
「要準備…你個心﹗」表姐又失驚無神咁衝前搭住我膊頭；俾你嚇一嚇﹗但見你眼神咁堅定，信你一次啦﹗
「燈登登凳﹗」大門除除向內移…
究竟第一眼望到既會係咩呢﹗
…好緊張啊…係咩呢…啊…嗯…咦…吓﹗第一樣進入我對眼既竟然係一個四眼妹﹗仲要係馬尾四眼妹﹗
原來表姐你一早金屋藏嬌﹗咁仲要我黎做咩啊﹖真係嬲撚左啊﹗
望真d個四眼妹，扎住條馬尾，跪坐係茶几後望住部notebook發吽逗。
不過令我印象最深刻既都係佢對無神既眼，即係俗稱死魚眼。
「阿滿﹗我地返黎啦﹗」表姐異常熱情，係爭在無飛埋過去姐。
阿滿﹖佢唔會係姓曹架呢﹖
呢個四眼妹又係何方神聖啊﹗
係我打量緊佢既途中，佢已經抬起頭，迎望我訝異既視線。啊原來佢唔係死魚眼，係對眼細﹗
但係佢副大黑框眼鏡襯托下又唔係咁細姐﹗之但係望多兩眼又覺得幾細…
係決定佢對眼究竟係大定細之前，有兩點係肯定既：就係佢睇落好憔悴而且佢個人望落仲好COOL。
「阿滿你點啊﹗仲未度好啊﹖」表姐親暱地撲埋去叫阿滿既四眼妹身邊。
「…我一隻字都寫唔出啊…」阿滿答道。「我用咩去投稿啊…」垂頭喪氣。
「唔怕啦﹗我地既文學滿咁有才華﹗實寫到既﹗」表姐仍然充滿朝氣。
「…」
依我做左咁多年毒撚，縮埋一二角觀人於微既本領；我知道，佢真係咩都寫唔出。
「唉…做作家真係我既夢想﹗我儲左好耐錢先有時間去實現夢想﹗…但而家我咩都寫唔出…」
原來仲係個堅持夢想既人﹗好﹗我欣賞你﹗但愛莫能助。
「你仲有時間架﹗你要信自己﹗阿滿你有既係才華﹗」表姐係安慰緊佢定講緊真話呢﹖
「如果我真係唔得呢﹖」阿滿痛苦地與表姐對視。
「仲有我支持你﹗」說罷，佢兩個已經擁成一團：「多謝你啊﹗阿琪你真係我最好既朋友啊﹗」、「乜說話丫﹗讀書果陣我地已經互相支持架啦﹗」
屌你，我企係門口睇足咁耐大龍鳳。
終於，阿滿注意到我呢個咁生口面既撚樣：「咦，你好似企左係門口好耐啦喎；點稱呼啊﹖」
屌﹗你一早睇到我就嗌我埋黎坐啦﹗「我叫…阿樂﹗」毒撚係裡外不一架啦。
「阿樂…﹖」，「佢係我表妹，有d事要黎住一排；以後大家就係同居啦﹗」
原來個阿滿都係住係度架﹖
阿滿先係面無表情—更可能佢天生就係咁面無表情，繼而展現微笑：「你好啊，我叫阿滿﹗」
呢一笑真係不得了，阿滿成個人即刻陽光溫暖曬。
嗯﹗原來係雙面人﹗
表姐再交代埋D野—例如：「有咩想搵就問阿滿啦﹗」再俾埋封請假信我之後就返左入房訓覺。淨低我同阿滿留左係客廳。
我同阿滿既熟悉程度甚至低到唔能夠展開一場對話。加上佢又coolcool地，我又毒撚；成間屋當堂靜左好多。
於是我默默地行阿滿背後既梳化，靜靜地坐低。
阿滿好似舊石咁望住部notebook，仍然係一隻字都打唔出。
坐係人身後呢個咁偷窺既狀態，又係時候望下人地生成點啦﹗正如頭先講過啦，阿滿有一對睇落好細既眼，
好似係單眼皮…又好似內雙。…我都係唔執著係佢對眼啦﹗總言之，我認為佢咁冷酷既氣質完全係出於佢對眼。
到佢個鼻啦：我就覺得佢個鼻生得幾靚，高而細直。
個嘴：中等大小啦…薄唇…其實對比李永燊同何志堅既大紅唇，佢直頭係細添啦。
佢皮膚都生得幾好，又白又滑，摸落應該幾彈手…
「你肚唔肚餓啊﹖」阿滿突然擰轉頭，微笑著。
仆街﹗我偷窺緊你嫁嗎﹗你做乜突然擰轉頭啊﹗嚇親我嫁嗎﹗之但係…佢笑起上黎真係第二個人咁…好WARM…好大姐姐FEEL啊…
我唔係話表姐無，咁表姐係有表姐FEEL嫁嗎…即係點講好呢…即係你會覺得佢係朋友…又係姐姐…不過…
不過照顧feel無咁重﹗係啦﹗阿滿笑起上黎有好濃烈既姐姐照顧FEEL﹗
「我唔肚餓啊家姐。」
呢句好似有D問題咁既﹖
阿滿既表情由微笑到訝異，再到竊笑、笑得更燦爛：「你叫我家姐啊﹖」
而家既佢真係好陽光，直頭有耶穌光係背面殘住我對眼啊啊啊﹗
「係啊﹗」我慌忙掩眼既同時不自覺地說出。
「哈哈，你好得意啊﹗」阿滿笑逐顏開。
「係咩﹖個個都咁講架﹗」耶穌光消散，取而代之係阿滿愈哄愈近，帶點花香又微笑緊既臉龐造成既緊張感。
「你好囂張啊﹗」，「不過你係幾可愛既﹗」
「我叫阿滿啊﹗多多指教﹗」
阿滿伸出佢白裡透紅既右手。
咁好既機會…﹗我好私縮咁伸隻手仔出黎握握手；果然係好滑﹗而且仲好暖﹗
係阿滿咁溫暖既行動下，即使毒撚都會被佢感動。加上佢咁大姐姐既氣質，實在好難唔同佢熟絡。
阿滿係表姐既中學同學，一個讀文，一個讀理。但殊途都係同歸，大家都係拔尖港大見。
咁當然一個係讀醫，一個係讀文學架啦。
係香港呢個咁渴求醫護人員既地方，表姐畢左業後就日夜做到無停手；相反阿滿呢…
於是一個上天堂（其實可能都係地獄。）一個就直墮地獄既深谷。
佢既偉大理想係成為一個作家；但佢先後做過捱到仆街既編劇、追訪蝦餃仔既狗仔隊、同文匯報既記者。
「唉…做落根本唔係果回事…」阿滿嘆氣道。
「我想做一個作家啊…我想寫故事…唔係想幫宮心計諗續集﹗唔係追訪陳慧林想生多幾多籠點心﹗唔係想幫文匯報編港聞啊…」
雖然我無阿滿咁高層次，對文學有咁高造詣；但我每日返學行過ok，見到成疊賣唔出既文匯報、搭巴士roadshow又見到陳慧林又提佢隻點心仔、夜晚連開電視既意慾都無。
我明白，阿滿係做齊曬所有厭惡性工作。
「我想追求夢想…」阿滿難過地垂低頭：「自從阿婆過左身…得返我一個…阿琪又肯收留我…我先有機會…」
仲有咁賺人熱淚既故事﹗
「但我而家又…又一隻字都寫唔出…」
阿滿已經瀕臨痛哭既邊緣。
我平生最怕就係女仔喊架啦﹗唔好話同女仔搭傘丫﹗女仔喊你係連思考既能力都無，轉身走又太仆街喎﹗你唔好喊啊﹗
「…嗚…」佢喊啊﹗阿滿真係喊啊﹗
係淚水襯托下，阿滿變得楚楚可憐，美麗度仲增加左幾十個百份點。
原來阿滿係行為美女…行為就好似打機技能咁加美麗屬性。
「啊…」我想辦法令阿滿平伏情緒「不如你寫一篇…由毒男變做女仔既故事啦﹗」
為左幫家姐…死就死啦﹗
阿滿用一個彷似係沙漠搵到綠洲既眼神望住我。
「我係話…寫一個由小毒男…變做靚女既故事…」
琴日阿滿聽完我個idea，諗左諗就搭住我膊頭：「多謝你啊﹗」然後就埋頭苦幹。
果然成功係需苦幹﹗我一早起身準備返學果陣，佢仲苦幹緊。
「躂躂躂躂躂躂…」鍵盤聲不絕於耳，我諗阿滿既進度無十萬都有幾萬字。
「早晨啊…」我打著喊露。
「吓…啊早晨啊﹗」我諗阿滿維持左呢個動作成晚，唔係幾慣有人聲突然騷擾佢。
「你寫成點啊﹖」我好奇地。
「嗯…都起好個大綱同故事主線既…我諗住分開幾部黎寫…」
吓﹗起左成晚先得個大綱同主線﹖
「嘻…寫故事唔簡單架，如果唔定好曬d細節，之後就會愈寫愈亂架啦﹗」阿滿雀躍地解答。 哦﹗原來係咁﹗
「係啦，表姐呢﹖」頭先經過表姐房，房門虛掩，張床真係好亂啊﹗
「阿琪﹖佢返左工啦﹗…差d唔記得﹗佢吩咐叫我照顧你啊﹗」阿滿如夢初醒地企起身；可能係因為跪得太耐，一時失平衝向前跌：「哎啊﹗」
阿滿失平衝向前仆，正正就仆係我身上；到我：「哎啊﹗」
「嘭﹗」我就咁被阿滿壓到跌左落地。
「啊…好軟啊…」除左跌落地第一時間既疼痛感，第二感覺就係軟綿綿既感覺…
咩黎架﹖
我睜開眼，臉頰旁邊就係阿滿痛苦既表情；目光向下移…阿滿正與我胸疊胸。
「對唔住啊…你無事丫嗎﹖」
你可以疊多陣架﹗…我諗緊咩啊﹖「無…無事﹗」
「對唔住啊…」阿滿趕緊起身，跪坐係地下，再扶我起身：「你無事丫嗎﹖有無邊度整親啊﹖痛唔痛啊﹖…」
真係好姐姐feel。
我好似公仔咁被阿滿左摸右摸，阿滿又不停講對唔住；而且你個胸又大…我又諗緊咩啊﹖
「無事﹗你快d去坐返陣啦﹗你跑左成晚仲唔腳軟咩﹗」我爽朗地回應。
「真係無事﹖」阿滿仍然唔放心。
「無事啊家姐﹗」
「有阿滿做家姐都唔錯丫…」我托住下巴，自己係枱發吽逗。
唉…阿輝同肥輝兩條撚樣點解可以嬲咁耐嫁﹗你地兩個再係咁撚樣﹗再係咁撚樣﹗唔好撚怪我﹗唔好撚怪我﹗
…算啦…我認低威啦…我認衰仔…
為左條女同埋…我?...好撚GAY啊屌…總言之因為小小事而令十幾年既友誼玩完就好唔抵啦﹗
「喂…你地仲想嬲幾耐啊…」我主動行去肥輝同阿康背後。
肥輝同阿康似乎對我突然出現嚇左一跳。
由其是阿康，離我九丈遠果陣就七情上面咁望住我講我壞話，仲一臉鄙視。
到我行埋黎俾機會你反擊啦，你又紅都面曬；手震又口窒咁擰咩面。連望住我對眼都唔敢。
至於肥輝呢…仲係一如以往為我搶左小善而極度憤慨。所以撓埋手又係擰咩面唔理我。
仆你個街﹗唯有出絕招﹗…我拎部手機出黎，show個有關小善好關心我點解唔接佢四個來電既msg：「因為…因為…因為小善應該係屬於肥輝架﹗」呢句說話連我自己都唔信。
但肥輝隻肥野正正俾呢句震撼到佢全身上下肥膏激蕩：「你…你講真架﹖」
不過好快，佢又一臉懷疑：「乜你唔係食左小善啦咩…我唔駛你可憐﹗」
「緊係唔係啦﹗…你又唔係唔知我而家咩情況…」用黎安慰肥輝既呢句，又刺痛左阿康既心靈，我feel到佢震左下。
「哼﹗你就係想趁你而家咁借機親近小善喳嗎﹗」肥輝反擊。
「唔係啊…我唔聽小善電話就係最佳既例證啦﹗」我再次舉起電話。
肥輝窒一窒，似乎被撼動。唔夠一秒，佢又故態復萌：「就算你對小善say no﹗咁點解佢咁緊張你，狂打四個電話俾你丫﹗」
「咁—係—因—為，我係佢舊同學啊﹗」我氣急敗壞。
隻肥仔又猶豫左陣，我乘勝追擊：「點從來都無諗過追小善，一直都係幫緊你制造機會架衰人﹗」
未待肥輝回應，阿康竟然極速回應：「咁果條友呢…果條友你又點解釋啊﹗」
Shit﹗
「總之呢…」，「你做咩唔聽我電話啊樂樂﹖」一道曖昧既聲線忽然傳入。
咦…﹖你點會係度架﹖你唔怕阿怡咩﹗
我立即用視線繞場一週，阿怡果然唔係度﹗
「你唔駛望啦，阿怡俾其他人纏住左，有排都唔會返到黎。」獅兄老實不客氣地搵張凳坐係我隔離。 轉頭望向阿康，佢塊面就黎谷到變紫色。
獅兄繼續步步進逼，用手抬起我下巴，輕佻地說：「點解唔聽我電話啊，樂樂。」
視線繼續聚集係阿康身上，佢緊握拳頭，身體帶點微震。
我覺得再唔禁住佢，佢就會爆。
我用迅雷不及掩耳既速度彈起，再用我右手既食指食住佢不知廉恥既鼻：「個比賽已經唔再存在啦﹗所以訓練都係﹗同時你唔好再黎煩我啦﹗我要同你…同你絕交﹗」
我保持住用食指指住佢既姿勢，而佢亦都維持住輕佻既笑容。
我攰啦…乜你仲未攰架…
「樂樂，你愈來愈容易暴露自己既身份啦。」獅兄反而將個頭控得更前。
咩啊﹗…又唔記得扮聲添…我都就黎拎女仔身份證啦﹗怕咩啊﹗
「我要同你斷絕來往﹗因為我個friend好唔like你﹗」我搭住阿康膊頭。
原來個怕醜仔除左震緊之外，全身仲慶曬。
「係唔係啊阿康﹗」我半強逼，半試探地請阿康發言。
咪住先…咁咪即係擺個怕醜仔上枱同獅兄單挑﹗
「總之我就同你絕交啦﹗係咁﹗」
良久，獅兄仲係成尊佛像咁郁都唔郁對住我微笑。乜俾人拒絕唔係應該即刻奪門而出架咩﹖
「你個傻妹又想玩咩啊﹖」
「唔係玩咩﹗係絕交啊﹗絕交啊﹗」我堅決地說。
獅兄保持微笑，戚一戚眉：「絕交﹖你捨得咩﹖」
「我唔理﹗絕交﹗你即刻走﹗我唔要見到你﹗」搭住阿康既手愈捉愈緊。
阿康啊…你快d表態啦﹗
「係唔係啊…阿康…﹖」我再次鼓勵阿康。
對阿康既注視，多左肥輝同獅兄；肥輝面無表情地食花生，而獅兄既眼神同微笑出現左轉變—帶有些微既藐視。
仲無計其他係外圍睇緊戲既同學。我似乎將件事愈搞愈大…俾咁多人望住，小毒撚既緊張直線上升。
「啊……啊…」阿康連個樣都變埋色。
「嗯﹖點解樂樂你成日咁緊張佢既﹖你鐘意人﹖」獅兄黎個火上加油；你個仆街仔丫﹗
「吓…﹖」我都俾佢突如其來既一擊搞到手忙腳亂「唔係啊﹗」我惱羞成怒地反擊。
我feel到阿康個身好似突然軟曬咁。
「你快d走啊﹗我唔會再理…」，「唔駛啦…你地繼續啦…」
阿康終於開聲，仲係咁完整地講完一句﹗
乜你咁講野啊﹗「阿康你講咩啊﹖」
阿康緩緩地擰頭，面向住我：「唔駛…我地…我地係兄弟黎架嗎…﹗」
小毒撚極力展現笑容，雖然好生硬。
「係…啊…」你表情咁生硬…無野丫嗎﹖
「緊..緊係啦﹗」我知道阿康努力想保持自然。
獅兄又戚一戚眉毛，好似有點勝利既意味：「咁係唔係唔駛絕交啊﹖」
「啊…唔係﹗」獅兄重新勾起我對佢既注意，佢咁輕浮，又激起我對佢既討厭。
「你走啊﹗…走啊…﹗…走…啊…﹗」我索性企起身行埋佢身邊想推佢走。
當然，佢咁壯碩，郁都唔郁一下；推佢走純粹係做個表態示下威架姐。
「啊﹗」佢一個閃身，我就投曬懷送曬抱咁跌入佢胸口。
「哈哈﹗我地攬過，就永遠都係好朋友，無得絕交﹗」獅兄緊緊地攬住我。
你放手啦﹗好多人望住架﹗