喺我苦惱緊果陣,報站聲響起~

"下一站粉嶺,Next station Fanling"

車門一打開,我就衝左出去~

出閘後就跑向小燁屋企方向。途中撞到幾多人我都唔理。

俾我撞到嘅人講咩?我完全無視左。



而啊賢就跟喺我身後,就好似追住我咁。

結果啊賢俾人拉停左~ 抵死!

小燁係住鐵路上蓋,我好快就去到佢樓下管理處。登記好晒先見到啊賢喘緊氣衝入嚟。

『先生,有咩可以幫到你?』保安問。

『我同呢位小姐一齊架。』我向保安員點頭示意。



『麻煩身份證登記。』搞好晒手續,同啊賢搭lift上去。

『妳知唔知,我俾人拉住。佢哋狂問我做咩追住妳~ 果下我都唔知點算好。』佢喺度抱怨話

「你而家出現咪得~」我唔想聽啊賢廢嗡~lift門打開,我就衝去小燁屋企狂㩒門鐘。

『嚟啦,嚟啦!邊個呀?』應門嘅係把女聲,係小燁媽咪。

『Mika? 做咩你自己上嚟嘅?又唔講聲?等我執下啲嘢先嘛,周圍咁亂!你隔離呢位係?』Auntie 望住啊賢~



啊賢搶住咁講『Auntie! 妳好,我喺Mika個FD。陪佢一齊搵小燁!』

「邊個俾你咁叫佢!?」我怒視啊賢。

Auntie 好溫柔咁話『入嚟先講啦,唔好企係度。』

「Auntie,我想問小燁去左邊?我好擔心佢!」

『個衰仔真係幸福,都唔知點解佢識到個咁靚又咁關心佢嘅女友。』Auntie 捉實我隻手

「不過佢頭先WhatsApp 話要同我分手!!嗚嗚~」講完我又眼紅紅咁喊出嚟。

小燁媽咪攬住我~

『呀~死衰仔,咁好嘅女友都唔要?Mika你唔好喊住,佢又唔係靚仔喺你先揀佢架炸!』




我即刻轉頭「咁小燁而家去左邊?」

『我都唔知,佢今朝淨係講左句要返去就走左。問佢嘢又唔答!』睇嚟小燁媽咪都冇頭緒~「

吓~佢平日都好有交帶,點會呀!」我疑惑咁問~

『可能佢有新女呢。』啊賢用淫眼掃視我,示意要我揀佢~

妖!佢好煩。想喺我身上搵機會?下世啦~

連Auntie都無視佢再講『佢上次行完山返嚟就怪怪地。成日話好邪,又撞到乜。』

諗返起又係喎,尋日星期三佢day off。



正常係佢會喺拉把等我一齊溫書再食飯。

佢淨係send 左個WhatsApp話唔舒服唔洗我照顧,成個感覺好奇怪。