Week34 Wed 

今日出門口前,我特別叮囑Janet著得casual啲,我怕佢以為我會帶佢去咩高級地方。我先叫佢揸車嚟接我,之後由我車佢去目的地,因為咁樣,感覺上會似係我主導啲。 

係差唔多三點嘅時候,我哋到達咗----旺角。我帶Janet上左一間女僕cafe,入面空無一人,當然啦,我包咗場,雖然好貴,但為咗跟住落嚟嘅行動,絕對值得。 

我先叫Janet坐低,然後我再入咗去廚房準備。半個鐘後,由一班女僕一齊將我個精心炮製嘅街頭蛋包飯拎出去,面頭用茄汁寫住「Janet 我愛你」。之後我再拎住串魚蛋出去,冇錯,係魚蛋,並唔係花。我一路行一路望住Janet,佢嘅面上唔知幾時開始,多咗兩條淚痕,唔知係因為感動定係其他原因呢? 

「阿賓你……」Janet嘅聲音有啲震… 



「傻瓜,唔好再喊啦,我而家咪係你身邊囉,我唔會俾你再傷心架啦。」我輕輕咁幫Janet擦走面上嘅眼淚。 

點知我講完,Janet喊得仲犀利。 佢一路喊一路話:「其實你昨天說完你不會為了錢而跟我在一齊,我真得很害怕,我怕我的自以為是會令我永遠失去你。一直到剛才,你喊我等你一下,我還怕你是要把她帶出來,介紹是你的女朋友阿。」 

有人話,當個女仔喊個陣,好簡單,只要攬住佢就可以令佢平服,點知……我一攬住Janet佢就不停打我,一路打一路用廣東話講:「衰人衰人衰人!」

出奇地,Janet竟然冇鄉音。Janet望住一臉驚訝嘅我就話:「其實我都識講廣東話,不過我好怕羞,驚講錯野,你係Mandy以外,第二個聽我過我講嘅人。」 

「乖啦,唔好再喊啦,快啲試下我為你親手整嘅街頭蛋包飯啦,入面有齊你平時鍾意食嘅嘢架。有臭豆腐啦,炸魷魚鬚,仲有芝士薯條架。」 



「怎麼…好像怪怪的…」佢食咗一啖之後就俾咗個咁嘅反應,我都明白,味覺呢家嘢係好主觀嘅,所以我唔介意佢唔識欣賞呢碟我精心炮製嘅美食,於是我唯有自己食咗佢啦,不過我食咗一啖之後都係…「唔該,幫我倒咗佢。」我叫人倒咗碟蛋包飯絕對唔係因為好難食,只係因為呢到始終係人地鋪頭,我都係order返人哋嘅食物算啦。 

係等嘅同時,我將我手上嘅個串魚蛋交到Janet手上。 

「希望你唔好介意我手上嘅並唔係浪漫嘅玫瑰,因為呢咁先係原本嘅我,我最真實嘅生活。我願意帶你入我嘅生活,所以…雖然好怪,但希望由呢串魚蛋開始,可以帶俾你最真摯嘅幸福。」 

「不會啊,我覺得還蠻浪漫的!」Janet再一次流下眼淚,不過我相信,今次佢所流嘅係幸福嘅眼淚。係跟住落嚟嘅兩粒鐘,都係同啲女僕玩下遊戲,個刻我哋真係好似一家人咁,好幸福好溫馨。之後Janet因為呢兩日嘅情況太波動,需要調整下心情,加上頭先嘅眼淚令到佢隻眼都腫咗,所以我哋決定返屋企,今次由Janet渣車。其實我唔介意俾女人主導,因為我始終都係個小男人。 

返到屋企樓下,Janet再一次落車走到我面前,唔同嘅係,我主動咁錫咗佢嘅額頭一下,Janet已經好滿足咁上返車。