短篇散文集: 《可愛的小琳琳，生日快樂》

我文筆又唔係好，又唔係出名，話求其9up篇文出嚟做生日禮物都有人肯受，睇嚟寫文雖然開唔到源，但對節流嚟講都起到作用喎。

------入正題------

「有冇攪錯呀，今日你女朋友我生日呀，你有咩做咁唔得閒，連我生日都唔陪我呀？」琳琳對住電話咆哮，繼而收咗線。

今日係琳琳嘅16歲生日，偏偏佢嘅男朋友同佢講呢一日屋企有事唔可以陪佢，作為一個俾人錫慣縱慣嘅大小姐嚟講梗係最難接受嘅事啦。

「嗚嗚，阿聰佢話唔得陪我過生日呀，無啦啦話屋企有事喎，會唔會咁啱呀……」呢頭收完男友線，個頭已經幾姐妹係到多人會議。





姐妹A：「可能真係咁啱有事呢。」

姐妹B：「咩事大得過女朋友生日，佢呀媽生cancer咩。」

姐妹C：「唔緊要喎，有我哋陪你丫麻，嗱聽日放學係俾底條屋企鎖匙我，等我準備上去你到佈置下，我叫你返上嚟先返啦。」

琳琳：「吓，唔返屋企我去得邊呀……？」

姐妹B：「有我陪你丫麻，嗱，我哋放咗學去行下街，阿A同C就去你屋企佈置啦！」





[下刪一小時對話]

琳琳：「嘩，2點架啦！聽日返學呀，瞓啦！」

姐妹：「嗯，好啦，早抖。」

---------------------------------------------
翟日放學……

姐妹C：「好啦，我哋打俾你，你先好上嚟喎。」





就係咁，琳琳同阿B係條街到漫係目的咁行咗一個鐘，不過琳琳嘅腦海，依然好在意男朋友唔陪自己嘅事。

一個鐘後……

「佢哋攪咩攪咁耐架……邊有人有屋企都唔返得架……」琳琳開始抱怨，，阿B只有安撫再安撫。

終於等到佢哋打嚟……

姐妹A：「返得屋企啦。」

一返到屋企，琳琳俾眼前嘅境象嚇親。

「說好的佈置呢？」琳琳一臉無奈咁問。





姐妹A：「掛住準備你嘅禮物，所以……」

「咁禮物呢？」

「嗱，呢個就係你份禮物嘅特別之處啦，首先，你去你屋企嘅大門口睇下個提示先啦，我哋已經將16份嘅禮物收埋哂係你屋企入面，每個禮物會再附加下一件禮物嘅所在地嘅提示，要搵哂出嚟先可以拆架。」

「攪錯呀，我生日都咁玩我！」

口說說不嘅琳琳，最後都係乖乖咁行咗去門口。

「梳化」第一個提示。

琳琳跟據提示，係梳化底搵到一舊用報紙包住嘅禮物。

朋友A：「未拆得住呀，要搵哂先呀。」





「電視」、「電視櫃」、「自己睡房張床」、「馬桶」……琳琳跟住提示，一個個咁將啲禮物搵哂出嚟。

終於係廚櫃到搵到第16份禮物，琳琳嘅精力已經被消耗盡。

朋友C：「你而家由第一份禮物拆起啦。」

「不過你哋買16份禮物，咪好哂錢囉，多謝你哋呀。」琳琳一邊拆第一份禮物，一邊講。

係琳琳拆完第一份禮物之後，佢好後悔多謝呢班人。

因為第一份禮物係「報紙包報紙」。

姐妹們：「拆哂先啦！」





如是者，琳琳好努力咁拆哂全部禮物，呢堆禮物分別係「報紙包報紙x2」、「報紙包益力多空樽x4」、「報紙包廁紙桶x4」、「報紙包空糖盒x3」同「報紙包雜錦壽司拼盤走壽司x3」。

「啊！！！！！！！你哋玩我！」琳琳邊講邊谷起臉頰。

姐妹A：「其實你份禮物係你屋企樓下，你快啲落去搵啦，遲咗可能俾人拎走架啦！」

「仲要搵！！！！！」

口裡說不，可惜……

又過咗一個鐘，琳琳係環繞自己屋村一周之後只係得到幾張提示卡，而最後個張仲要……

「其實係屋企呀！」

琳琳嘅情緒就快到頂點。





返到屋企，佢哋拎住咗個蛋糕盒出嚟，本來氣結嘅琳琳見到，都轉怒為樂。

點知個蛋糕盒入面，只係10幾件由超市買返嚟嘅小蛋糕砌成嘅「蛋糕」。

琳琳頓時爆喊。

「我男朋友已經唔嚟陪我過生日架啦，連你哋都要玩我！！！！」

係呢個時候阿聰係佢嘅睡房捧住個真正嘅蛋糕出嚟，係一隻pad金龍抽蛋機嘅造型，附近仲有幾粒金蛋添。

琳琳喊住咁問：「點解嘅？」

阿聰： 「個蛋糕之前訂落，但間鋪又開得晏喎，咪唯有同你班姐妹夾埋囉，唔係點俾驚喜你啫，個啲尋寶遊戲都係幫個蛋糕拖延時間架咋。」

對於熱衷pad嘅琳琳嚟講，有隻咁好意頭嘅金龍蛋糕真係即時喜上眉梢，不過最令佢心甜嘅都莫過於身邊嘅人對自己咁好。

阿聰：「好啦，唔好喊啦，許個願，吹蠟燭先啦。」

吹完蠟燭後，姐妹們：「生日快樂啦傻婆！」

阿聰：「生日快樂呀，老婆！」