「大型魔法:天空殞落」
龍人領主同後面既魔法師施展魔法,然後一粒巨型既殞石從天而降。
擊中。
一下子扣左兩萬點HP。
似乎,大型魔法係人種對付大型副本BOSS既最有效手段。

HP:80564/103351

一擊就扣左五分之一血。
睇落好似好強咁,但係呢招魔法睇黎會耗盡哂後面幾個魔法師既MP。


短時間內,係無可能再次用多呢一招。

「你地咁樣都算係盡全力阻止緊我咩?」
骸骨龍問。

的而且確。
如果真係要阻止佢,根本無需要係到扮成人黎同佢打副本。
直接變番做魔狼或者條黑龍,就可以擊退佢。

「撤退啦,我唔想殺死你。」


獸人領主撲左上去,用斧頭劈落去骸骨龍個頭到。
骸骨龍連避都唔避,呢一擊根本唔會點傷到佢。

「黑王大人佢,絕對唔會希望見到世界比人毀滅。」骸骨龍講。
「我都唔想呀!」獸人領主反駁。

獸人領主指揮後面既人同時纏住佢隻腳。
封鎖佢行動。
無用。
一腳就踢開哂佢地。



「唔好……逼我!」獸人領主大叫。

「你睇下你後面既士兵,因為你已經無哂士氣。」
骸骨龍無視佢地,繼續向前行。

「呀!!!」
獸人領主咆哮,帶住所有人一齊上。

「重力結界」
一下子,以骸骨龍為中心,四圍既重力都加強左。
殺哂除左龍人領主同埋獸人領主既士兵。
神話級既魔物。
據稱可以係一夜之間毀滅一個王國既魔物。



「……」獸人領主只可以望住佢,咩都做唔到。

睇黎,佢兩個都係廢既。
佢地唔會忍手殺得死骸骨龍。
而且……佢地可能開始懷疑精靈王。
無計,等我出馬啦。

有一個人企左出黎,企係骸骨龍前面。

「黑騎士……當今既魔王點解要幫精靈王……唔係,你唔係當代既黑騎士,係當年第一任既黑騎士。」骸骨龍講。

無錯。
佢係海龍王。
係我既黑騎士。



「究極光束」
骸骨龍張開口,諗都唔諗,即刻攻擊。

「果然你同蜘蛛女王,係同外神有關!」

我封鎖左呢一帶。
絕對唔可以比天照知道黑騎士既真正身份。

「淨化之劍」
黑騎士跳左上去,攻擊。
只係普通既一擊,已經打到佢重傷。
好強。
不愧係海龍王。

「停手。黑騎士。」龍人領主企左出黎,保護骸骨龍。


「你係到做緊咩?你要包庇佢?」黑騎士問。
「同我撤退,唔係既話,唔好怪我唔客氣。」
「憑你?」

龍人領主一步一步行左過黎。
由人,變成左條黑龍。
弊!呢種力量。

【世界的破壞者】黑龍-尼德霍格 LV99

HP:987523
MP:999999

力量:8685  敏捷:8647
防禦:9234  魔力:9999



全status接近封頂既怪物。
就算係龍王……對佢都未必有勝算。
已有 0 人追稿