「係你贏左。」天照好爽快咁講。
佢嘆左口氣,有少少無奈。
已經投左降。

贏左?

大戰終於勝利了,大家興奮嗎?

「再打落去都無意思,你識得用空間魔法。」天照繼續講。





投降?
咁快手?
唔會有伏掛。

「唉,今次你贏……不過都無下次啦。點解你要殺我?」天照問。

唔想回答。

「比你做左唯一既神,你想建立一個點樣既世界?」





我停低左落黎。
望住佢,無再郁。

你想建立一個點樣既世界?

「當然係我自己想要既世界啦。」

「咁樣,你就會滿足咩?」

「當然。」





天照笑左一笑。
佢伸左下懶腰。

「你開心咩?」佢再問。

「開心。」

「依家既你,開心咩?」天照再問。

「開心。」

其實我都無必要答佢。
只要我殺左佢,我就會成為果個世界唯一既神。
可以創造屬於我既世界。





你想建立一個點樣既世界?

首先要殺哂全世界既生物先。
然後,再重新創世……
創世?
咁個世界會係點?

你開心咩?
……

「開心。」

然後,我捉實左天照個頭。
只要用暗影長槍,就可以準確無誤咁爆到佢頭。




佢放棄左,合埋雙眼,任我處置。
只要輕輕講一句說話,我就會成為果個世界既唯一神。

「你開心就好。」
天照微一微笑。

「暗影--」

永別啦,大賢者……

「長槍」

幻像?
弊!
中伏!




係邊到?

天照係天空上面,出現左一百個光球,同時射落我到!

空間魔法!

用唔到?
點會咁?
我記得左……天照係可以封印特殊技能,包括空間魔法。
一時大意……居然無諗到呢一點。

光束太快,我避唔到。
我好似見到走馬燈。
見番以前發生既事。
點解以前既我會係咁毒呢?




我轉左生之後明明想重新過新既生活,點解會黎到今時今日呢一刻呢?
點解我會變成殺人唔眨眼既怪物呢?
點解我會手刃以前相識既同學呢?

大概,臨死前既一刻,時間係會過得特別慢。

點解我想要搶個世界番黎呢?

時間……

「時間暫定」

技能。
普通既技能,時間暫定,可以令到時間暫停幾秒。
短短幾秒之間,已經夠我反敗為勝。

暗影長槍今次真係打中左天照。
貫穿左佢身體。
佢跌左落地,郁唔到,好辛苦咁望住我。

佢仲係到笑緊。
點解,你係到笑乜?
然後--

佢斷左氣。