海龍王。
海龍王依舊懸掛係天空之上。
藍色、白色既鱗片係到反光。
好刺眼。
係絕對打唔贏既對手。

海龍王張開口。
一道冰冷既吐息攻擊過黎。

約翰展開詠唱。


次元障壁。
擋住左龍王既攻擊。

風龍王身受重傷。
已經無哂戰鬥能力。
呢一刻就只係得返我同約翰。
最後既兩個人。

我條尾斷左。
無左條尾,意味住我大多數既技能都用唔到。


無論係究極光束定係蠍子毒尾,麻痺毒針定係暗影長槍,大多數既技能都已經用唔到。
我淨係可以用蠍子之火呢招自燃既技能,仲有強化身體防禦力既外骨骼,同埋死亡之鉗。
死亡之鉗既話,我既左鉗外殼已經裂開,睇怕承受唔到幾招。

約翰既魔力睇都已經唔多。
身上亦都有多處既傷痕。

正面打贏白雪係無可能既事。
白雪實在太強。
完全唔係我地贏到既對手。



但係約翰對我點頭。
有勝算。
佢有個計劃。
嚴格黎講,根本唔係贏輸既問題。
的而且確係可以擊退白雪。
但係……但係……
咁樣根本無意思。

約翰只係想救我。
佢知道,再係咁落去,我地三個都會死係呢到。
而白雪係必須要剷除既對手。
但係咁樣做根本無意思。

約翰企左出黎,準備行上前面。


我即刻捉住佢隻手。
向佢搖頭。
示意佢唔好咁做。

佢輕輕一笑,亦都搖一搖頭。
主意已決。
阻止唔到佢。
我用力捉實佢隻手,佢就用空間魔法消失左。

白雪再次開口。
又係吐息攻擊。

以我既技能係絕對擋唔住龍王既吐息。
但亦都無擋既必要。
約翰出現係白雪既頭上。



殺死白雪係無可能既事。
就連整傷白雪,都係無可能。
之不過——

「發動特殊技能,空間魔法,隨機轉移。」
約翰最後對住我笑,然後連同海龍王消失左。

隨機……轉移。
姐係話,轉移去一個未知既世界到。
唔係RPG世界。
唔係香港。
希望白雪再無返黎呢到既能力。
代價就係,轉移去到未知世界既瞬間,白雪必然會將約翰殺死。
令到約翰唔可以再返黎呢個世界。



成功左。
但係好空虛。
白雪消失左。
約翰都消失左。

「做得好啊,如果傳送去RPG世界,梁同學一定會包庇班長。」
阿斯塔錄嘆氣道。

我即刻行上去。
衝埋去阿斯塔錄到。

身邊既子彈蟻即刻撳住左我。
甚至用埋槍頭指住我,但係無扣下板機。



「NPC,你無必要跟住梁同學既諗法黎行動。」
阿斯塔錄說。
我只可以望住佢,連半個說話都無講出口。
已有 0 人追稿