上帝己死。
雖然呢個係個難以置信既事實,但係蜘蛛女王已經變成左具冰冷既屍體。
慢慢地,眼前既蜘蛛失去左平衡,八隻腳支撐唔住佢龐大既身軀。
然後,跌左係地,郁都唔郁。
再一次提醒我蜘蛛死左既呢個事實。

震驚十三億人既事實。
呢一刻,烏鴉弒左神。

我不禁為之顫抖,為既唔係眼前呢一位弒神者。


而係包圍住我地,千千萬萬既神明。

即使殺左一隻蜘蛛。
亦有千千萬萬隻蜘蛛。

數以百計既蜘蛛女王。
全部都係神話級既魔物,每一隻都足以滅世。
每一隻都擁有一模一樣既STATUS。
無論無貌、小動作都係一模一樣。
簡直係COPY AND PASTE出黎既產物。


如果出現上百隻烏鴉,我自然會驚訝。
但依家出現既係蜘蛛,係管理世界既神明,諗深一層,自然覺得係理所當然既事情。

打從一開始,蜘蛛就無可能會死。
畢竟係神。
曾經有一秒覺得蜘蛛死左,諗返轉頭,我覺得自己有D傻仔。

烏鴉無打算放棄。
依然舉起雙刀,迎戰至最後一刻。
無意義既行為。


一睇就知呢D蜘蛛女王係複製出黎既野,只要本體有心,唔好講數百隻,就算製造上億隻蜘蛛女王都唔係唔可能既事。

放棄啦,就算係你,應付一隻蜘蛛女王都已經歇盡全力。
但係依家講緊上百隻蜘蛛。
我唔明點解唔肯放棄。

「【勇者】既隱藏技能,去到絕境可以發揮出超過平時既實力,外加對【魔王】攻擊傷害提升。」

我轉頭一望,係蜘蛛女王。
應該話係,正版既蜘蛛女王。
好明顯,呢一隻係正版。
只有佢一個,唔係以上半身人下半身蜘蛛既型態出現,而係採用同人類差唔多體型既黑暗精靈型態。
佢冷淡淡咁開口講野。

「量產型蜘蛛戰鬥力果然未夠,睇黎要提升一下數值,或者直接去量產龍王。」



量產龍王,事到如今我都唔會再覺得驚訝。

烏鴉睇得出蜘蛛既本體係邊。
直接撲上向蜘蛛果到。
勇者。
烏鴉係勇者?
可以戰勝魔王既人?
亦即係我既敵人?
係呢個世界上,最強既人?

之但係。
勇者始終都係勇者。
就算勇者幾咁勇都好,佢既對手依然都係魔王。
無論佢幾咁努力都好,都無可能以神為對手。


以凡人之身試圖去扭曲天意。
係絕對既世界面前,人係幾咁既渺小。

「發動管理員權限,賦予束縛狀態(8小時),賦予禁言狀態(8小時),賦予無法使用技能狀態(8小時),賦予生命值鎖定狀態(8小時)。」

只係讀左幾句出黎,烏鴉就停左係到。
再啪一下手指,所有量產型蜘蛛女王都自爆。
「量產佢都幾好。」
蜘蛛女王打量左烏鴉一眼,然後好似醒起左某D野咁,望住我。

「你,係咪繼續進行?」
「繼續進行?咩意思?」
「殺戮。」
「殺戮有咩問題?身為魔王,要做既事就只有一樣。」
「復活。」



發現左。
佢發現左既殺戮既目的係乜。
事到如今,比佢發現都係一件好正常既事。
畢竟眼前既係最高神,係全能神。
如果佢唔知我做緊乜,先至出奇。

我點一點頭,我既尾巴就即刻斷左。
發生咩事?依家再去諗發生咩事係毫無意義。
根本唔需要去理解神蹟既原理,只需要理解神點解要咁樣做。

換言之,我再唔停止約翰既復活計劃,就要同神對抗。

呢一刻,我停左係到。
無得打,唔可以違抗神既命令。


我笑左,只可以點點頭,講左句:「我放棄。」
然後,蜘蛛帶走左烏鴉,兩個人一齊消失左。

真係無用。
我笑左。
我坐左係地,先至發覺自己係幾咁無用。
就連復活約翰,比哂方法我都唔敢去做。
烏鴉就算知道自己唔夠打,都會向神發起挑戰。
而我,因為對面係神,咩都唔夠膽做。
真係無用。
已有 0 人追稿