自殺以後，進入了RPG的世界: ☣力量

我永遠不會忘記那一天。

暴力不能解決問題。
但沒有力量的話，沒有人願意和你一起解決問題。

一直以嚟，我都不過係個普通既爛仔。
讀唔成書，終日蝦蝦霸霸去搵兩餐。
世界大事唔關我事。
無論係身為祖國既西班牙，定係敵人既法國，對我嚟講都係遙不可及既存在。
為咗生存，就要傾盡所能。




殺人。
被殺。

身邊既親人喺我好細過既時候，比黑幫殺死。
諷刺既係，為咗生存，我必須加入黑幫。
我既雙手又葬送咗幾多個家庭？
又製造咗幾多個「我」出嚟？
我既故事，不過係個惡性循環。
因為比人剝削，就只能去剝削其他人而活。
殺人，總好過被殺。




呢個係我既生存方式，係我一直以嚟既生存之道。

轉眼之間，我成為黑幫入面武鬥派既代表。
殺人無數，得嚟既戰鬥技巧。
不亞於軍人既戰戰鬥能力。
近身格鬥，以至係槍械使用，我都一一登峰造極。

「但係你好悲傷。」

妓女咁樣同我講。




我用槍指住佢個頭。
佢喊咗，眼淚滴咗落嚟。
佢唔係因為恐懼而喊，而係因為我而喊。

幾十年既生涯，換嚟既只有空有一身既力量。
連野花都守護唔到既臂力。
只此以後，我同嗰個女人連結咗。
佢喺我身上受到保護。
而我喺佢身上得到慰藉。

之後，我就成立咗隊傭兵。
不分陣營，只會認錢，比得起錢就係朋友。
戰場上殺敵無數，為既只係想得到更多既權力、金錢去保護我既女人。

女人生咗個女。




嗰一刻，係我人生最光輝既時候。
我終於搵到自己喺呢個世界入面既歸宿。
搵到自己既存生意義。
屬於自己既，係呢個世界上生存過既痕跡。

為咗保護我個女，我再一次拎起步槍殺敵。
唔單係為咗保護佢，仲要係想開創個不一樣既未來。
未來呀。
希望佢唔會走咗同我一樣既道路。
希望佢可以好似平凡既女仔一樣，自由自在咁生活。
唔駛為咗生存而歇盡所能。
所以，所有既污糟嘢由我嚟做，因為呀，無未來既，只有我一個就足夠。

戰鬥。
殺敵。




血洗一切。
戰友死既死，傷既傷。唔緊要……預咗架喇。
戰友會安息既。
而我，屋企仲有老婆同個女喺到等緊我。
就連我都差啲葬身咗係戰場上面。
不過我唔會死，因為仲有屋企人等緊我……

完成委託後，返到屋企。
淨係見到個女喺到，老婆不知所終。
個女本身係個好活潑開朗既人，唔知點解變到寡言，唔敢講嘢。

哈。
後尾先知我生意上既一個敵人，帶住佢既傭兵，嚟我屋企搵我悔氣。
我唔喺到，於是就捉咗我個老婆，當住我個女面強姦佢、帶走佢，捉咗佢去做性奴隸。
喺呢一刻，我痴咗線。




發哂顛咁問個女，點解你唔去保護你阿媽？
點解你可以袖手旁觀？
點解你可以殺咗佢哋？
你老豆係傭兵，係呢個鎮上面最好打既人。
點解你咁廢咁無用，連自己阿媽都保護唔到？
連拎起枝槍，拎起把刀既勇氣都無，完全無保護阿媽既心？
同埋阿，點解你可以無事？

自此之後，我就無再理過我個女。
求其將個女放去個朋友屋企到就算。
我當無生過呢個女。
呢條女，以後一切一切，發生咩事都好，都與我無關。

結果我終日借酒消愁。
再一次回去過去既嗰種生活到。




之後過咗幾耐呢？
唔知，我無再數。
終於有一日，我的起心肝去查老婆既事。
然後比我知道真相。

乜嘢強姦，乜嘢捉咗去做性奴，統統都係大話。
嗰個女人，係自願跟我敵人走既。
甚至係，嗰個女人主動去接觸我既敵人，勾引我既敵人。
多得呢個女人，我唔知幾多兄弟戰死咗係沙場上面。
本來仲諗住殺埋我，點知我好彩，死唔去，哈。
點解嗰陣我會咁好彩？點解唔直接殺死我？
原因就係，我只係一個一味識戰鬥既傻仔。

我有諗過自殺。
但最後都無勇氣咁做。
呢個時候，我諗返起自己既親人。
佢哋死既時候，我又咪係乜嘢都做唔到？
只係識坐係到，乞求敵人饒自己一命。
然後，我又諗返起自己個女。
我呢一生人，勞勞碌碌，究竟得到啲乜？

我錯咗。
我唔應該就咁就將個女交比其他嚟照顧。
但係事到如今，只要佢得到幸福就得，我無資格喺佢身邊守護住佢。

有朋友介紹我離開呢個國家。
去入某個特種部隊到做，重新開始過新既人生。
我摇頭。
我既人生到此完咗。
就算再去揭開新既一頁都無意思。
我剩餘落嚟既人生，都只會為咗一個人而活。

世界大戰爆發。
西班牙對法國。
兩國戰鬥我絕無興趣。
但我絕對唔可以比佢再受傷害。
即使之後我無再同佢見過面，佢依然都係呢個世界上，對我嚟講最重要既人。

再次拎起步槍上陣殺敵。
將呢個小鎮，由兩國之間既戰鬥入面獨立出嚟。
為既唔係錢，唔係權力。
而係生存既保障。
唔係我既生存。
而係嗰一個，我好耐無見既少女——

保護佢既未來。