狗公。
網絡上面都有狗公。
打機既時候,當有玩家自稱係女性既時候,身邊都會出現狗公。
只係估唔到,依家都有姐。

依家既情況係,我地四個出發去做任,好似係要打低唔知咩怪,其實我都無留意個任要做乜,只係一尾跟住佢地。
戰士係咁撩天照講野,弓手就係到鬧戰士。
簡單D黎講,當我無到。

又比人無視。


是但啦。

黎到一個森林,佢地就開地圖黎睇。
是但啦。
不過黎到森林都好,唔洗浪費咁多MP,起碼唔洗對住魔物用幻像魔法先。
雖然我用左幻像魔法姐,但係實際上技能都無變。
我一開技能,比佢地發現到輸出好高,咁咪弊?
係喎,咁天照呢?佢點搞?
唔知呀,由得佢啦。



突然之間,出現左幾隻蟲。
係10LV既鬼靈爬行者,哦,係我一開始既種族。
應該係唔食得,唔係既話會肚痛。
唔係唔係,我唔係黎食野架,係黎做任架!
戰士同弓手走左上去同佢地打,好快就打死左果幾隻蟲。
唔,係咪應該去提佢地唔食得呢?
唔係囉,正常人係唔會捉魔物黎食架囉!

天照無出手。
佢係咪都係諗緊呢個問題呢?



我發覺,我真係唔適合同人組隊,都係自己一個打仲好。
話時話,個任係要做咩架呢?
我想開口問,但係都係懶得問。

行下行下,行左入個奇怪既建築物到。
異樣感?
係一間工廠?
呢個世界會有工廠架咩?
可能有,唔知。
我望一望天照,佢依然對住我傻笑。
去死。

奇怪既感覺。
附近好少魔物。


似曾相識既感覺。
不安。

【人類殺手】 阿特拉克·奈克亞 LV56

HP:7096
MP:10654

力量:716  敏捷:1041
防禦:706  魔力:987

怪物?
係人面既蜘蛛?
類似我既生物,不過佢本體依然係隻大蜘蛛,不過個頭係人頭。
而我就係得個人頭,無腹部。


呢種水平……對我黎講唔係難度,但係對40LV左右既冒險者黎講,根本就係惡夢!
如果係4個40LV去打,都有D困難?

佢開技,係蜘蛛結界!
可惡!束縛住哂我地!
開技殺左佢?
唔得,咁會暴露我既身份。
一係試下用D無咁高攻既技能!

生命連動!
我既HP同佢相連,然後佢每秒流1%HP過黎我到。
仲有微毒送添!
雖然用緊呢招既時候郁唔到,但係反正我都無其他技能可以用。

天照走過黎拍左我膊頭,咦,你幾時解開束縛架?


「行啦。」
佢細細聲同我講。
去……邊?喂?佢已經拉左我走。
果隻大蜘蛛單靠弓手同戰士真係搞得惦?
喂喂,你想拉我去邊呀?

天照帶我一步一步深入工廠,沿途上面既怪物全部比天照收拾哂。
唔理係小BOSS定係成堆既怪物軍團,佢都全部殺清光。
大賢者真係可怕……

「到啦。要打BOSS。」
BOSS?頭先果隻大蜘蛛已經唔係BOSS?
推開到門,然後見到……

係一隻巨大既人型生物,十米高。


頭係一隻八爪魚,觸手好似鬍鬚咁郁黎郁去。
背脊係一對蝙蝠翼,有少少發育不良,睇起上黎,比例較細。

【奈亞拉托提普的僕從】 克蘇魯 LV84

HP:156941
MP:98765

力量:5206  敏捷:2467
防禦:4788  魔力:2697

係……外星人?
呢到都有外星人?
今次弊……
以我既力量黎講,係佢面前只會比佢秒殺。
就算係天照,都未必夠佢打。
要搵人黎處理先得!
搵邊個?地龍王?
屌,條友連自己樓上果隻外星人都未搞得惦……

「聖光鎖鏈」
天照張開手,然後地面上突然之間出現左幾條光束鎖鏈綁住怪物。
[束縛]

「你係咩人?」怪物問。

天照笑一笑:「我只係路過既,大魔法師姐。」
「魔法師?點睇都係神官!」

怪物舉起手,然後地面上爆哂D觸手出黎,伸去天照到。
弊!要開結界幫佢……唔係喎!
天照又開多次聖光鎖鏈,綁哂佢所有觸手。

天照笑一笑,然後飛左上天。

查一查天照既數值!

【大賢者】 精靈-天照 神官 LV99

HP:8432
MP:13964

力量:768  敏捷:975
防禦:753  魔力:1521

「係時候比你見識下神官LV99先學識既技能啦,小蛛蛛!女神之劍」

然後,天照後面出現左女神既巨大幻影,同教堂既女神像一樣,用塊布包住左自己塊臉。
女神拎住把劍,一下劈落去怪物到。
秒殺。

講……講笑咋下話。
以佢既數值,就算所有數值後面加多個零……都無可能秒殺到佢下話。
就算係神官最強技能,都無可能強到呢個地步……
[女神之劍:用魔力召喚女神的幻影,對單體敵人造成極大量無屬性傷害,然後將傷害轉換為HP為我方成員回復,再將我方所有負面狀態移至敵人身上]

天照又對住我笑。
大賢者……根本就已經去到大地龍王既級數。
唔係,甚至係大地龍王之上。
呢個人,絕對有問題。
佢既笑,真係令人心寒。
已有 0 人追稿