經過我地一大輛既辛苦,終於扣到佢30000血左右啦!
距離成功在望!
仲有唔到20萬血咋!

打條撚咩。
邊有副本BOSS突然間衝入黎村莊到大屠殺架?
佢仲要一拳一個,根本就打唔到。
動員哂成個魔王城既兵力都打唔贏囉好唔好?

慘,咁就比人滅國。


天災真係好恐怖。

火龍又繼續噴火,火焰係我旁邊到爆炸。
我呆左咁企係到。
係喎,魔王城地底唔係有條龍架咩?點解唔放佢出黎打?

我望向四周圍,全場既人都打緊隻龍,得龍人領主同我一樣企左係到。
因為佢係用火魔法,所以完全幫唔到忙。
佢咬住嘴唇,唔知想點。



惡魔領主衝左上去,靠佢坦王。
同之前果個比人打左落街既獸人領主唔同,亦都唔知係到亂打既偽魔王,佢每一劍都落得好準,亦都小心唔比條龍打中。

「黑暗斬擊」
惡魔領主雙手握劍,一道劍氣之類既物體就飛左出黎,打中條龍個頭。
作用唔大。
但係下一秒,惡魔領主已經飛左上去佢個頭上面,想要用劍插盲佢對眼。
插唔中,即刻比條龍FING甩左落黎。

依家可以做到戰鬥力既領主得番我、惡魔領主同埋偽魔王。


排骨、獸人比佢打左落街,龍人領主咩都做唔到。
仲有一大堆廢既士兵做支援囉。
人數上面,士兵的確係有優勢,但係全部都唔係D勁既人物。

算啦。
出手啦。
我唔出手既話,佢地係無可能贏。
幻像魔法對條龍無用,MP消耗太高。
而且,火焰技能無效。
仲有,
[龍之逆麟:受到的魔法傷害無效,物理傷害減半,30%血以下全STATUS上升。]
龍種特有既技能。

睇番我既技能,原來除左幻像魔法之外,其他都無乜影響。
如果講話係蜘蛛結界既話,其實作用唔大,因為條龍由一開始到依家都係無郁過。


魔法反制亦都有問題,究竟咩技能屬於魔法技能呢?
呢個我判斷唔到,只可以亂咁用。

但係,我有針對大型BOSS既殺手鐧。

毫無預兆地,我衝左上去。
瞬間黎到龍爪面前。
蜘蛛毒牙。
由於猛毒有最高傷害限制既關係,毒牙每秒只可以扣到1000血。
但係1000血已經係非常之多。
對於其他人既其他技能黎講,要比[龍之逆麟]阻隔之餘,仲有經過埋佢超高既防禦,實際上魔法或者物理傷害既上位技能都只係扣到七百左右。

當然啦,我對呢每秒1000血係唔會滿足。
生命連動。
每秒傳送佢1%HP落我到。


但係,一樣最多都只可以每秒1000HP。
姐係話我可以每秒扣佢2000血。
雖然,生命連動有個巨大既缺點。
就係用緊既時候我郁唔到。

火龍發現左呢點,係咁攻擊我。
可惡,咁既話我就用唔到生命連動!
可惡!坦係到做緊咩架?
唔係,冷靜少少先,係仇恨值既問題。
我做成既傷害實在太高,比起惡魔領主佢地高好多。
姐係話條龍打我係正常既。

咁落去唔係辦法。
即使每秒扣到1000血都有排扣。
20萬血姐係話200秒。


要捱200秒就贏,講上去好似好易咁,實際上難過登天。
佢可以一炮秒一個人。
如果係AoE技能既話,一開技死既人,十隻手指都數唔哂。
我地捱到1分鐘已經係奇蹟。
何況我每10秒就要埋一次身開一次蜘蛛毒牙。
呢樣係無可能既,因為條龍一定會追住我黎打。

終於,我比佢逼左去十幾米之外。
完全埋唔到身。
一埋身既話,無數既火焰飛彈就會射過黎。

「火流星雨」
條龍張開口,然後天空上面出現左無數既魔法陣,然後無數既火焰飛彈從天而降。
呢個仲唔係魔法?
魔法反制!


反制成功!

我太意啦。
火流星雨只係魚餌。
我比佢噴出黎既火打中。
已有 0 人追稿