留意到有人話我鳩真係好撚嬲囉。
不過算,亦都有人話我可愛,見佢咁誠實我就原諒你。
下次既話我就晚黑去你屋企。

好。
逃走成功。
番到黎屋企。
唔夠做。
同神打真係唔係幾夠打。
睇黎真係要請神打先至夠神打。


WAKAKAKAKA
好撚好笑呀屌我老味。
自己講自己笑真係好鳩可憐。

好啦,認真。
點樣同宙斯打。
定係改一改變目標先?
依家要做既野應該係得兩樣,好似係。
一係打低宙斯。
二係製造外神。


外神果邊真係無頭緒。
番去RPG世界問下外神佢地係點樣出世?
都得,不過好似會整到好混亂。
本來已經好混亂,我唔想整到更加混亂。
所以,都係打低宙斯先。
似乎打低宙斯都唔係咁難。
其實唔難。

前世既我好似就黎醒番。
所以我又繼續扑番暈佢。


然後,用幻像魔法變成前世既我個樣,試下去跟蹤宙斯。

點知,一出街,就比個西裝友纏住。
似乎係一個好有錢既人。
應該係果D乜春野意大利名牌老西。
又戴哂金勞。
睇個樣,應該係個鬼佬黎。

「你好,我係加百列。」
西裝友比左張卡片我。

嗚呀!
又出新角色啦!
記唔哂咁多個人呀!
個腦就黎爆炸啦!


成鬼日都出新角色!
點撚樣記呀!

望一望張卡片。
無咩特別。
係一張白色既卡片,無任何點綴,上面得兩行字,然後咩都無。
就連聯絡方法都無,真係卡片黎?
上面寫住:

三百人委員會
加百列

直覺話比我知,依個人唔係普通人!

「有無聽過陰謀論呀?」加百列問。


「……咩陰謀論?」
「你知道嗎?Google應該係上世紀最偉大發明之一。」
「……」

佢啪一啪手指。
然後,時間暫停左?

「有人認為我地係掌控住地球所有國家既經濟、攻治,實際上又點止咁簡單呢?」
「直接講啦,講咁多廢話做乜?」
「唉,想營一營造氣氛姐,乜你咁架。果邊既世界比較簡單,三個人就可以管理到,呢邊呢個世界就複雜D,要300個人。」
「你係……?」
「無錯,我地係神,呢個世界既神。」

咦?
呢個世界既神?


宙斯天照佢地係RPG世界既神,然後呢個加百列係地球既神?
地球神見我有咩目的?
黎追殺我?
唔係掛!
避到黎呢到都要死?

「你都幾犀利架喎。」
「你地既目的係咩……想要殺左我?」
「雖然你地既事對我地黎講係無咩所謂,但係作為世界既管理者,互相幫忙都係應該架姐。」
「等等先,你都識講啦,你同宙斯佢地無咩關係,佢地既事你唔應該插手架……」

嚇到就黎瀨屎。
咪住。
唔使驚住。
如果係神既話,直接殺死我就得啦,講咁多廢話做咩?


冷靜少少先,一定有轉機。

我:「就算你地幫佢都無咩好處架啦,不如黎幫我啦。」
已有 0 人追稿