唔係掛！原來真係有鬼！－現代捉鬼故事: 第三章－不平凡的開始－10

旺角有個行人專用區，
一兩年前開始，每個星期六日都有一班班唔同既人表演。
有認真唱歌架啦、賣藝既，亦當然有一班唔知做緊乜野既阿叔阿嬸。
如果你有星期六日夜晚出旺角行過，你一定知我講緊乜。

我唔係想講Ｄ咩地方文化，我只係想講依家條路迫到行都行唔到。

其實我真係唔係太明有一種人，可以o係呢類行人路進出自如，甚至可以食埋煙都仲得。
我前面就有一個呢種人。





由一落學校第一步開始，MK妹就拎左支煙出黎食。
老老實實，一個女仔更正都好，一食煙就乜形象都冇曬。

無啦啦落堂叫我去食飯，我已經覺得有少少陰謀。
唔通佢比我既美色吸引到？！
冇可能丫，我咁既尊容，我都有少少自知之明既。sad
咁到低係咩事佢要約我食飯呢。

我已經諗到入曬神，一直向前行。





「beep!!!!!!!!!!!!!!」

突然有一聲響聲將我由最終幻想入面拉出黎。
好....等我睇番依家身邊發生緊乜事先...
係一架紅色私家車，佢就正正o係我右邊唔夠10米既地方。

重點係架車係對住我好快速咁過緊黎。
呢個時候我先發現我自己企左o係馬路中心。
行人過路燈既公仔係紅色既。






今次仆街了。