「你做乜合埋眼呀?」唔知黑定白無常大大聲咁問我。
之前睇書又話死左既世界好安靜。原來唔係本本書都係真,最起碼我依家都仲覺得好噪。

我低下頭,「驚呀嘛老細,我未有心理準備死架,我仲係處男黎架。師傅,我頭7o個時比我返陽間了埋呢個心事先得唔得呀。」講講下我自己都想喊,估唔到我既遺願只係個MK仔每晚都做緊既事,突然我覺得我既人生好悲微。

悲微到連自己都想笑。

「好啦,我應承你!咁你打開眼啦!」黑白無常原來都幾好人,
起碼佢地都好似以前D電視劇咁,死囚上路之前都比隻雞脾我食。
對一個未食過雞脾既人,我真係已經聯想到自己食既時候,會喊住講:隻雞脾好好食。




食到一半,衙差就會走入黎大叫:時辰到喇!

死之前都只可以諗番起TBB既劇,是否悲哀。
阿孫,第時WIKI發左牌記得燒套警界線比阿爺。

呀,我唔記得我自己唔好話仔,連女朋友都未有。
算啦,希望Steve Jobs呢兩年有d 貢獻。

「你肯開眼未呀?」估唔到死左之後,連合埋眼既權利都冇埋。
我慢慢打開眼,眼睛可能比頭先幻想既情節感動,少不免有兩滴眼淚影響到視線。




前面有個模糊既人影,黑色一pat。
 頭先同我講野既原來係黑無常。佢既高度只係到我個頭一半,咁講真,佢都幾矮。