校園愛情治療師: 冷清的球場

「打開你本中史書第143頁，
我地今日繼續講唐朝，
有冇同學記得上次講到邊度？」



「無聊嘅中史堂。」趴喺枱面上嘅我心諗，
望一望旁邊，
唔少同學都準備好進入神遊周公嘅狀態，
中史已經多字，你仲要照書讀，


加上琴晚都冇咩點訓，我好快就訓着咗。


……

再次醒番嘅時候已經小息，
我行出課室去廁所，
迎面而來係許璐琳同佢嘅朋友，
佢望落去仲有啲失落，
睇黎舊愛仲未同佢復合，


佢抬頭輕輕望咗我一眼，好快又耷低頭，
不過佢朋友用眼神警告我唔好出聲。
都好反正本身女神同凡人都冇任何交集，
我唯有笑一笑，繼續前行。

好快就放學，返屋企，等家姐放學，
煮飯，正當我洗好碗準備換衫出去跑步時候，
我聽到開門嘅聲。

「今日咁早返黎。」家姐坐係梳化上面講。


「冇事唔撚得早返黎呀？」
「廚房入面有餸。」

我一打開房門，

「吊你老母，見到我返黎唔撚打招呼，
又去邊撚度。」
「書又唔撚讀係度學人出夜街，冇尻用，
喂！吊你我未撚講完……」

我冇諗住理佢，直接係佢面前走過，開門走咗出去。









去到熟識嘅海濱，跑步嘅時候，
我習慣將往事嘅碎片一一喺腦海入面重播，
首先係James哥嘅委託，唔知啊輝有咩計畫，
同埋頭先屋企發生嘅事，只要發生嘅事，事無大小，
唔係嗰個男人鍾意嘅，就會亂發脾氣，
好彩唔係成日見到佢。我又諗起許璐琳嘅神情……
我好似仲有一樣野唔記得咗，但又醒唔起係咩。


遇過 很多很多戀人
一朵花跟森林
你未決定哪邊合襯


如何投入你情感


我跑到咁上下，去到近住球場嗰邊嘅石櫈坐低，
球場都係咁冷清，不過我就係要咁冷清，
方便我諗返起唔記得嘅野，好似係同家姐有關……


「喂喂。」喺我覺得就黎諗起嘅時候，
有人拍一拍我膊頭。

熟悉嘅聲音喺我腦海入面同其他野撈埋一齊，
搞到我仲亂，本身有嘅靈感全部冇曬，
我有啲嬲咁望向身後。
就見到一個女仔笑住咁望住我……