我們中，出了個叛徒: Line 29

　　風輕輕吹過頭髮，也不用整理什麼，臉上好像沾上了什麼，我邊走邊用手巾抹了抹。鬆了一口氣，經過兩條彎路和斜路，穿到大道上。
　　忽然一陣怪風吹過，面前似是多了個影子，還沒看清就把我推倒在地。
　　「我問你！玲姐係咪死咗？」好像是阿朗，我整理歪倒的眼鏡，才看清他帶汗緊張的樣子。
　　「哈……未……冇。點解咁講？」我冷笑了一下，現在也不知道該相信誰。
　　「咁……咁點解，佢會係加油站前面消失咗？」阿朗依然把我按在地上，雙手緊捏我衣領。
　　我吁了口氣，說：「簡單蒞講，我地撞車，佢部電話同部車一齊燒咗，夠唔夠簡單？」我嘗試拉開他的手。
　　阿朗想了一想，問：「真係？」他稍稍鬆開雙手。
　　「係未死啊，佢同阿儀係前面個消防局到啊。」我想只有我明白他這兩字的含意。我索性推開他，站起來掃掃身上的塵。
　　「咁我去睇下佢。」阿朗帶點尷尬地說。但他明明就不算入那「四人幫」裡，到底為什麼他要如此緊張。 他準備行前，又問：「得你知？」
　　「應該係。」我說，看他點了點頭，走上了幾步，我忽然有個疑問：「喂？見唔見其他人？」




　　「佢地去緊。」阿朗說罷就一溜煙往消防局跑去。
　　還好，他沒帶我同行。
　　按阿朗所說推論，他們很快就會趕到阿儀的位置。阿朗現在趕過去，不遲不早，就算不帶走她倆，也至少能保護二人安全。
　　既然如此，我決定繞過消防局，走回迴旋處，想要從停車場那邊走到入口。還未想通的事情還有很多，像「掩飾計畫」的成員、有沒有新加入的人或是新的計畫；浩仔是故意輕輕弄傷玲姐，抑或如我所說是手用不了力；阿凱和阿儀又計畫過什麼；卓仔的計畫進行得如何；但更重要的是，這處就真的是終點嗎？而為什麼這處會成為這場無聊遊戲的終點？
　　想著想著，就快走到鐵路站之前，如無意外，這裡將是我們結束所有虛構事情的地方，回到現實，所有人依然是我的朋友。
　　但這樣說，按編劇邏輯，又就快出意外了。
　　呿！只是我的幻想罷了。回想過來，最近都沒什麼機會好好獨自思考一下，其餘的九個人，到底在打什麼算盤。還有在學校裡的我們四人，感覺又疏離又怪異，依舊想不通到底是哪裡出錯。我禁不住要弄清其餘十一人的關係，便走到這個鐵路站的控制室稍休，順道填肚充饑。
　　「小心女人講耶」沒猜錯是「小心女人說話」的意思吧？那他是指所有女性玩家，抑或只是她？要是只是她一切也比較好辦……也不算比較好辦，就只是比較清晰罷了。不過，浩仔為什麼要刻意提醒我要當心女人說話？要是協助自己的小隊勝出，為什麼不遞給同為「掩飾計畫」的玲姐呢？
　　若玲姐所說的話屬實，玲姐、Hugo、浩仔就是組成「掩飾計畫」的初始成員，還有一個…….我猜是女性；而我就只是他們口中：要保護全部人到終點，而控制的棋子吧？可惜，為我們可惜。
　　但，這就出現更奇怪的問題：浩仔不是與卓仔為伍嗎？這個牆頭草真的好氣又好笑，到底他決定與哪一邊為伍啊？那他狙擊我們，又有什麼好處？




　　忽然感到一陣倦意，想著想著便睡了過去。
　　「起身啦。」我迷糊之間聽到一把男聲，連忙睜開眼彈了起來。
　　「又唔使咁驚，係我。」阿凱邊吃乾糧邊說。
　　「你點會係到！唔係失蹤咗咩？」我望了望鐘，原來只是午後，也罷，睡了幾小時。
　　「晴晴同我係分開咗……行，佢見我好似冇理佢之後，粒聲唔出自己去咗唔知邊，位置都冇埋。我見佢咁有把握我費事理佢啦。」阿凱無奈地說。
　　「我幾驚你出事，你又知我係到？」我嘆了聲。
　　「你係到我咪係到囉，你瞓教嘈過隻豬，我緊係知你係到。」阿凱笑住說。
　　「痴線！我唔打鼻鼾。」口水倒是流到嘴角，我連忙擦了擦。
　　「咁我要聽實聽到。」阿凱指了指戴在耳朵的耳機。
　　我呆了一呆，忽然想起了什麼，問：「你係咪連咩方向都聽得好清楚？」




　　「咁就緊係啦，唔係有咩用？」阿凱緊接說。
　　「我地要快啲走。」我說，匆匆收拾行裝。
　　「做咩呀？係到好地地休息下先啦，又冇怪人係附近。」阿凱說。
　　「要揾人，佢可能有危險！」我說。
　　我沿住馬路走回頭，阿凱邊追上我，邊問：「到底係咩事，令你咁心急？」
　　我突然恍然大悟，停下了腳步，問：「阿凱，你聽唔聽到有人尖叫，或者係好多腳步聲，又或者係怪人聲聚集嘅地方？」
　　阿凱雖不太懂我的意思，但點了點頭，說：「我聽聽啦，我唔係聽得好遠架咋。」他續說：「2點鐘個邊有聲，但係好靜；邊到會有你講……係……係……10點鐘方向！」
　　「走！」我連忙說，馬上又回頭走。阿凱看我一時走東，一時走西，自然又問了一句。
　　我邊走邊說：「我地要去救浩仔。」
　　阿凱搶說：「浩……浩仔？去咗幫卓狗個個喎？」
　　我說：「我諗我誤會咗佢。」
　　阿凱問：「有啲咩誤會？佢都同我地唔同Team。」
　　我說：「你有冇聽過『掩飾計劃』？」
　　看他搖了搖頭，我才想起這只是我替它改的名，便說：「咁你有冇聽過玲姐佢地話要保住啲核心成員？」
　　阿凱疑惑地看住我，說：「你知道咗？阿儀同你講？」




　　我想了一想，阿凱應該早在酒店那時候便聽到他們的對話。我吁了一口氣，說：「我以為佢同我地敵對，所以我趕走咗佢，所有嘢睇落好似好合理，但有一點好奇怪；但係……但如果佢重係計畫入面，又重想同核心成員一齊走出去，咁所有嘢就通哂。」
　　阿凱似懂非懂，只好說：「咁即係點？所以呢？」
　　「所以我唔知點解有一種不祥預感，覺得浩仔會有危險。如果佢地諗得通個件事，都可能諗得到浩仔係反骨仔。」我說。
　　阿凱問：「到底發生咗咩事？你可唔可以講下。」
　　我突然停了下來，以低沉的聲線問：「你，頭先去咗邊？」
　　阿凱也停了下來，皺眉說：「我唔明。你而家算唔算係懷疑我？」
　　我又回復本來的臉容，笑了一笑：「我都係問下即。冇事，行囉。」
　　阿凱感莫名其妙，邊行邊說：「阿晨，你今日好奇怪，冇嘢嘛？」
　　看來我剛才神經緊張，破壞了我倆之間的信任，我連忙說：「冇啊。可能呢幾日太緊張。不過而家至少知道浩仔係企係我地呢邊。」
　　阿凱又搖頭說：「你都話佢係個核心隊入面，咁佢點會幫緊我地？佢地幾個都係想自己嬴。」
　　「咁點解你一早知都唔話我知，我係你地面前，係咪成個傻仔，可以畀你地咁樣玩？」我說。
　　「我地有諗過同你講架，但我地覺得你做得幾好咪……」阿凱說。
　　「算啦，呢啲時候係唔應該講呢啲無謂嘢。總之，浩仔救過我地，我地一定要救返佢。」
　　阿凱說：「到底發生過咩事？簡單講下等我冇咁亂啦。」
　　我說：「好難一次過講，總之佢冇殺到阿儀同我，我估佢重有嘢隱瞞。」




　　阿凱說：「咁阿儀呢？佢冇事嘛？」
　　我說：「冇，受咗少少傷，但已經係一個安全嘅地方休息緊。」
阿凱想了一想，忽然說：「不如阿晨，我地，再加埋阿儀一齊嬴就算啦。終點係呢個公園，係咪？」　　
我說：「係，大家都知道啦？」
　　阿凱說：「咁緊係，唔難估，提示唔多但都唔難。」
　　我說：「設計者有心放畀我地。」
　　阿凱驚笑，說：「你係話搞呢件事嘅有心等我地去哂，咁有咩意思？」
　　我說：「我唔知，但係我唔想其他人死！」
　　阿凱說：「夠架啦阿晨，做夠好人架啦。呢個世界唔係你諗到咁！救唔哂架！我明佢地係你朋友，但如果你都衝入去鬥爭，你都會好危險。」
　　我說：「我唔怕，總之你地一個都唔可以死！就算輸都要去到終點先輸，但條命一定要留係到！」我頓了一頓，又說：「同埋，阿儀而家係玲姐手上，你要救佢都唔係咁易。」
　　阿凱驚訝地說：「你講真？萬一，萬一佢地核心隊真係想獨嬴……」
　　我搶說：「唔會，我好肯定佢地有個隊員已經背叛咗，而家可能幫緊卓仔。」我回頭跟他說：「如果你唔去睇下浩仔係咪係個邊，可以唔使跟住我，我知道每個人都有佢地自己嘅計畫。」
　　阿凱嘆了口氣，說：「唉，我真係冇你乎。我又真係冇乜所謂，如果你咁有決心要咁做，我都會支持你…….喂，個邊好似好嘈好多怪人，我地會唔會畀佢呃咗？」
　　我邊跑邊說：「我地要快啲。」阿凱也跟住跑到入口。
　　入口的噴水池依舊運作，地面也相當整潔。只是閘口不再有服務的怪人看守，連個保安也沒有。我們跨過閘口，眼前的花圃看起來就與以往無異。




　　「我都好耐冇蒞過呢到，睇落冇咩點變。」我說。
　　阿凱疑惑說：「早幾月都好似唔係咁，又換咗樣？」
　　我不太懂他的意思，也沒有理會這等閒事，沿住入口的大街，跑往右邊的那個看不到雙手的遊樂設施。
　　「你肯定佢係到？」站在我後面的阿凱，跟我跑到了一個白頂、大橢圓形又有點螺旋設計的設施門口。
　　「肯定。如果等陣全黑，我就要靠你啦。」我說。
　　「得啦，交畀我。」阿凱笑了一笑，按了按耳側。「入面冇怪人。」
　　「好，行得。」我和他急步走進這座遊戲設施。
　　「我都係第一次咁行入蒞，我地成班好似冇一齊蒞過……呢到玩到冇嘢好玩啦。」阿凱和我走在漆黑的空間，回音頗大，空蕩蕩似是一個人也沒有。
　　我示意要進入軌道的位置，才能更進一步走到設施的中心；阿凱擔心「過山車」會忽然開動，我則表示這不是問題。
　　「好似係2點鐘方向。」阿凱說，這裡伸手不見五指，我也只得跟隨他。
　　「浩仔，係我。」我說，聽不到回應，我又說：「我到咗太空揾你啦。」
　　「嗤！人地改咗名好耐啦。」是浩仔的聲音。
　　我笑了一笑，說：「係咩？你冇事啊嘛？」我聽得出他帶點緊張。
　　「你條友……夠膽死係我褲袋放追蹤器……真係『Diao』出聲，咳。」浩仔說。
　　「你等多我一陣，我行緊過蒞。」我帶點焦急說。




　　阿凱帶我跨過軌道，來到了一處較為寬闊的空間，不小心就踢到了什麼。
　　「喂，踢到我啦淫哥仔。」眼睛似乎漸漸習慣這種暗黑的環境，好像看到了一個人躺在地上。
　　「你冇事嘛？」我問，他呼吸聲挺重的。
　　此時，阿凱在我背後拍了拍我的肩膀。
　　「哈，你再遲啲，我就企住行返出去架啦！」浩仔說。
　　「你冇事就得，係咪整親隻腳？我扶你出去。」我說。阿凱又拍了拍我的肩膀，我依舊沒理睬他，畢竟看清浩仔的傷勢較為重要。
　　「你最好就揹我出去啦晨哥仔，我同三眼仔都會好感激你。」浩仔說。
　　「哦，咁得啦，走啦。我地一齊出返去。」我說。
　　阿凱邊拍我的肩，邊大叫：「邊個！」話剛說畢，一陣風吹過，像有件硬物把他推倒。不是硬物，有氣息的，該是人！