我們中，出了個叛徒: Line 12

　　「快啲行啦。」我跟阿謙說。
　　「行呢邊係咪肯定啱架？咁黑。」阿謙邊追上我，戰戰兢兢地說。
　　「我知就好啦，咁就唔使入左呢個世界咁耐都出唔返去。」我說。
　　「呢個世界？呢到唔係現實世界咩？」阿謙吃了一驚。
　　「我諗唔係啦，除非現實世界係一夜之間唔同哂，得翻我地幾個。」我說。
　　「我冇諗過去左二次元……」阿謙是個日本迷，漫畫動漫看不少，自然地說出這句話。
　　「乜嘢二次元……」我打從心底一臉無奈，就跟表情「=.=」一樣。「我唔想知……我剩係想出返去。」
　　「你出返去會唔會反而唔會出街……」阿謙突然問了一句。
　　我呆了一呆，不知如何回答，看來阿謙問到點了。他看我表情，連忙說：「我都係講下架咋，你以前咁好動，點會唔出街。」阿謙是個老實人，他說的話帶有微微的溫暖，讓人覺得這個不高的樣子，別人看起來毒毒的，也是個好男人。
　　「過多兩條街就係間馬會。」阿謙忽然說。




　　「係。」我沒空理會投注站有什麼特別，只管四周張望。
　　「重記得我地有次樓聚，食完飯就蒞左一齊買六合彩。」阿謙說。
　　「哇，五六年啦喎，你都幾好記性。」我當然也想起了，以前塘尾道的確有一間投注站，但現在的情況根本不該想這些事情……
　　「喂，前面有個人喎！咁夜都有人，我過去問下。」一向不喜歡跟外人對話的阿謙朝那人走去，看得出他這下子也頗焦急。那個就像路人的人，穿上衛衣戴著衛衣帽，像是個男人，微弱的燈光照射下，他正低頭走路。
　　我正想答「哦，好。」的時候，忽然心覺不妙，連忙回頭，邊趕過來邊大叫：「阿謙，小心啊！」
　　我也聽不到阿謙說了些什麼，反正他早已正對住那男人，大概是說了些什麼？阿謙聽到我大叫，回過頭來想要問我什麼事。我連忙指住前方，阿謙不明其意，再次回過頭。只見那男人一臉灰土，沒有半點眼神，雙手一把抓住阿謙，緊緊地抓住他的雙臂。
 
　　「阿謙！」我大叫，只見他被那男人抓住，吃痛連叫幾聲。「救….我…..」他邊忍痛邊說。在這刻，我忽然想到的是…..那些年我們在一起遊玩英雄聯盟的時候，常開玩笑的一句：「吓……點救啊…..」竟沒想到在這刻變成真的不知如何是好……
　　我知道不能碰上那怪人，但要是不上前，阿謙就有可能被他牢牢抓住帶走，甚至可能直接掐死；我也不能大聲呼叫，怕會驚動附近也有這些怪人湧來；我也沒可能跟那怪人硬碰，偏瘦的我可能連他的手指也拉不開；我到底該用什麼方法……我有什麼辦法，救命…..
　　該說救命的當然不是我……在這幾秒中我就呆在他們面前，在這危急關頭我變成一塊石像……「推開佢、推開佢！」我忽然大叫…..




　　推開他？我傻的嗎？要弱不禁風的阿謙推開，那個看起來比他大力幾倍的怪男人，我真的就像傻瓜一樣大叫…..看來這整天的胡亂已把我迫瘋…..
　　阿謙也許沒想這麼多，已經被提至離地的他邊說：「點…..推……啊？」邊盡力深呼吸，然後用雙手一推。
　　「咔！」的一聲。
　　那怪人忽然不再用力，也不再動。阿謙也不再叫痛，他能站回地上，怕那怪人有什麼機械重啟的他，悄悄地向後退。一步、兩步、三步，快速地跑了過來。
　　「你冇事？」他不是剛才被那怪人抓狂嗎？雙臂應該很痛才是，怎麼看起來一臉輕鬆？
　　「好…..好似冇乜事……」他錯愕地摸摸自己雙臂，還跟我做個「還能動」的手勢。
　　「咔咔……」到底是什麼聲音……
　　阿謙忽然向我的背後指了一指，我向後望去……那怪人仍然不動，但明顯矮了一截。
　　我還在想到底發生什麼事，阿謙走上前，邊說：「頭先好高，而家變到咁矮，咁奇怪嘅。」然後用手碰了一下那怪人。
　　「唔好掂佢！」我亦在同時大叫。但說時遲，那時快，好奇的阿謙早已用指尖碰上了他。




　　「點解唔掂得？」他反問我。我當下嘆了一口氣……然後向他背後指了一指。
　　「咔咔……咔咔……」從那怪人發出頻密的聲音。
　　「嘩，咩事！」阿謙嚇了一跳，連忙跑回來。
 
　　那怪人的下半身明顯短了一截，腰間離奇地越來越窄，不斷發出「咔咔……咔咔……」的聲音，看得我倆目瞪口呆。那怪人越來越矮、越來越矮……上半身開始有點像岩石壁的碎石剝落……幾塊幾塊……你不會相信這種「奇境」就發生在眼前。
　　「大鑊！」我忽然想起似曾相識的場面。「阿謙，我地快啲走！」我未等他回應，就先起步轉身跑去　─　行動比他的好奇心重要。
　　阿謙見狀，也跟住我一起跑，跑了一整條街，他邊跑邊問：「發生咩事啊，點解我地要走？」
　　弄了一整天，不是運動健將的我已經上氣不接下氣：「佢會爆炸！」
　　「爆……炸？吓？」他半信半疑。
　　「等陣你就知，我地快啲離開呢到，炸死就咩都……」我說。話未說畢，轟然一聲，剛才那條街亮起了火光。
　　「管家……真係爆炸……」阿謙的眼神充滿了對我的敬佩。
　　「我諗重有更大鑊嘅嘢蒞緊……」體力消耗太多，吃不消地放慢了腳步。
　　「管家，我想問下，你點知大力推開佢會得？」阿謙也放慢腳步，開始回想剛才情景。
　　「我估架咋。」難道我跟他說我隨口發話瘋，廢嗡成功嗎……
 




　　「我覺得你好勁，好似咩都估到咩都知，以前玩三國殺又估到我地係咩勢力。」
　　「講呢啲？識呢啲有咩用？你好我好多。」我沒放下戒備，四處張望，恐怕再有「陌生人」出沒。
　　「埋單啊……埋單架咋……工程仔同人埋單啊管家。」他又說起這種笑話。
　　「講左幾年啦，你唔係真係諗住30歲幫人埋單？」我又不厭其煩地接話。
　　「唔知啊管家，唔係咁易架。」他心情變得低落起來。
　　「出到去先啦。咩都假。」這件事肯定比他埋不埋單更重要。「點解個怪人會捉住你？」
　　「我唔知喎，我行過去見佢唔應，我咪督下佢，點知一督佢就蒞料。」阿謙邊說邊示範。
　　「唔記得話你知，除非你見到識嘅人，而佢又識主動搵你講嘢，如果唔係唔好亂掂佢地。呢到嘅人，唔同現實世界嘅人，好似撞咗邪，定唔知變啲乜，就算佢地所有事情睇落好似正常人咁，但一掂到佢地就變到好奇怪。」阿謙「哦哦」了幾聲，點了點頭。
 
　　「你之前話除左我地兩個，重有幾個人？」阿謙問。
　　「係，暫時見到，行得走得又未變怪人嘅，至少有五、六個。」我說。「係呢？你幾時變到咁大力？」
　　「我都唔知點解，頭先你叫我推開佢，我就咁雙手用力一推就推開左佢。」阿謙也自覺奇異。
　　「你頭先督佢個陣，係咪隻手啲皮膚掂到佢個身體？」我問，我要確認我的假設。
　　「咁緊係啦，呢對手套穿架，手指呢啲位實掂到。」阿謙不懂我的意思。
　　「咁……你係咪睇過張紙？」我問。




　　「一張紙？咩紙？」他想了一想。「哦？係呀，我拎到套手套前係有張紙。我唔係好明佢講咩，總之佢叫我戴起套手套，話咁樣可以出到去，咁咪戴。張紙轉個頭就自己燒咗啦，就咁架咋。」阿謙說。
　　「手套……應該就係代表力量。」我喃喃自語。
 
　　「咩力量？」看來我自言自語也頗為聲大。
　　「我話你而家應該有其中一種特殊能力，可以好大力。」我說。
　　「吓？有嘅話我寧願要控制時間，可以時光倒流。等你頭先重問我冇啦啦戴咩手套，我都唔識答。」他不太相信，這人真的是看《求婚大作戰》看上腦。
　　「可能唔係我地可以揀。」我說。
　　「咁你有咩超能力？」他問。
　　「我冇，可能未搵到張紙。呢件事都係人地話我知，佢都係見到有張奇怪嘅紙之後，就有件好似裝咁嘅嘢，之後就發現有咗異能……我諗我都要快啲搵到張紙。」
　　「哦…..」他好像在注意其他事情。「管家，你覺唔覺得呢到，好似唔係而家嘅旺角？」
　　我當然也察覺怪異之處，雖然附近店舖閘門全都關得緊緊，午夜而且隨處也看到幾條燒焦的木棒，剛才經過的天橋，依然能看到「金旺角」的招牌，樓下竟然還留有到上水和大埔的綠VAN路牌。遠處也能看到的不少粉紅色的霓虹燈，商店的招牌也似曾相識。這裡靠近波鞋街，剛還經過麥花臣運動場旁，那幾間有名牌子的運動店舖……對，這些似曾相識，但……分明不是今日的旺角。
　　可是我不敢作實，只好說：「好似係，但係係幾時嘅旺角？」我們沉默了幾秒。
　　「轟然」巨響！
　　忽然聽到很多腳步聲，緊接的是叫嚷聲，從兩方傳來，估計就在不遠處的彌敦道，不然就是西洋菜南街……只離我們幾十步……不，是十多步的距離！
　　「走！」我與阿謙拔腿就跑。「我知係幾時！係『黑夜事件』！」




　　「『黑……黑夜事件』？即係上年話咩爆炸之後搞到好大單嘢個單？」阿謙說。
　　「係……」我開始說不出話來。
　　「但係幾時有爆炸啊，即係啲新聞又亂寫？」阿謙體能比我好吧……隔了一會，他想到了我想到的情景。「唔係掛…….」
　　「應該就係…..唔理得咁多，總之我地……要快啲離開旺角……越快越好，總之唔可以係呢到受傷。」我說。「同埋要盡快搵到屬於我個張會消失嘅紙。」