我們中，出了個叛徒: Line 8

　　「芷君？芷君！」我醒來時，發現芷君早已不在身旁。
　　難道芷君比我快醒來，已經先離開？不可能，我明明叫她不論如何都要在我身旁。
　　「芷君去咗邊？」我正回想剛才的片段。
　　「跳落去之後…..白光……好似暈咗咁…..醒返……」不對、不對，再倒帶。
　　「一齊跳落去之後……白光……暈低……唔通冇一齊跳？」又好像不對，再倒帶。
　　「我地兩個，一齊跳落去之後……芷君隻手鬆開咗……跟住……跟住……佢上返去？無啦啦點會跳緊落蒞，未到地都彈返上去？」但事實擺在眼前，芷君不見了。
　　這裡是樹林？是哪裡的樹林？我站起來，拍拍身上的灰塵，也再不像以往般一定要異常整潔，便往前走了十多步。
　　「有車聲。」疑惑之際再跑多十來步，前面正是倚山而建的公路。「松濤閣。」是大埔公路。
　　「18:43」
　　我，再一次回到了大埔。




　　我關了手機的螢幕，便往大埔方向走去。「啦，而家要整理一下今日發生嘅事先……」為了整理思緒，我邊走邊對自己說話。從前有巴士經過，我也會盡量向外走一點避開，但現在已無視它們的存在，因為它們存在，又不存在。
　　「我、阿凱、小花、浩仔、芷君……中間一定有啲嘢關連……可能唔止我地係呢個世界，但係呢個係乜嘢世界，我地又點解會入咗蒞，出唔到去？重有啲傳送門嘅巧妙又係邊到？到底點先可以確認到自己傳送嘅地方…..點解其他人會變咗路人、怪人，點解好似同正常世界一樣，但係又成個NPC咁，同我地溝通唔到……」
　　在想到這一切之後，我決定回家。那裡是我發生第一件事的根源，肯定有什麼我遺忘了，或是沒在意的事情。
 
　　傍晚的大埔，經已入黑。廣福道的巴士和汽車熙來攘往，經過廣福寵物公園、到了一所中學旁的路，往大埔墟火車站走去，這時候的火車站經已人頭湧湧，身旁都是剛剛下班的人，匆匆忙忙，每日如是。往隧道方向走去，左面是小巴總站，轉右是巴士總站、又是山塘和運頭塘的方向。
　　所有東西都像平常一樣，唯一的差別，就是我把自己包得實實的，在人群中謹慎地走，不讓手腳跟其他人碰上。
　　「管家仔！」忽然有人叫我這個別號，只有當年讀大學住宿舍的堂友，才會知道。
　　是誰？不經不覺，原來已走到運頭塘這個小區，我剛從半斜的隧道走過來。我四處張望，看不見有活人。
　　「管家仔！真係你！」聽到腳步聲越來越近，我不敢回頭看，方怕又出什麼怪事。
　　「管家仔 —」他把「仔」字讀得又慢又拖，說起來有點撒嬌。能在這裡遇上，又這樣叫我的，就只有「卓狗」了。卓狗是個別名，當年的同層幾乎都有一個花名，而他的名字就是卓狗。




　　聽聞他這名字的來源，是因為「厚面皮」而得來：在我進宿舍前，他放飛機、偷吃其他樓友的食物、不合作搞團隊活動等等奇招百放。不過，這些都是以往的趣事，印象之中，我同住後也不至於這麼猖獗，只是在同層玩「LOL」的時候，以「嘴炮」和「唔救隊友」以聞名。不過，我欣賞他對事物很有自己的一套的看法，我與他在畢業後也經常聯絡，他也不時分享趣事和心事。
　　忽然之間，有一人抱了我一下。回頭一看，果然是卓狗。
　　「終於，有個識嘅人係到。」卓狗抱住我不放，雖然我好不自在，但也明白他此刻的心情，那也讓他抱夠，總會鬆開的吧。
　　「你……都係到？」我見他沒什麼反應。
　　「我都諗過如果你係到會點。」他說。
　　「吓？」我回過身來，他好像又成熟和……長胖了。
　　「管家。」他雙手拍了拍我的肩膀。
　　「係。會點？」我覆說他的說話。
　　「我地嬴緊啦！」他胸有成竹地跟我說。
 




　　「嬴乜鬼嘢？我地要快啲走就真！」我鬆開他在我肩膀的手。
　　「嬴咗咪走得囉，你明唔明？」他堅定地說。
　　「唔明。」我嘆了一口氣，沒精打采地說。
　　「你，係咪未睇到張紙？」他突然低聲地向我說。
　　「咩紙？」我問。
　　「簡單蒞講，即係咁。」他搭我的肩膀，邊說。「如果冇睇錯呢，就係我地入左蒞一個世界，你當佢係生存遊戲點都好啦。而家呢到就好似個迷宮咁，我地就要盡快搵到個出口。搵到個出口，我地就嬴，嬴咗就可以返出去，過返啲正常生活；如果係到死咗，咁就唔會返到出去。」
　　「張紙就係咁講？咁我地搵出口咪得囉！」拖了五分鐘，原來跟我原來我想法一樣，我轉身便走。
　　「管家，唔係。重有……」卓狗叫停我。「我地去便利店飲嘢啦，慢慢話你知。」
　　他漫不經心地走在我旁邊，跟我焦急的神情恰好相反。到了運頭塘商場前方的一間便利店，那是我們以前樓聚後，二人聊天的地方。
　　「就咁拎得架啦，你唔掂佢地，唔會理你。」他邊扭開瓶蓋，邊跟正猶豫的我說。
　　「你又知唔掂佢地就得？」我也拿起一包較澀的檸檬茶。
　　「我以為你知得畀我多添。」卓狗說。
　　「嗱，即係咁。而家話就話我地搵到出口就嬴，但係張紙就講明，啲活人入面有叛徒。佢嘅任務重簡單，就係踢哂我地落黃泉，只要我地搵唔到出口，又或者就算咁好彩，畀我地搵到出口，只要係出口面前都有個二五仔係到，都當我地輸，二五仔嬴，一樣可以出返去。其他人就等死啦。」
　　「吓？」我說。「咁大鑊？」我心想，差點兒把檸檬茶吐出來。
　　「咁會有幾多個叛徒？」我說。




　　「封信就冇講，我估有幾個掛。」卓狗見我好像很害怕，故意捱近我，笑說：「管家，第一次見你咁樣，驚？」他不等我回答，低聲地在我耳邊說：「其實我，就係其中一個。」　
 
　　「痴線啦。你都唔係！」我鎮定地說。
　　「你又知？」他疑惑地問。
　　「如果你係，就一早殺左我啦，點會同我講咁多。」我悠悠地說。
　　「有道理。」他說。
　　「重有啊，你點會無啦啦貼到咁埋講嘢架，肯定係講大話唔覺意，做呢啲想人信你嘅動作。」我說。
　　「有道理。」他又說。「所以咪話我地嬴緊。」他得意地說。
　　「你想點？」我問。
　　「我地兩個合作！好似以前玩國戰咁，嗱我地兩個夾埋，實嬴架喎。」他興奮地說。
　　「即係咁，我地夾手夾腳，唔理邊個係叛徒，總之就搞掂哂佢地，反正三唔識七，就算留佢地，遲早都會畀佢地害死。不如我地早啲K.O.佢地，然後搵埋個出口，搞掂。」他又說。
　　「你想殺咗佢地？」我驚訝地說。
　　「嗱，唔係殺。呢到死咗，出面可能未死呢？就算真係遊戲，除咗操人，就緊係要嬴；更何況而家自己條命啊！」他應該想說「troll」。
　　「咁咪即係一樣，盡量緊係全部都冇事啦。」我說。
　　「管家啊，世界唔係完美架，人地同你三唔識七啊，你救佢，佢隨時害返你啊。」他根本不知道我所遇見的「活人」，直到現在，都是我所認識的人。




　　「咁如果到時你見到識嘅人呢？」我反問。
　　「咁咪……到時先算啦。而家我剩係見過你咋。」他猶豫地說。
　　我咬一咬牙根，現在所知的事情，到底要不要告訴他；但跟他說了，好像又對事情沒有幫助；不過我還未想到解決的辦法，事情看來也遠比我想像中複雜，又事出突然。我陷入混亂之中，情不自禁地嘆了一口氣。
　　卓狗見我嘆氣，又說：「管家，我知你好人，但係呢個時候唔可以婦人之仁，如果你諗住救哂大家， OK，我自認我幫唔哂啲人，頂多各行各路，見到你搵到個班人，唔落手，最後一齊嬴，咁好未？」
　　「我諗諗。」我說。「又或者，我地可以先解咗個更大嘅謎　—　搵咗個出口先？」
　　「唔唔，你諗諗佢，我同你實嬴。」他繼續說服我，我卻又多嘆一口氣。
　　「唔使咁灰喎，我知呢幾年唔係幾開心架啦，你咪當今次係大轉變，畀你威返次都好。」他拍了拍我的肩膀說。
　　「今次都唔方唔大轉變啦。唉，點解又係我中埋呢啲咁嘅嘢。好嘢一次都唔到我手。」我說。
　　「管家仔…...喂……喂……你去邊？」這時候的我已經往便利店門走去。
　　「畀啲時間我諗諗。我而家返屋企，睇下有冇啲重要嘢留低。」我說，還是先不要節外生枝好了。
　　「哦，咁好。我係到等你。」他說。
　　「呢到附近咁多怪人，你唔驚危險？」我問。
　　「輕鬆，我而家有啲料到，唔會驚啲怪人。」他說。
　　「咁好，我速去速回。」雖然不知道他在說些什麼，但他是個很會獨立處事的人，應該不會出什麼意外。
　　「喂，管家仔。即係咁。嗱如果你見到張紙，記得拎埋隔離舊野跟身，我唔知一唔一樣，總之幫到你。」他漸細又漸大地說。




　　「哦，OK。我好快返。」那時我已經跑到前面的馬路，只聽到頭尾幾個字，根本不懂他在說些什麼。
　　黑夜中回家的路，只有昏黃的燈光，與這世界雙映恐怖與黑暗，仿佛暗示一場可怕遊戲的經已開始……