《香港唔係追夢既地方》: Episode 33
Episode 33
我係玻璃倒影見到 Gareth 望住我同 Sherry，感覺好奇怪，但我又講唔出有咩奇怪。
不過 Gareth 好快就走左，我亦都無再深究落去，因為我已經諗緊，應該點樣去幫 Sherry 完成佢既理想。
-
「呢份係咩來？」Lydia 問我，因為我係第二日已經將 Sherry 既劇本交畀佢睇。
「呢份係我女⋯⋯唔係，係我朋友寫既一份劇本。」
「劇本？」Lydia 開始揭來睇。
「係⋯⋯佢搵極都無電影公司肯採用佢既劇本，咁我知道韓小姐你識人多，所以想問下⋯⋯你會唔會可以⋯⋯」
「我可以推薦下既，係寫得唔錯。」Lydia 依然一貫咁高傲。
「太好喇！咁⋯⋯」我開心到叫出來，估唔到咁輕易。
「不過。」Lydia 即刻閘住我，果然係有不過。
「我需要少少回報，先可以幫你個朋友。」Lydia 用佢個雙深沉既雙眼望住我。
「回報？」
「你同我簽既約只係一年既訓練計劃，當你比賽完之後，約滿就要再續。我想提早同你續約。」Lydia 直接問，估唔到佢咁快已經諗定。
「咁快傾定？」我傻笑咁講。
「唔係傾，係通知你一聲姐。」Lydia 用佢冷漠既言辭講出來。
「即係⋯⋯」我驚訝咁望住佢。
「我要你同我續十年約，簽完之後我會力捧你成為香港第二個坤哥，你將會成為我公司旗下最吸金既藝人。」Lydia 笑笑口同我講。
「條件只有一個，就係一定要服從公司既命令，只要係呢樣野上面我地達成共識，咁我會全力幫你，到時無人再可以阻攔你。」
「你想幫你朋友 sell 劇本，得，無問題。你想買個單位畀你媽媽畀你女朋友，得，無問題。你想一年出幾隻碟，全香港人都認得你既聲音，都得，無問題。」Lydia 意味深長咁笑左笑。
但一簽就十年⋯⋯
「我會畀你考慮下既，放心，唔係要你而家答我。」
「咁就⋯⋯太好喇⋯⋯」我總算鬆一口氣，可以慢慢諗下點做。
「不過呢，你要知道，你有今時今日既成就，都係因為有我幫你。比賽一日仲未完，你都未企得穩，而我亦可以隨時隨地將你拉返落來。」Lydia 笑得好令我心寒，佢既眼神更加令我毛骨悚然。
「做人要識得感恩圖報，知道未？咁我唔阻你返去慢慢諗喇，你返去喇。」Lydia 仍然用佢個雙好似睇透世事萬物既雙眼望住我。
我似乎已經成為佢手中既棋子⋯⋯
-
選擇，係人生裡面最重要既一環，但偏偏好多時，都唔到我地自己去選擇。
由細到大，都係爸爸媽媽為我地去選擇，由佢地去決定，乜野係適合我地，乜野係唔適合，但我地自己反而無得選擇。
到左今日，我既命運依然掌握係人地既手上，佢話畀我考慮，其實即係無得考慮。所以最尾，我都係同 Lydia 續左約。
好彩既係，Lydia 都信守佢既承諾，將 Sherry 既劇本推薦畀其他電影公司。
-
「多謝你⋯⋯我都唔知可以點報答你⋯⋯」Sherry 一臉眼濕濕咁望住我。
「傻喇⋯⋯舉手之勞姐。」其實邊係⋯⋯
不過見到 Sherry 開心返，係我最開心既事。
-
接下來既日子，我都係努力準備決賽。Jamie、Sherry 各自都有畀支持我，有時都幾令我個心好亂。
Lydia 同我講，分析而家既情況，我贏面係最大，只要決賽贏到冠軍，咁我以後條路就會一帆風順。
我只要贏⋯⋯贏就可以達成我既夢想！
-
好唔容易終於捱到決賽既日子，我都非常緊張，因為無論 Lydia 講到我幾有贏面都好，我仍然好忌憚 Gareth。
【加油呀！】Sherry 傳來訊息幫我打氣。
【多謝你，Sherry，我一定會。】我覆返佢。
奇怪，點解 Jamie 咁耐都無畀訊息我？平時既佢一定晨早就不斷轟炸我⋯⋯
當我仲諗緊 Jamie 呢個問題既時候，Gareth 無喇喇走過來。
「祝你好運。」Gareth 好陰沉咁同我講，我從來未見過佢展露咁令人心寒既樣⋯⋯點解個感覺咁古怪？
「Tony，兩分鐘後出場，Okay？」節目助理走出來同我講，我點點頭，真係要集中喇，唔好諗咁多。
呢個時候，Jamie 忽然 what's app 我，仲附左張圖。
【黃日朗，你今次又點解釋？】Jamie 質問我，而張圖竟然就係個晚 Sherry 同我訴苦攬埋一齊既相！
下！點解會咁！我成個世界好似翻天覆地咁，我個腦一下子返左去過去⋯⋯
我知喇，係 Gareth！係 Gareth 偷影我地！
我好錯愕咁望住 Gareth，只見 Gareth 係到笑，係佢既陰謀！
【你講過你唔會呃我？咁而家你叫唔叫係呃我？】Jamie 繼續講。
而家我真係無時間⋯⋯
「一分鐘！」
【而家唔係咁既時候⋯⋯我一分鐘後就要比賽，你等我一陣好唔好？】
【我仲點比時間你呃我？我點知你係咪真係去比賽？】
「Tony！」
【你等我！】我 send 左呢句出去，然後即刻熄手機，出去比賽。
不過我個心仍然好唔平靜⋯⋯我腦仍然係 Jamie、Sherry 同 Gareth，仲有呢件事⋯⋯
未完待續