《香港唔係追夢既地方》: Episode 35
Episode 35
第二早一醒，原來已經係十一點。我慢慢坐起身，先發現我隔離係仲未起身、一絲不掛既 Sherry。
我終於背叛左 Jamie，同 Sherry 發生左關係。其實諗落，都唔算背叛⋯⋯因為 Jamie 同我已經各行各路⋯⋯唔知咁諗，又叫唔叫安慰自己呢？
對 Sherry，我的確有種感覺，可能係中意，亦可能只係中意回憶中既佢。
不過，Jamie 離開左我，可能叫有緣無份，而呢個時候 Sherry 既出現，唔知係咪上天要佢代替 Jamie 既位置？
點都好⋯⋯我知道有時，人係無得返轉頭，風箏已經斷線，又點可以拉返佢返來？
-
我唔肯定自己係咪仲中意 Sherry，但某程度上我將我既寂寞依賴左係佢身上。我搵得佢好密，或者只有對住佢，我先可以暫時唔去諗 Jamie⋯⋯
我去到 Sherry 屋企，Sherry 好開心咁叫左我入去。我其實應該好開心至係，明明一直最掛住既係佢，難得佢而家返左來我身邊，我唔係應該好開心架咩？點解感覺同朝思暮想既咁大分別？
「你坐係到等等我先，我去沖個涼先，岩岩倒瀉左野，真係論盡。」Sherry 笑笑咁講。
「好呀，慢慢，我係到等你。」我同佢講，然後就坐係沙發。
呢個時候我見到 Sherry 台上面有幾本劇本，似乎 Sherry 真係好勤力去寫劇本，佢呢種魄力真係好厲害。
「鈴鈴鈴！鈴鈴鈴！」Sherry 屋企電話忽然響起。
我望一望洗手間，似乎 Sherry 因為沖涼而聽唔到電話響。我係咪應該要聽？
「鈴鈴鈴！鈴鈴鈴！」
「喂？」我決定拎起來聽。
「你叫左個傻仔交劇本未呀！我就死喇！」講野既係一個男人⋯⋯係⋯⋯
係當日 Sherry 劇社主席個男朋友，當日幫 Renee 排劇既時候曾經同過佢有一面之緣。
佢講完呢句之後忽然停左停，似乎知道有唔妥。
「喂？」佢再喂多左聲。
「係，你講⋯⋯咩傻仔？交咩劇本？」我問佢。
「咦，我原來打錯電話，Sorry！」佢講完之後即刻 cut 線。
我知道佢一定唔係打錯⋯⋯我即刻拎起 Sherry 台面個幾份劇本睇，編劇個名原來唔係得 Sherry 一個，仲有個個人個名！
「岩岩係唔係有人打來？」Sherry 慢慢走出來，著住香豔既浴袍，仲用毛巾抹緊頭，真係好誘人，不過我而家完全無興趣，我只係想知道⋯⋯真相。
「岩岩有個人打來，講左一番好莫名其妙既說話⋯⋯」我一路講，一路留意住佢臉部既表情。Sherry 臉色即刻變得凝重左，但佢依然扮得好輕鬆。
「係呀？最近好多人都會打錯來，唔知點解。」Sherry 輕描淡寫咁講，令我更加覺得眼前呢個女人好高深莫測⋯⋯
「佢講野又幾有紋有路，佢話咩⋯⋯你叫左個傻仔交劇本未⋯⋯」
Sherry 臉色即刻變得好難睇。
「唔知係咪佢打來搵你呢？」我拎起份劇本，指住個男仔個名，然後將本劇本一野掟落地下。
「你講咩呀⋯⋯我點會⋯⋯」Sherry 都未講完，就畀我截住左。
「到底係咩一回事呀！我求下你唔好再呃我喇！我唔想再生活係謊言入面呀！」我接近崩潰咁大聲講，嚇窒左 Sherry。
「我⋯⋯」Sherry 仲猶豫緊。
「講真話呀！」我好惡咁講，或者到左依一刻我先真正知道，點解 Jamie 會咁嬲，原來畀人呃既滋味真係唔好受。
「係⋯⋯我一直都係同佢夾埋⋯⋯」Sherry 終於低頭，承認自己處心積慮既計劃。
「即係⋯⋯一開始⋯⋯」我難以置信咁望住佢，你又點可能估到，你朝思暮想既舊情人返來你身邊，竟然真係好似電視劇劇情咁，原來係有目的、有計劃。
「唔係⋯⋯係從你出名之後，我地先打算向你埋手⋯⋯」Sherry 望住我。
我望住佢，但我覺得我已經唔再了解佢，或者我一直中意既，只係回憶中既佢。
「無論我寫既劇本有幾好、幾精彩，我都係唔夠人地鬥，人地有既係後台，有既係關係，我呢？我乜都無⋯⋯我男朋友都係。我同你講過，我夢想係做一流既電影編劇，但如果我連做編劇既機會都無，我點樣去追夢？我追夢有錯咩？」Sherry 問我。
「我知道你出名，然後會同電影公司打交道，你就係我最好既幫手⋯⋯所以我個日先會借醉上你屋企⋯⋯但我絕對無心要搞散你同 Jamie，我真係無心⋯⋯」Sherry 眼泛淚光，似乎唔係講大話。
「咁你點解要同我⋯⋯你當你自己係咩？係雞呀？」我好大聲咁鬧佢。
「我接近你，係為左我既劇本可以賣畀電影公司，但我唔可以同時都真係中意你咩？」Sherry 望住我，楚楚可憐咁樣。
「同你上床，唔係計劃既一部分⋯⋯係我甘心情願想畀你⋯⋯其實我本來已經打算同佢分手，因為我發覺真正對我好既，係你⋯⋯我真正中意既，都係你⋯⋯」Sherry 試圖拖我隻手。我唔否認呢一刻係有少少心軟，但好快我就清醒過來。
「咁你就唔應該呃一個對你咁好既人。」我同佢講，然後轉身開門就走。
-
最後個句說話，我係同佢講，亦都係同自己講。我以為自己好醒，一拖二，其實最蠢個個係我自己。最好既，明明已經係身邊，但自己唔識珍惜，最後一無所有，輸得一敗塗地。
我行緊返宿舍，但唔知點解，我越來越唔想返去。雖然宿舍好靚、好大，但所有唔開心既事都係由我住入去宿舍既一刻開始發生。龍床不及狗竇，原來係真。
我結果返左屋企食飯，我忽然有種久違既感覺湧上心頭。原來屋企，真係一個避風港，一個畀我休息既地方。
阿媽仍然都係好煩，但佢係真心為我好，仲煮左好多好野食畀我。
「咁耐無返來食飯，個人瘦曬⋯⋯係咪做得唔開心呀？」阿媽問我，然後又夾左舊雞落我個碗到。
「無⋯⋯唔係呀。」我邊敢同佢講，原來我發生左咁多野。
「係呀⋯⋯你今晚會唔會留係到訓呀？媽咪好耐無同你傾計喇，晚晚得自己一個，好悶架⋯⋯」阿媽望住我講。
我望一望佢，原來佢比之前老左、殘左⋯⋯我一直只係掛住追夢，但我根本無好好關心過媽媽，一個永遠係屋企守候我既人。
「可以呀，我會，我會留係到。」我講。
「太好喇！我煲左湯，陣間飲多碗呀！你成日唱歌，聲帶好勞累架，呢種湯對你把聲好呀⋯⋯」
望住老母一如既往咁，講完又講，雖然真係好煩，但我而家先識得去享受。
可以畀媽媽煩，其實真係好幸福。
唔知點解，諗起好多野，我眼眶就開始熱，原來係出面打拼咁耐，一直想證明自己已經大個，但其實一直唔長大、活係媽媽既庇蔭之下先係最幸福。
我攬住媽媽就係到喊，佢摸摸我個頭，無出聲，只係由我靜靜咁發洩一下。
「辛苦就喊出來喇，有咩都講比媽媽聽，覺得累就唔好做喇，返來屋企喇。」媽媽一邊講，一邊摸我個頭。
我真係好累，好辛苦。原來外面，真係風大雨大。
-
之後，我無再同 Sherry 聯絡，或者佢都再無面目見我。不過，我就因為佢，同 Lydia 簽左十年約。本來我都覺得無問題，直到今日⋯⋯
「咩話？你要我幫個條蛋散特首唱歌？仲要唱好呢個on 9 政府？」我好驚訝咁望住 Lydia 問。
「你咁大聲做乜？而家好出奇呀？」Lydia 問我。
「出奇！緊係出奇喇，我唱乜都得，就係唔幫政府做野！」我好堅持咁講。
「而家我有話問你意見咩？我係你老闆，我要你唱就唱，我要你碌地，你都無得唔碌！」Lydia 目露兇光咁講。
「我唔做囉咁！」我好型咁望住佢。
我以為佢會驚，點知 Lydia 竟然笑⋯⋯
「你以為你仲係以前個個 Tony？你唔係 Gareth，而家既你人氣大不如前，你根本無得揀。況且，你唔記得左，你簽左我十年約咩？呢十年裡面，你一係去乞食，一係乖乖地接我畀你既 job 去做，我開心既，再捧返你上神台都仲得。」Lydia 行去我身邊。
「但如果我唔滿意，我可以要你乜野都無曬，我講得出，就會做得到。」Lydia 係我耳邊講。
我知道佢唔係人咁品，比起 Agnes、Gareth 同 Sherry，Lydia 先係真正既大反派⋯⋯
我真係好憎我自己，忠奸不分，今日先睇清真相。
-
我望住個天，我真係唔知，我咁做到底係唔係錯。而家既我，係咪再無任何選擇？
Jayden，你叫我去追夢，你叫我去飛，我有試過⋯⋯但我真係飛唔起⋯⋯香港既天空，實在太窄，要飛，就要撞低人地，無論用咩手段⋯⋯
原來，夢想，都可以好醜陋。
我地一直只係知要追夢，但我地或者無諗過，原來選擇左去追之後，所遇到既困難，遠遠比我地想像既巨大得多。
人，就係會改變，尤其係呢個扭曲既地方，又有邊個可以我歌故我在，做一個自己中意既自己？
為生活，我地都一定要低頭⋯⋯
呢個時候，我收到一個短訊⋯⋯
咩話，Kate 入左醫院？
-
我匆匆趕去醫院，據佢地所講，原來 Kate 係返夜更既時候同個痴線佬爭執，最後畀個痴線佬斬左兩刀，身受重傷。
不過其實經過手術，佢已經無咩大礙，度過左最危險既一段時間，之後先通知我。
我打開病房門，就見到有個男人坐左係 Kate 床邊，好細心咁餵緊 Kate 食野。
Kate 見到我，即刻揮手叫我過去。我同個男人點點頭。
「呢個係我男朋友 Eric 呀⋯⋯」Kate 有氣無力咁介紹。
「你唔好講咁多野喇，我自己介紹得喇，訓返低喇，乖。」Eric 好細心咁叫 Kate 休息，明明 Kate 話過 Eric 吊兒郎當，點解而家會咁識照顧人既⋯⋯
「你好，我係佢舊同事 Tony ⋯⋯」我同 Eric 講。
「係呀，我係電視見過你架喇，你唱歌真係唔錯。」Eric 笑笑咁講。
「唔好阻住我同細佬傾計⋯⋯你去買下野喇⋯⋯」Kate 同 Eric 講。
「傾一陣好喇，我陣間返來捉你去訓。仲有呀，錢個到唔使擔心，我會畀伯母架喇。」Eric 同 Kate 講完就走，Kate 個樣明明好蒼白，但佢好甜蜜，比之前似乎仲幸福左⋯⋯到底發生左咩事？
「你做咩會咁架？」我關心咁問 Kate。
「唉⋯⋯香港呢個痴線地方就係多痴線人，唔好彩畀我遇到一個拎刀架囉。」
「好彩你無事⋯⋯係呢，呢個 Eric 係咪你之前講個個 Eric？」我問佢。
「係呀。」
「點解都唔一樣既同你講既，差好遠喎。」
「係咁既⋯⋯本來佢真係好不思進取，直到我比人斬左兩刀，屋企需要錢醫我⋯⋯佢先開始醒覺自己要做返少少野⋯⋯於是佢開始好似我咁，日一份夜一份即 pay 既辛苦工⋯⋯」Kate 一邊講，一邊甜笑。
「仲以為係《矛盾一生》，最尾變左《你的男人》，哈哈。」Kate 笑講。
「係呢⋯⋯你點呀？點解好似唔開心咁既？你好出名喎最近明明⋯⋯」Kate 問我。
「我？邊係⋯⋯其實⋯⋯」我都唔知點開口講。
「我都唔知條路應該點行，我以前一直認為追夢係好美麗既事⋯⋯但原來現實既係，連夢想都可以好醜惡，令到我唔知自己應唔應該繼續走落去。」我好婉轉咁講。
「哦⋯⋯好似好複雜咁⋯⋯」Kate 合埋眼，慢慢咁講。
「但係，你既夢想⋯⋯到底係要做歌手，享受舞台帶畀你既名利同榮耀？定你中意既只係音樂？」Kate 好似智者咁問我。
未完待續，留意下一篇最終大結局