《香港唔係追夢既地方》: Episode 36 (Finale)
Episode 36 (Finale)
「但係，你既夢想⋯⋯到底係要做歌手，享受舞台帶畀你既名利同榮耀？定你中意既只係音樂？」Kate 好似智者咁問我。
Kate 問我一句，即刻令我思緒飛轉。
當日同樣係病房，Jayden 都有問我想做咩，當時我答既係⋯⋯
「我想做第二個坤哥！」
其實技術上，我已經成功左，但我無同 Jayden 講，點解我想做第二個坤哥，因為我中意既，並唔係舞台上面既光輝，而係音樂，真真正正、簡簡單單既音樂。
自從做左歌手之後，我接觸最多既唔係音樂，而係各種血腥既鬥爭、心計同謊言，對手、敵人一個接一個，永無休止。為左呢個所謂「夢想」，我失去左好多重要既野、重要既人。
同媽媽見面既時間、同朋友相處既時間、Sherry、Jamie⋯⋯良心、良知。
當日我唔甘心為生活低頭而選擇呢條路，但今日我竟然再次向現實低頭？會唔會太可笑？
「多謝你。我知道點做喇。」我衷心同 Kate 講。
「嗯，做契家姐既，點都支持你。」Kate 好平和咁講。
-
轉眼間，已經到左「唱好政府」呢個活動既大日子。
我係後台，滿懷心事咁望住鏡。我唔知道今日呢個決定係岩定錯，我只係知道，我咁做，係絕對唔會後悔，就已經好足夠。
「準備成點？陣間特首同班高官都會係到，你醒醒定定。」Lydia 係我耳邊講。
「得，我唔會令你失望。」我好淡定咁同 Lydia 講。
「你，沖杯參茶畀佢養聲，唱前一杯，唱後一杯。」Lydia 指住個助手講。
Lydia 準備離開後台既時候，發現有唔妥。
「咦，呢班樂隊我未見過既？」Lydia 問我。
「哦，係我搵返來，佢地彈得比較好，信我。」我同 Lydia 講。
Lydia 掃視左佢地一陣，然後點點頭，就走左。
我知道，今次可能係我最後一次上台唱歌，但我無悔。
Jamie，我唔會令你失望。
-
「今日呢個 show 真係星光熠熠呀，除左有新人王 Gareth 助陣之外，我地仲請到佢既同門師兄弟 Tony Wong 一齊為我地演唱一首促進中港和諧既《北京北角》添呀！有請！」司儀係台上講完之後，台下就有好熱烈既掌聲，包括特首。
我慢慢走到台上，連同我請既樂隊一齊上台。
「喂喂，testing。」我試緊咪，好，無問題，把聲非常響亮。
我掃視左一陣台下既觀眾，然後清一清喉嚨。
結他聲，亦開始響起。我望住 Lydia，睇住佢既表情由微笑，變成詫異，再變成黑面神。因為，我地唱既，並唔係《北京北角》，而係「反歌」，《年少無知》！
「年少多好，頑劣多好，不甘安於封建制度裡，迷信上街真理會達到。」我開口唱，只係聽到觀眾席出現左一陣嘩然聲。連特首都黑面⋯⋯
「旗幟高舉，群眾聲討，不惜犧牲一切去上訴，權貴的想法太俗套。」跟住開聲既係我後面既鼓手，亦都係我神秘既好兄弟之一：Chris！
「只可惜生活是一堆挫折，只可惜生命是必須妥協。」我同 Chris 一齊唱。
「年少多好，貧困多好，一蚊積蓄足以快樂到，廉價結他抒發我暴躁。」然後係我身邊既 bass 手，我另一個好兄弟，Aaron。
「財富得到，年歲不保，捐輸不必講究有回報，人世間總會有異數。」跟住就係後面既 Keyboard 手，唔少得佢既，Lok。
「只可惜生活是一聲發洩，只可惜生命是一聲抱歉，怕追討⋯⋯」
然後我地四個一齊唱。「如果⋯⋯命運能選擇，十字街口你我踏出的每步更瀟灑！」
我睇到 Lydia 好緊張想搵人暫停，但係節目播緊就點都要繼續直播。況且，已經有唔少觀眾用手機直播緊上網。Lydia 只可以咬牙切齒咁啤實我，但佢咩都做唔到。
「如果⋯⋯活著能坦白，舊日所相信價值不必接受時代的糟蹋⋯⋯」
「如果⋯⋯命運能選擇，十字街口你我踏出的每步無用困惑。如果⋯⋯活著能坦白，舊日所相信價值今天發現還未老。如果⋯⋯命運能演習，現實中不致接納一生每步殘酷抉擇！」
「留守⋯⋯過去的想法，我會否好像這樣生於世上無目的鞭韃！」
我地演唱完畢，我見到 Lydia 同特首塊面已經黑過屎，佢好想阻止我。
我一定要把握時間。
「大家好，我叫 Tony Wong，我係一個好熱愛音樂既人，所以我選擇做一個歌手。因為我唔想向生活低頭，我想追尋自己既夢想。」
「我知道，睇緊我地表演既人，當中唔少都一定係曾經有過夢想既小伙子。曾經，我地深信自己可以改變呢個唔公平既世界，曾經我地都有過夢，曾經我地都想飛。」
「但有更多既人，之後只可以向現實低頭。追夢，真係唔容易，尤其香港，確實唔係一個追夢既地方。」
「我地花四五十年既時間，先可以買到屬於自己幾百尺既磚頭，我明白⋯⋯試問當我地連住既地方都成問題既時候，我地憑咩去講夢想？唔通咁樣既一個地方，仲可以叫人留戀，仲可以叫人係到生活咩？」
「有錢既人，越來越有錢。唔屬於香港呢個地方既大陸人、南亞人仲可以有優厚既福利過本土香港人。想生活富足既人只可以去做了無生趣既政府工做一世。你地照下鏡，為左生活，你地失去左幾多野？你地失去左幾多以前既光輝？」
「我地，的確做唔到咩野去改變呢個世界、去改變呢個地方。每日都有好多唔公平既事情係我地身邊發生。有時現實真係可以好荒謬，比電影更加荒謬。但係咪當荒謬習以為常既時候，佢就唔荒謬？我地唔可以畀荒謬當做正常，我地唔可以由得錯既野，繼續錯落去。」
「無錯，香港唔係一個追夢既地方。但我地，可以係一個追夢既人。」
Chris、Aaron、Lok 係後面同時拍手，開始有隱隱約約既掌聲⋯⋯
「最後，我想趁呢個機會同特首你講一句說話。」我望住台下面黑黑既特首。
「吔屎喇你！梁鎮英！」我勁大聲咁講，然後向佢高高舉起一隻中指。
全場都嘩然，但我同我幾個兄弟，只係斯斯然行返去後台。
希望，Jamie，我無令你失望。
－
返到去後台，Chris 一路都安慰我。
「放心喇！我叫左 Sophie 捉住 Jamie 睇實電視，佢實睇到既！」Chris 同我講。
「希望喇⋯⋯」
「黃日朗！」Lydia 即刻嬲爆爆咁衝入來，似乎佢想殺左我。
「有咩貴幹，老闆？」我問佢。
「你⋯⋯」Lydia 嬲到一句野都講唔出，但忽然間，佢居然笑⋯⋯
「好野⋯⋯你真係好野，我從來無諗過你呢隻狗養極都唔熟，仲夠膽反咬我一口⋯⋯好野⋯⋯」Lydia 仲拍起手。
「好野，真係好野。」Lydia 竟然咩都無做，轉身就走⋯⋯咁樣我反而估唔到佢之後會點樣對付我⋯⋯
「呢個女人真係恐怖，佢一定唔會放過你，你要小心。」Lok 提醒我。
「有我地幾兄弟保護你，唔使怕佢！」Aaron 講。
呢個時候，助手手都震埋咁遞左杯參茶畀我。
「Tony 哥⋯⋯你岩岩⋯⋯真係好型⋯⋯飲⋯⋯飲杯茶先⋯⋯」助手口都窒埋咁講。
「邊係⋯⋯唔該曬你。」我接過佢杯茶，明明有種好怪既感覺，但我講唔出邊到怪⋯⋯不過算喇，遲下再諗，我已經好累⋯⋯
我正要飲個杯茶既時候，忽然間有個人撞埋來，仲撞跌我杯茶！
「唔好飲呀！」撞跌我個個人講，我望一望佢，佢居然係 Gareth！
「你做乜撚呀！」Aaron 即刻推左 Gareth 一下，兇返佢。
「Tony，你信我，唔好飲，飲左你呢一世都唱唔到歌！」Gareth 好認真咁同我講，我即刻啤住個助手，Chris 即刻捉住佢。
「係邊個叫你咁做！」Chris 好惡咁兇佢，個助手震曬。
「係⋯⋯韓⋯⋯韓⋯⋯」助手都未講完，我就知道係佢，Lydia。
Lydia 係遠處望住呢一切，佢知道事敗之後，嬲到推跌曬周圍既野，一反常態就走左。
而我就驚魂未定，不過最令我好奇既係，點解 Gareth 會忽然掉轉槍頭救我？
－
我約左 Gareth 去餐廳食飯，我唔怕佢，因為我覺得佢係發自真心想救我。
「係呢⋯⋯點解你會救我？」我開門見山直接問佢。
Gareth 無左之前對我既敵意，我感覺到⋯⋯其實佢唔憎我。
「因為，我唔想呢個世界無左一把靚聲。」Gareth 出乎意料咁講。
「靚聲？」我呆左呆。
「係⋯⋯好老實講，比起憎你，其實我更加係欣賞你同忌憚你。」Gareth 歎左口氣。
「其實我之前成日諗，如果我地唔係因為個個計劃而認識，我地一定會係好好既朋友。你把聲既聲底好靚，亦好有音樂才華⋯⋯亦因為咁，你先係我最大既威脅。比起 Agnes 同 Edwin，我更加怕你。因為我同你只能活一個，輸左⋯⋯就會咩都無，星途就會好崎嶇⋯⋯我唱歌，都想有多D人聽我既音樂⋯⋯」Gareth 講。
「我聽到你台上面講個番說話，我真係好感觸⋯⋯原來我為左夢想都變得好醜陋，做左好多我唔想做既野。當我知道 Lydia 要對你不利既時候，我就知道我唔可以再助紂為虐，我一定要企出來幫你。」Gareth 臉上第一次對我展露笑意。
「多謝你，我諗⋯⋯我地真係可以係好朋友。」我伸出友誼之手，Gareth 呆左一下，然後友善咁同我握手。
－
個次之後，Lydia 受到唔知邊個既壓力之下，被逼同我解約，我之前仲以為佢會留住我慢慢折磨我，不過咁都好，我同佢亦再無關係，而我亦決定，唔再發明星夢，因為我知道，愛音樂，仲有好多出路。
Chris 同 Sophie 話 Jamie 已經知道我既行動，但 Jamie 無咩表示，可能佢真係好嬲我？而我都唔敢、無勇氣去搵返佢⋯⋯係我親手傷害佢，最無資格係佢面前出現既，就係我。
－
一年之後，原來世界變化已經好大。曾經有個遊戲，叫《誰是你生命中最重要的十個人》，我曾經玩過一次，但一年之後，個「最重要既十個人」，已經唔同左。Sherry，曾經係我心入面長佔一個位置，但發生個件事之後，佢對我來講只係一個普通既朋友，無他。據我所知，Sherry 真係同佢男朋友分開左，而佢亦好努力一邊寫書，一邊寫劇本，過住佢新既人生。
Kate 就已經好返，仲準備同 Eric 籌備婚禮；Gareth 就畀 Lydia 派左去大陸參加《我是歌手》之類既比賽，聽講人氣越來越高；Chris 亦參加左打出名堂，見到 Kobe Bryant 一面已經好滿足；Lok 同 Patrick 仍然甜蜜，仲好似見埋雙方既屋企人！
Aaron 依然一支公，但佢無再做保險，佢同我一齊，拿拿拿，唔好誤會，我同佢係一齊⋯⋯讀音樂姐。因為我地真係想夾隊樂隊，可惜 Chris 同 Lok 個次只係為左幫手先練《年少無知》，本身對音樂並無興趣，所以隊樂隊就暫時得我同 Aaron。
至於 Renee，佢開始有人賞識，係電視劇集出演好多唔同既角色，估唔到平時惡死能登既佢，演一個可憐小女孩既角色都咁得心應手，果然係實力派演員，我睇好佢！仲有就係 Sandy，佢仍然好努力學緊廚，雖然未算好成功，但距離夢想，越來越近喇佢。同時佢都證明左畀屋企人睇，就算 DSE 考得唔好，佢一樣可以有開心快樂既人生，我覺得咁都係成功既一種丫！
－
「喂！今晚夾歌呀！」我同 Aaron 講。
「唔得喎⋯⋯我今晚約左人喎。」Aaron 笑得衰衰咁，唔係掛，唔通連佢都有女約？
「你唔係⋯⋯」
「係呀，我約左女神，哈哈！正呀！今次仲唔輪到我？」Aaron 興奮到跳起。
「有異性無⋯⋯」
「拿拿拿，我唔准你咁話以前既自己，Okay？山水有相逢，話唔定你搵返 Jamie 會有彎轉呢？」Aaron 又串我。
「妖，你吔屎喇！」我即刻向 Aaron 舉一舉中指。
「知你個次小阿梁特威喇！喂我唔講喇，我夠鐘喇，閃！」Aaron 講完之後，只係得返陣風⋯⋯
唉，又得返我自己一個，連老母都同朋友去左旅行⋯⋯
都好既，或者真係可以有靜靜一晚，畀我去思考下。
我行到去海旁，慢慢坐低，感受下海風⋯⋯真係好舒服，偶爾咁樣放鬆下，已經好足夠。
望住無邊無際既大海，我又諗返起好多前塵往事⋯⋯人生真係好似大海，想追求既野，總係無邊無際，永遠無盡頭。當你賺到100蚊，你就會想賺多200蚊，然後再加上去⋯⋯
一路追趕，其實我地又追趕到幾多野？但我地根本無好好仔細留意身邊已經擁有既野，可能已經係最好。
「兜兜轉轉漂泊到現在
分針短針錶圈中競賽
看似有盡了夢見的將來」
忽然傳來一首歌既歌聲⋯⋯原來係有個人一路播歌，一路跑步。
係 Supper Moment 既《幸福之歌》。
「今天應該高興滿自在
得到掌聲歡呼與被愛
人生已跨越幾番波折障礙賽
何時學會不再講 不要講
心底裡那份迷茫
綑綁感動的感覺 沒法講
良緣遇上不再多 卻想結果
焦急裡尋覓 愈來愈錯
幾乎忘掉了最想栽種的果」
諗返起一開始，同班兄弟係公園講往事，到後來疏遠、反面、大爆發、再和好，然後仲一齊鬧爆特首，咁既經歷真係獨一無二、彌足珍貴。仲有同 Jayden 講夢想，然後鼓勵 Jimmy 同 Sandy 去努力做自己，有好多野真係估唔到。
我更加估唔到，我一直覺得 Sherry 比 Jamie 更好，因為 Sherry 唔似 Jamie 咁煩，乜都管住曬。但到左真係失去⋯⋯我先知，原來最好既，一直係我身邊。
「唱著幸福之歌 眼淚有否沉沒
無數次失望的眼神與落魄
旋律溶掉驚慌 擁抱頃刻無悔的畫面
愛是苦中亦能笑著滿足
感動總不遠 也許下一秒盛放
一生中幾多過客探訪
幾多數不清瘋癲錯過
世界每秒轉動沒法勸阻
能捧腹開心歡笑已稀罕
疲奔於攀登高峰找答案
窮一世心力換取一秒領略愛
從頭學過可以麼 你可以麼
開始這試煉堂課
解開心頭的枷鎖 路更廣
隨緣遇到總更多 結會結的果
焦急裡尋覓 只會愈錯
奢求曾令你錯種需要的果」
「從無求 到渴求 直到渴求整個宇宙
來到最後卻只想得救
忙著擁有 忘掉你我本都一無所有」
原來我地一生人，都忙住去擁有呢樣擁有個樣，我地樣樣都想要，但其實無諗過，其實我地出生既一刻，係一無所有，而家身邊有既野，其實，已經係一種 Bonus。
「唱著幸福之歌 眼淚有否沉沒
無數次失望的眼神與落魄
旋律溶掉驚慌 擁抱頃刻無悔的畫面
愛是苦中亦能笑著滿足
感動總不遠 也許下一秒盛放
想像於不遠某位能跟你和唱」
幸福，其實一直都係我地身邊，無論呢個世界有幾咁荒謬，我地都要堅持做自己，唔好為左追求某樣野而無左自己。
追夢，從來都唔係容易既事，但我深信，只要到最後我地唔後悔，已經好足夠，因為我地曾經努力去試過、爭取過。成唔成功？交畀個天決定喇！
係架，香港，唔係一個追夢既地方。
但我地，每一個香港人，都可以係追夢既人。
諗到呢到，我又充滿正能量，或者都係時候，要令自己唔好後悔。我拎起左手機，打畀一個人。
「喂？Jamie⋯⋯？我可唔可以見下你？」
【全劇終】