《男人多情而長情，女人專情而絕情》: 第二十九章
Hi，我應該可以點？
「你覺得我應唔應該追返康僑？」
我期待佢可以俾個指路明燈我。
「你追返佢，你可以肯定你唔會再傷害多佢一次？」
俾方子龍咁樣問一問，我真係窒左一窒，唔知點好。
我份人就係咁，成日都猶豫不決。
我真係唔敢肯定，但我知我真係唔想再傷害佢。
但唔想傷害就可以傷害唔到咩？咁又唔係咁講呀。
你可能個心係唔想傷害佢，但傷唔傷害唔係由你話事，由你決定，而係由康僑佢主觀咁決定，咁你仲會唔會口口聲聲應承人？
方子龍佢睇得出我表情裡既閃縮，知我都唔敢肯定。
我好多野都畫係塊面度，咩都俾人睇穿曬，呢?係毒向左走向右走既痛處。
「既然你都唔夠肯定，你就唔好再追返人啦，我唔想佢再受多一次傷害。」
「人既心靈唔係你想像中咁堅毅，其實係好脆弱。」
「人同人之間之所以咁容易有嗌交，有磨擦，好主要既原因係因為人係好敏感，小小既野已經有唔同既反應。」
「所以我覺得你都係算啦，還佢一個自由。」
去到呢度，我已經聽唔清楚方子龍接落黎講咩，我正係記得要返佢一個自由。
係既，佢依家需要既係自由，而唔係我自私咁攬住佢，不斷咁令佢受傷。
我知道我應該點做.....
我決心要同佢斷絕聯繫，劃清界線，始終再拖落去都唔會有結果。
自己本身都唔係一個咩勇敢既人，就由佢啦。
呢個中五，我每日都自己一個坐，望住康僑佢一日比一日靚，一日比一日識打扮。
我就覺得，自己做咩野搞成咁。
所以我好俾心機讀書，為左入大學，為左唔想輸俾康僑，我想自己既生活好過D。
中五好快就過去，日日埋頭苦讀既日子真係唔係人過。
當文西佢地晚晚話要打機，你會好痛苦咁爭扎，究竟打唔打機好呢？
但最後都係未來既我戰勝左現在既我。
因為我知道，中四我已經荒廢左一年，我要係中五追返一年前既野已經好難。
如果我仲拖，要去到中六先去追既話，基本上你已經可以玩完，無可能係短短果半年到九個月既時間去追返2年前既野。
為左入大學改變自己，我拼盡左吃奶既力。
康僑佢都一樣，俾心機讀書之餘仲可以變得越黎越靚。
佢既美色其他班同D高form無可能會唔知，更加無可能無行動。
見過最癲既，白色情人節送埋花俾佢添。
的確佢變左幾多人追佢，但因為方子龍既關係，大家都退卻左。
人地都以為康僑同方子龍一齊，但事實上，我知道佢地唔係。
因為方子龍有一個佢好愛既女朋友，而康僑目前為止係未有男朋友。
我唔知康僑個心係點諗先無接受個D男仔既追求。
係因為我？定係因為佢唔再相信愛情？定因為入面無佢鐘意既男仔？
我希望康僑佢係因為我......
我一樣無拍拖，但好大原因係康僑。
因為我同佢既過去，一直都揮之不去。
好快，呢三年時間真係過得好快。
時間真係唔等人，永遠都追唔到時間。
人只可以回頭看，唔可以回頭走。
話咁快我地就畢業啦，今日係我地既last day，之後就要準備dse啦。
自從果個暑假之後，我地就無再講過任何野。
連接觸都係會叫方子龍做中間人。
曾經方子龍有講過，做我地中間人好辛苦，可以既佢都唔想做。
無奈我地無其他方法，真係辛苦曬啦。
呢一日我諗返起好多野，我覺得自己成熟左，比起3年前，我睇透左更多更多野。
諗起同康僑最後一次既對話，畫面一樣咁清晰，都係咁高清。
「你叫我以後點信你呀？」呢句好似回音咁不停係我個腦度loop，每次諗起都覺得好心酸。
係自己親手破壞曬所有野......自己好應該為自己所做既野負返責任，而唔係為自己搵藉口。
為自己搵藉口實得嫁，乜野藉口都得嫁啦，但你只係注定失敗。
當我想要負返起責任既時候，先發覺其實好耐，搵藉口真係容易得多。
last day 之前，個個都係度瘋狂咁傳紀念冊。
我係班上面真係無咩活動過，唔起眼既角力，同方子龍完全係相反。
我有俾紀念冊我班上面既同學，差唔多個個都俾曬，但收返黎既得果幾個。
不過呢D都係我預料之內，俾我都未必會寫啦。
紀念冊既第一葉，我係留俾康僑，因為佢記載住我最青春既時刻。
有一句野我係中學既時候聽過，之前都會覺得不以為然，咩姐，邊會係咁呀。
『千其唔好係16,17歲既時候愛上一個人，因為佢會係你生命當中最愛既人。』
當時既我覺得，一生人遇到既人咁多，點會正係鐘意一個人先得嫁？
一秒前可能鐘意緊一個人，但下一秒就可能已經愛上另一個，愛情就係變化咁大嫁啦。
但last day既時候我先明白，之後可能再搵唔到已經咁愛既果一種感覺。
我會鐘意上其他人，會愛上其他人，但康僑佢會一直沈澱係我內心既心處。
無人會知佢既存在，只有自己先知佢既地位有幾咁重要。
即使我地無左任何既交集，但我地曾經愛過呢個事實係唔會改變。
呢個係回憶，但依家只可以將佢封存係記憶既深處。
間唔中將呢段記憶拎出黎，自己回味一下，就已經足夠。
可能無人可以同我一齊分享我同康僑既事，正係自己同自己分享都夠high啦。
哈，成個傻仔咁！ 但我寧願做一個傻仔。
唔知點解，last day既康僑好似特別靚咁，同之前散發既氣質唔一樣。
果一日，好多人揾佢簽名同影相。
我又點會有囡想同我影呀﹖係得文西佢地揾我炸，唔返好過返，唔洗覺得自己咁孤單。
其實除左可以周圍係學校癲，影相同簽名，對我黎講無乜大意義。
可想而知我中學生活有幾咁坎坷。
去到最尾落堂，康僑都無揾過我。
我就算啦，由佢啦，就同文西佢地去左一個我地呢6年黎無去過既地方。
------------天台。
4丁友仔係天台度，雖然係幾污糟，但我地都無理咁多。
除左件校服，正係得件白色背心，就咁訓左係地下。'
望下個天，傾下D回憶。
我地低form點癲法，大家既傻的嗎野。
但我諗返起既係同康僑果9個月既學校生活。
一齊返學放學。
用張枱黎對話。
攬住康僑隻手黎訓。
係學校送禮物俾康僑，睇住佢個開心樣。
仲有好多好多，我仲諗起好多。
但咁又點?一切已成過去，返唔到轉頭。
如果我依家仲同緊康僑一齊，我就係拖住康僑，同佢一齊係天台回味我地既事。
我地都係無緣份嫁啦。
文西佢地見到我無出聲咁，就知我又諗起康僑。
「走啦，返去啦，我地仲有機會返黎既。」毒向左走向右走條無啦啦咁正經。
「Stop la啦你，你retake咪可以返黎囉。」文西佢串勁返佢。
男人就係咁樣串黎串去嫁啦。
「你都傻的嗎既，我要入大學食女!」呢個的確係唔少男仔既目標，係入大學既目標。
唔知點解佢地既邏輯係，上到大學就有女食。
曾經我都有機會可以食到女，依家俾我可能會食左佢既。
我地準備返去嫁啦，諗住一齊去食D野咁，返去癲返晚就要溫書啦。
諗起讀書就真係讀到頹頹地。
一出學校門口，我見到一個好熟悉既身影，已經係我好耐無見過，日思夜想既人。
我竟然係門口見到康僑!!!!!!!!!!!!!!!!
直覺話俾我知佢係等緊我，而我好相信呢個直覺，係有興奮同緊張。
每向門口行一步，我既心跳就加快一倍。
曾經我對佢無心跳既感覺，依家俾我搵返又點?
文西佢地都算識相，見到康僑都知咩事。
就同我講，「華dee，我地約左人，我地走先啦。」
佢地講到咁唔通我唔識做咩?
「好啦，byebye。」
跟住康僑就自動自覺咁行埋黎我度。
等文西佢地走遠左佢先開口同我講野。
中間隔左幾秒鐘，但呢幾秒鐘我係緊張度無呼吸過。
「去食D野啦好無?」康僑眼神仍然同年幾前差唔多，都係咁柔情似水。
「好呀，咁食咩呀?」
「食咩我話事啦。」講完，康僑就自己帶頭走左。
我睇得出佢既尷尬，唔好話佢，我自己都唔知點樣應對當下既氣氛。
好似返左去我地未一齊既光景，呢種感覺真係好懷念。
佢帶左我去我地之前拍拖，成日去既果間荼記。
我可以放過自己，但呢D咁珍貴既回憶我真係唔捨得放低佢。
呢段時間茶記唔係好多人，咁樣反而仲好，因為我唔知跟住落黎會發生咩事。
我地揾左個幾埋邊既位置坐低左。
呢間茶記既餐牌唔係擺係每張枱上面，而係擺係出面，要我地自己去拎。
我同康僑坐低左擺好個袋，就一齊企起身，望一望大家，會心咁笑左一下。
我地都估到大家想點，但因為我坐得比較出，所以都係我自動自覺出去拎餐牌。