《男人多情而長情，女人專情而絕情》: 第三十章
我拎左兩張餐牌返黎，一人一張咁睇。
我知康僑佢鐘意食瑞士雞翼，所以我通常都會叫個雞翼撈面，等佢可以抽下隻雞翼黎食。
今次我都一樣叫雞翼撈面。
「以前你拎餐牌都會拎一張，然後會兩個人一齊睇一張餐牌，今日你拎左兩張餐牌。」康僑佢無望住我，只係笑左一笑，但佢果個笑容係苦既，佢唔想俾我睇到佢既表情。
我唔知點樣回應佢呢句，佢咁樣講係仲對我有意思?定只係想串我?
「以前同依家點會一樣呀。」我發覺我講出黎都有D牽強﹐可以既話我都想一樣。
「係呀，都唔一樣，好多野都變緊。」佢講完呢句之後，就直接點餐。
「我要碗鮮蝦雲吞面，同一杯凍奶茶，唔該。」
佢完全避開左岩岩敏感既話題。
不過唔緊要，因為如果佢唔跳走個話題，我都唔知點接。
最令我在意既係，係康僑仲記得我鐘意食鮮蝦雲吞面，同飲凍奶茶。
就快兩年啦，無錯我以前係鐘意食鮮蝦雲吞面，但依家我鐘意食牛腩面。
點解?
因為岩岩分開果陣，我每次食雲吞面都諗起康僑，每食一次，就諗起佢一次。
你明唔明果種每咬一口面，就諗返起你同佢既點點滴滴既感受?
所以我揀食其他野，為左唔好諗起佢。
為左習慣另一種口味，我食左成個禮拜牛腩面。
但去到後來先發覺，唔關你食咩野事，你係唔習慣身邊無左個人陪住你。
鐘意一個人，係想得到佢，愛一個人，係「不斷」想為佢付出。
可能你會話，係得到佢之前，就已經要付出。
但得到左之後，你可能會繼續為佢付出，咁恭喜曬啦。
但你得到左之後就懶，覺得煩擾，你只係鐘意。
對於KaKa，我只係鐘意，得到佢，我可能就會搵返康僑。
但唯獨康僑，我真係想為佢付出我所有，因為佢值得我咁做。
以前既我唔明，依家既我無珍惜既機會。
我嗌完餐之後，返埋去坐返底。
「係呢?你諗住報D咩呀?」佢講緊選科既野。
「我想讀某U既酒店管理。」其實我連自己想做乜都唔知。
「係呀?幾好呀，果間既酒店幾出名。」
「咁你呢?」我地互相係度噓寒問暖。
「我要出國讀BBA。」
'
「下?」唔係掛?
「出國?」我第一個反應就係咁。
「去邊度讀呀?」呢個係我第二個反應。
「去英國。」佢好淡然咁講，好似完全唔覺係一回事。
但我聽完係覺得好大衝擊，畢業已經好少機會可以見到佢，依家佢仲去英國?
我都唔知點算好。
「喔，係呀?」我反應好冷淡，佢應該睇得出我咁明顯既失落。
「唔好咁啦，我地係朋友黎講，我一年返黎一次都可以見下面姐。」佢笑笑口咁安慰我。
係喔，我地係朋友黎炸喔，我都唔記得左添。
係囉，朋友黎炸，你諗咁多做咩姐沈澱華?
「熱奶茶。」店員遞左杯野飲過黎，打亂曬我既思緒。
「熱奶茶?你嫁?」康僑問。
「我無嗌野飲嫁，儉錢呀嘛。」我解釋返俾康僑知。
「下?我明明嗌凍奶茶嫁?」佢一臉天然呆咁既樣，真係好cute。
「你呢排黎M，你就唔好飲咁多凍野啦，如果唔係痛死你呀。」
「你又記得我依家黎緊M既?」佢碌大隻眼望到我實一實。
緊係啦，其實果半年我養成左幫你記黎M既習慣。
你黎M既時間好準時，基本上無錯過，所以我只要數下28日就無問題。
我幫你記錄左5年既黎M時間係部手機度。
佢隔28日就會提醒我。
即使換手機，我都有記落去。
你可能會諗，有無咁誇張呀?洗唔洗做到咁?
當你好愛+好掛住一個人，為佢做果小小野算得係咩?
雖然我完全無諗過依家會派得上用場，但我真係唔求回報，收埋係心就夠，就當係每28日諗起佢一次咁大把。
「你真係好傻。」佢笑一笑咁同我講。
其實係幾甜，但可惜既係，依家你既笑容唔再係輪到我黎守護，因為我曾經令你喊過。
我無咁既能力同咁既資格。
曾經我講過，一個男人失去左最愛既女人既笑容，即使佢擁有再多，都唔再滿足。
依家你俾我變成全世界最有錢咁又點?
可以變返以前咁咩?我想要既野係錢俾唔到我，唔係，唔係錢俾唔到，係其他野俾唔到我。
我只係想要你返黎我身邊咁簡單。依家你係我身邊啦，但唔係屬於我。
「雞翼撈到!」店員扯大個喉嚨，成個餐廳都聽到佢雄壯既聲線。
「唔該。」康僑佢有禮貌咁回應。
「等埋你先食。」我無諗住郁枱上面呢碟野。
「拎你杯熱奶茶過黎啦。」我好溫柔咁同康僑講。
康僑都好乖咁遞過黎，因為佢都唔知咩事。
我幫佢落糖，因為我記得呢間店唔幫客人落糖。
我幫佢落少少糖，然後吹左一陣，等佢涼少少先俾返佢。
「我鐘意落多D糖嫁，你唔記得左啦?」
佢好似捉到我痛腳，係度指三劃四咁。
「你平時就係成日鐘意飲甜野，飲咁多野甜野無益嫁。」我一邊搞杯奶茶一邊講，「你唔鐘意咁熱既野，所以整凍少少俾你飲，依家飲岩岩好啦。」
我遞返杯熱奶茶俾佢。
康僑佢飲左一啖，個表情好唔鐘意咁。
我地座單人卡位，康僑就係我對面。
我都係唔忍心見到佢咁既表情，幫佢加左半羹糖落去，再用湯匙幫佢搞混。
佢試左一啖，好滿意既笑容。
佢笑，比咩都重要。
估唔到自己依家仲有呢D想法。
我一直，一直都放唔低佢。
依家唔似求婚大作戰，無得黎多一次。
我唔求好似套戲咁可以返去過去咁多次，我只求返去一次。
返去當晚KaKa Whatsapp我果晚就夠，依家既我知道點樣做。
但現實又點同呀?
「以前既你唔會咁。」康僑佢低頭係度搞杯奶茶。
「以前我唔會點呀?」我好奇咁問佢，因為我真係唔知我以前係點樣…..
「以前你唔會著緊我，我既意思係，唔係著緊我既健康。」
「以前既你只求我開心就夠，希望我地開開心心，但當我地遇到唔開心咁點呢?」
「以前我地唔識處理，唔識多為對方諗，到失去左啦，先識學識點樣處理。」
「以前我唔識體諒你，唔識得見你既真心。」
「以前既你唔夠鍚我，唔夠愛我，依家你知道啦，但我地已經錯過左最美好既時候。」
一切已經返唔到轉頭，我知，如果俾個機會我，我會更加錫你。
「如果俾次機會我，你會唔會呢個機會我?」
呢一句我發自內心，出自真心。
「鮮蝦雲吞面到!」個店員又扯大個喉嚨叫啦。
「唔該。」今次我地兩個一齊講。
「食野先啦，你果碟野凍啦。
又俾佢完美兜到喎。
「食舊雞翼呀。」
「食舊雲吞呀。」
我同康僑異口同聲咁講，我地兩個既手都停滯係空中，舉住D野食，個場景真係巧合到笑。
「哈哈，好呀。」我地都笑笑咁接過彼此既野食。
呢一刻，我以為我地好似變返情侶咁。
跟住我地又靜左，默默咁食野。
食食下我醒起一樣好重要既野。
「你依家有無男朋友呀?」我語氣有D嚴肅同認真。
「做咩姐?咁你有無女朋友呀?」佢完全唔受我呢一套。
「無呀，做咩姐，唔可以無既咩?」我死撐。
「咁你後尾有無同KaKa一齊呀?」康僑窮追猛打。
「無呀。」
「點解既?」佢一臉不解。
「因為之後我發覺，你對我黎講係有幾咁重要。
我講呢句既時候係用深情既眼光去望住佢。
「挑，我先唔信，如果係呀，當初你就唔會咁做啦。」
我放低我手上面既餐具，雙手合十。
「就係之後先發覺，我認我係做錯過，但係無錯過既話，我唔會發覺原來失去你係咩野既感受，當我回個神黎，一切已經太遲。」
我專登拖慢黎講，因為我想康僑一隻字一隻字咁聽清楚，我既真心。
「無左你我就咩都無嫁啦。」
康僑佢都停曬手，抬頭望住我，眼神好銳利。
我唔會閃，呢刻我知道自己既眼神唔可以有一絲閃縮。
因為你閃過左，俾佢知道你心入面既猶疑既話，咩都救唔返。
對望左十秒左右，佢放鬆左佢既神情。
「一次不忠百次不用呀，我點知你之後會唔會好似以前咁?」佢望向其他地方，「你知人既信任好難建立，但破壞就好容易嫁啦?」