一場十年的夢。: 接觸

每日朝早嘅｢相處｣，慢慢地我嘅心被佔據。
開始我地有多一D嘅談話，但都只係普通日常談笑。
直到一日……
 
雖然我矮，但嗰個年代男仔唔打波唔可能有朋友。
為咗稍為融入，即使被人屈機、好屎波，都要打下。
矮？有幾矮呀？
唔怕老實講，到今日我已經完全發育，我都只得米六……
無睇錯，係160CM。
 


｢睇住啦！｣我係兩分區起跳射波。
｢呯！｣比人格臭咗…….
｢屌！｣打波打到灰哂機。
格臭我嗰條友係同班嘅死肥仔，恃住自己肥守籃底。
｢同你打波真高興～｣死肥仔好似嫌我唔夠柒，仲要串多我一句。
我覺得男仔圍內柒唔緊要，最撚緊要唔好比囡囡見到。
正當我咁訋黎安慰自己，我發現呀倩係球場外望住我……
屌……MOLAMOLA。
 
有咩慘得過咁。


 
柒頭事件發生第二朝，呀倩又企咗係我平常去嗰卡車度。
今日佢有少少唔同，笑容比平日更燐爛。
頂，實係笑緊我琴日單野！
然後佢竟然主動行咗埋嚟喎！！
｢喂，呀持乜你都打波架咩？睇唔出喎～｣
我心諗：｢咩叫睇唔出……矮唔打得波咩！｣
把口當然無咁講啦，對於女性我大部份時間都採取謙讓有禮，敬而遠之嘅態度。
｢打兩下啦，唔係好識打架…..｣唯有HEA應就算啦。
｢唔知今日會唔會又見到你打波呢？嘻～｣佢望住地板咁講。


然後我地又回復平日咁，佢行前我行後，望住佢身影咁返學。
 
佢對腳除左少少粗之外，仲有D蚊爛同印。
白色長襪配MK平底鞋，係我呢代嘅女學生必具裝備。
我覺得有D肉地嘅腳先叫靚腳。
我都係近年零先發現原來我係個隱性腳膠，
但病徵一早已經出現，只係我唔察覺。
 
到咗放學時間，JOHN哥約我去打波。
一邊落球場，我又好期待會見到呀倩，同時又好怕見到佢。
見到自己鍾意嘅人當然正，
但要係佢面前柒就慘過中核彈！
 
熱下身，射下波。
今日手風唔太順，連罰球線射都可以AIR……


人未齊就同JOHN哥玩下射KEY圈，
射咗唔夠兩下，呀倩出現。　
佢微笑住，風吹動佢把長髮，一手放係頭髮上面禁住D，另一手就放係裙前。
我今次主動行前去
｢嗨。｣……
不善社交嘅我，講完第一句之後就唔識接落去。
……
終於係佢打破僵局，｢講好咗今日會嚟睇你打波嘛，加油！｣
又係招牌嘅微笑。
唔知點解，當刻有一個衝動去捉住佢隻手。
｢借隻手嚟。｣我唔敢望佢對眼。
佢慢慢咁遞過黎。
我雙手捉住，合閉雙眼，將佢隻手放係我額前。
｢希望你比到力量我。｣好中二病，因為當時我的確係中二。
｢好啦。｣佢又笑左一下。


跟住我就跑返去繼續打波，唔敢望佢。
 
｢衰仔！得米啦！｣JOHN哥係度笑尻我。
｢妖！｣我都想。
 
無耐呀倩就走咗。
我估最大嘅可能係唔想再睇我打波，因為我無入過。
我根本集中唔到去打波，
佢隻手好白、好滑，細細隻又軟綿綿。
 
捉住佢隻手，
成為左我今生同佢最親密嘅接觸。