我們怎麼了？: 50
那一晚，一班人跑到旺角一間酒吧跟建倫慶祝，凌晨一點，幾杯下肚，大家都開始放下骰子和酒杯，促膝詳談起來。
今晚大家都特別高興，說得上是知無不言，言無不盡，一班人都因為謝宣諾回來而高興，也為這難得的機會盡慶。踏入成年路之後的朋友，大抵都是這樣，我們明明距離就不遠，任你們住在香港南北兩極，有心見面的話一個小時就可以找到大家的中間點。不過可惜的是，大部份的朋友，花去幾年時間也找不到大家的中心點，甚至，可能會一輩子失散。
所以今次重逢，大家都覺得，自己的生命中，尋回了曾經失去的東西。
「其實我真係唔明，我真係唔明，點解諾仔你可以咁多年都唔返香港？」明顯已有醉意的祖立，突然向謝宣諾問道
「關你乜嘢事呀，同我慶祝就慶祝啦，問呢啲咸豐年嘅事做乜？」酒量不錯的建倫怕祖立破壞氣氛，連忙把他的話題打住。
簡仁坐在一旁看著螢幕，故意避開這一幕，因為謝宣諾父母的事一向只有他跟詠莉知道，所以他不想牽涉到這話題之中。
「做乜呀？我宜家同諾仔傾偈唔得咩？諾仔，你要答我呀我話你知，唔係冇兄弟做！」祖立滿面通紅的指著謝宣諾大叫著。
「阿哥你做乜呀？坐低啦。」祖正拉著兄長，因為他知道祖立的酒量一向很差。
「由佢啦，由佢啦。」謝宣諾拍拍祖正說，祖立此時從後摟著謝宣諾，一直在他耳邊說著同一句：「你知唔知，你走咗果一兩年，我地大家都唔敢搵大家…最衰都係你……冇咗你同阿斌，我地成班人就算見面果時都好似少咗啲嘢咁……」
「對唔住…祖…」謝宣諾還未說完，祖立已經靠在他的背上睡著了。
「咁多年都係咁，一飲醉就亂講嘢。」祖正把兄長放在沙發上，好好安睡。謝宣諾看著爛醉的祖立，一直想著他那段說話，突然想起那個夢。
「係呢…建倫，你地知唔知阿斌葬喺邊？我想去拜下佢。」謝宣諾問。
大家聽到這個問題，也停了一下，氣氛也突然的嚴肅起來。
「我地都冇人知。」建倫的答案，令謝宣諾嚇了一跳，續問：「點解？」
「當年阿斌媽咪喺出事之後去咗美國搵阿斌，去到果幾日都有打電話問我地仲有冇阿斌其他消息，但後來就冇再打俾我地。當時你又走咗，我地又要搵你又要留意阿斌消息，時間一日一日咁過，最後結果係你同阿斌都冇哂消息。」建倫拿起酒杯說。
肥文：「係，我有一段時間，都覺得你同阿斌已經死咗。」
「唔見咗十幾年，正常都當佢死咗啦。」簡仁指桑罵愧，但謝宣諾依然笑著照單全收。不過，對於阿斌的下落問題，他仍然有點執著：「點解佢媽咪都冇哂消息？你地喺香港都冇見過？」
簡仁：「未搵到阿斌前咪會打俾我地問囉，咁你話佢唔打俾我地係代表乜嘢？」
簡仁強而有力的解說，讓所有人再一次沉默。
「咁又係嘅，佢得阿斌一粒仔，一心諗住送佢去美國苦讀成材，點知最後咁樣……」建偉唱完歌，也來加入討論。
「簡仁幾年前有話搵阿斌，最後冇哂消息？」建倫向著簡仁問，簡仁看一看他，再看一看謝宣諾：「成個美國，點搵？」
「喂，唔好講呢啲啦，我生日傾呢啲做乜，唱歌。」建倫拿起咪高峰，把簡仁的嘴巴擋住。氣氛很快又熱熾起來。這時突然有人推開房間的門，眾人一看，是秋凝和詠莉，後面還有詠莉的外國男朋友Fabio。
「喂，唔好意思，遲咗遲咗，要同個女訓埋覺先可以交俾奶奶湊，我老公呢？」秋凝以一身性感打扮出現，邊說邊用雙眼搜尋祖立在那。
「阿哥醉咗喇阿嫂。」祖正指指沙發上的祖立說。
「幾點醉？啱啱呀？咁佢今日算飲得喇喎，老公，你點呀？」秋凝推推沙發上的祖立，祖立勉強的打開眼睛看了一眼，然後大叫：「咪嘈我啦！踢緊波呀！」
然後又呼呼大睡過去。
「唔好理妳老公住先啦，坐低飲嘢。」詠莉這時拖著Fabio進房間，隨便的挑了一個靠門口的位置坐下，再說：「呢個我男朋友Fabio，大家見過啦。」
Fabio向在場眾人舉手示意，但唯獨是沒有向謝宣諾做出這個動作。而詠莉也一樣，由進房間的一秒鐘開始，一眼也沒有看過謝宣諾。
謝宣諾意會到詠莉這態度應該是那一晚她跟Fabio跳上車前吵架的後遺，所以也沒有太大的感受，反正人家是男女朋友，槍口一致是很合情和合理的事情。
環境又再次變得快樂，大家都很盡慶的為建倫慶祝，這一類久未會面的舊同學聚會都總是很快樂，因為大家在維繫感情之餘，也同時在懷舊大家以前的回憶。碰上誰點來一首「火熱動感LaLaLa」之類的青春舞曲，便會把大家的情緒立即推上頂峰。
這一晚也不例外，就在秋凝表演一曲「花花世界」的時候，全個房間的人也因為酒精的薰陶下跳起舞內，個別如肥文這類對跳舞有障礙的人也起勁的隨著節奏擺動身體。每個人都玩得興高采烈，只有Fabio一人完全不能融入那氣氛之中，他無聊的看著詠莉摟著秋凝跳舞，再喝光手中那啤酒後便跑到廁所解放一下。
辦完了小工之後，Fabio再到那面抽了一根香煙，五分鐘後，他回到房間，所看到的第一個畫面，竟然是謝宣諾搭著詠莉的肩膀在跳舞。Fabio看在眼裡，雙眼立即火光，便什麼也不說，非常大力地把門關上走了。
那震耳欲聾的關門聲，震醒了正在跳舞的詠莉。
「死…」詠莉立即打開大門追出去，其他人見狀也覺得好奇。
「咩事？咁大聲嘅頭先？我喺個喇叭隔離都嚇親。」秋凝說，謝宣諾不想眾人打擾詠莉，便說：「冇事，繼續唱歌啦。」
眾人很快又回復原狀繼續唱歌，只有謝宣諾一個人在為詠莉擔心。
「喂，做乜呀詠莉？」簡仁走近謝宣諾問
「唉，飲多兩杯就咁樣，明明叫自己唔好行咁近詠莉，點知玩玩下企埋咗去，一搭住就俾條鬼佬見到。」謝宣諾懊惱的說，簡仁聽到後，想了一會：「咁你仲唔追出去？」
「人地男女朋友，我走出去做乜？」謝宣諾答
簡仁：「咁係你搭落去先發生呢件事嘛，唔使負責呀？」
「得啦我出去望望。」面對簡仁的似是而非道理，謝宣諾倒是很對胃口，因為他本來就只是欠一個跑出去看個究竟的理由。他打開門，轉了幾個彎也看不見她們倆，人愈焦急，腳便愈走愈快。終於，在接近後門的一個轉角位，離遠的看到詠莉和Fabio在爭執。
謝宣諾不敢上前，只是跟上次一樣遠遠的看著她們，突然，他看見詠莉狠狠的打了Fabio一記耳光。而Fabio摸了自己的臉頰後，突然很大力的把詠莉推到牆壁。
「喂，鬼佬，你做乜呀？」謝宣諾看見，立即向Fabio衝過去