我們怎麼了？: 60
第二晚，謝宣諾七點鐘便回到家，心裡面一直在猜想著，一會兒的Msn最後聚會，會不會再次看見那個「阿斌」的上線？
不過在那之前，發生了一件小小的插曲。諾媽的腹部，突然間有一點點不妥。
「媽咪妳做乜嘢？」謝宣諾看著坐在沙發痛得臉型扭曲的諾媽問
「冇事…呢排痛多咗，聽日再去醫生度睇睇。」諾媽勉強的說
「不如我宜家同妳去醫院？」謝宣諾看見諾媽的情況，很焦慮的扶著她說
「唔使，個病咁多年，郁啲就去醫院咪好唔得閒，我知咩情況，休息一陣就冇事。」諾媽拒絕，坐在沙發上慢慢將身子撐直，按按自己的小腹說
「媽咪，食藥先。」這時諾爸準備好藥物和開水，走到諾媽的身邊
「爸，媽咪以前成日都係咁？」謝宣諾拉著諾爸的手問，諾爸則慢慢把藥物和開水交到諾媽的手上後，才向謝宣諾傳了一個眼色，示意他不要問下去。
諾媽食藥後情況變得好多，慢慢又倦極睡著了。
兩父子走到一旁，諾爸才向謝宣諾說出真相：「媽咪呢排愈來愈冇精神，上次阿爸同你講嘅嘢…」
「我呢兩日去驗，放心阿爸。」謝宣諾了解，在這個程度上的問題，其實已不用說得太多
「但都要你媽咪肯先得。」諾爸憂心忡忡的說
「一步一步嚟，阿爸我有嘢做，一陣食飯叫我。」謝宣諾拍拍諾爸，然後立即跑到電腦之前。
坐在電腦螢幕前，謝宣諾立即再次進入Msn，他緊張的拿出那個帳號記錄出來，戰戰兢兢的輸入電腦之中。
他很期待大家再一次在這個空間聚會的良機，同時也期盼，那個「阿斌」的出現。這兒時玩意已經進入倒數狀態，這次不見，以後也再不會看見。
終於，謝宣諾連上了自己的帳號，順利的進入Msn。三秒後，他已經被邀進了一個聊天室內。
多麼熟悉的感覺。
【巴士迷夏建倫】：「喂，諾仔咁晏呀，哈哈。」
【豬小立】：「咪係，我地傾咗好耐喇。」
【日本天才鋼門~仁】：「諾哥肯出現都好啦，哈哈。」
【※諾哥※】：「唔係呀，我媽咪有唔舒服，我陪咗佢一陣先上到。」
【秋凝妹~小秘密】：「伯母又痛？」
【日本天才鋼門~仁】：「要用車出聲。」
【※諾哥※】：「唔使住，佢話聽日先去睇」
【巴士迷夏建倫】：「咁你唔好玩住啦，睇住佢先。」
【豬小立】：「係呀，伯母身體要緊。」
【※諾哥※】：「得喇，由佢訓一陣先。」
【秋凝妹~小秘密】：「點樣由得佢訓一陣，你要問多幾句呀諾仔。」
【日本天才鋼門~仁】：「留意住有冇發燒。」
「係喎…唔係佢地講，我都仲以為媽咪訓著咗，休息一陣就得。」謝宣諾自言自語的說，立即起來跑到諾媽的旁邊，量一下她的體溫。
「冇事…都好啲。」謝宣諾又走回電腦，再看看他們在聊什麼。
【豬小立】：「都唔係個個人都識照顧人。」
【日本天才鋼門~仁】：「呢啲嘢有心就得啦。」
【秋凝妹~小秘密】：「簡仁你上嚟傾計定係出火呀？」
【日本天才鋼門~仁】：「有火出又好呀。」
【巴士迷夏建倫】：「叫祖立同你去囉，哈哈。」
看著他們的對話，謝宣諾鍵入母親的狀態：「冇事喇，冇燒。」
【秋凝妹~小秘密】：「伯母有時手腳會好冰，太凍你就要留意住。」
【※諾哥※】：「知道，唔該哂。」
【秋凝妹~小秘密】：「佢成日唔飲水，因為有時會痛，你要逼佢飲。」
【※諾哥※】：「知道。」
【秋凝妹~小秘密】：「傷口換喉時記得拎消毒藥水呀，世伯有時會冇記性。」
【※諾哥※】：「哦……秋凝，係咪詠莉同妳講呀呢啲嘢？」
【豬小立】：「………………」
【巴士迷夏建倫】：「…………………」
【日本天才鋼門~仁】：「諾哥你講笑呀？」
【秋凝妹~小秘密】：「詠莉有咁好咩？」
【※諾哥※】：「佢好，係我唔好之嘛，不過點都好啦，多謝妳先秋凝。」
【巴士迷夏建倫】：「喂，今日唔好講呢啲先啦諾仔。」
【豬小立】：「咪係…今日係我地搵返以前回憶嘅時候好冇？」
【※諾哥※】：「好好，你地傾咗咁耐，搵得返啲回憶未呀？」
【日本天才鋼門~仁】：「講開呢樣，我有啲嘢想同你地講，我之前開過Msn，我見過阿斌上網………」
簡仁說出這話時，謝宣諾顯得有點驚訝，因為他猜不到除了自己之外，連簡仁也曾經見過「阿斌」的上線。
但更驚訝的還在後頭，不單止是簡仁，就連其他三個人也同時說出一句：
「我都見過喎。」
【日本天才鋼門~仁】：「我以為得我見過，又唔知點同你地講…」
【豬小立】：「我地兩公婆都係，我地係下晝見到，想同佢講嘢已經下咗線。」
【巴士迷夏建倫】：「我諗緊係唔係佢屋企人用佢個帳號上，所以唔敢叫佢。」
眾人你一言我一語，但謝宣諾一直也沒有加入其中。他一直看著眾人的說話，一直在盤算著。
到底，是什麼一回事？
此時，所有人都同時收到一個訊息。他們，每一個人，都被加進了一個聊天室之內。
而這個主持人的名字，便是他們一直在討論的人。
【艾力大帝●斌】。
「阿斌呀！」謝宣諾對著螢幕大叫，那叫聲，大得諾爸也跑出來問：「諾仔，做乜呀？」
「阿斌呀阿爸，我朋友阿斌喺Msn搵我地成班人呀。」謝宣諾拉著諾爸的手大叫，而諾爸則架上眼鏡，把臉貼到螢幕前兩呎的看著：「阿斌？十幾年前走咗個阿斌？有咩可能呀？」
謝宣諾一直搖著諾爸的手一邊看著螢幕，他不敢打字，他只是死死的看著那個聊天室底部的一句。
【艾力大帝●斌】正在輸入訊息………
「佢打字呀……爸……佢打字呀……」謝宣諾一邊說，眼睛跟鼻子已很快變得通紅，眼眶看得見，開始湧出眼淚。
整個聊天室，除了建倫問了一句「邊個？」之內，其他人都沒有鍵入訊息。謝宣諾這刻有同感，他們五個人，都是看著同一個地方。
【艾力大帝●斌】正在輸入訊息………
如果還記得，阿斌的打字速度是很慢的，所以等得愈久，謝宣諾的內心便愈激動，電腦的另一邊是阿斌的機會便愈高。
此時，謝宣諾憑著自己的感覺，立即拿起電話，沒有理會之前的吵架，撥了個電話給詠莉。
「喂。」詠莉接聽
「詠莉……阿斌呀……阿斌喺Msn加哂我地入聊天室，好大可能係阿斌……妳喺邊呀？」謝宣諾機關槍式的說著
「我知道，我知道，我再打俾你。」詠莉掛機，謝宣諾意識到是Fabio在附近。此時，電腦螢幕終於跑出一句說話來。
十二年，足足十二年，在沒有可能的機會下，謝宣諾、建倫、祖立和簡仁終於等到了他們牽腸掛肚的這個一消息。十二年九月十一號消息的阿斌，終於再出現在他們的面前……
【艾力大帝●斌】：「十二年不見，朋友們，我們怎麼了？」