我們怎麼了？: 68
出門前，謝宣諾在鏡前整理好裝束，心裡面在盤算著等一下怎麼跟叔叔來一個完美的開場白。這時諾爸走來，為他弄好衣領。
「你當我仲細咩阿爸。」謝宣諾跟父親開個玩笑，諾爸拉了他的衣服一下，再道：「你唔帶個孫俾我地玩我咪當你細路仔囉。」
「得喇，你地好快會見到佢。」謝宣諾道
「真係？」這時諾媽在房間內走出來，二人看見，立即上前扶著她。
「媽咪，妳唔舒服唔好走嚟走去啦。」謝宣諾緊張的說，諾媽甜在心裡「我冇事，你講嘅係唔係真？唔好呃我地兩個呀。」
「我已經打電話同泰國果邊講咗，家寶證件都就嚟整好。只要一搞掂所有嘢我就會叫守業帶佢過嚟。」謝宣諾又跑回門前，穿好襪子準備出門。
「諾仔，一陣記得好好同阿叔傾，阿爸買定哂嘢今晚煮餐好嘅幫阿叔攞個好意頭呀。」諾爸仍是有點擔心謝宣諾的性格，又重新的叮囑一次。
「個仔大喇，佢知點做。」諾媽拍拍諾爸的肩膀
「我知，我明，我出去喇，兩位大人。」謝宣諾拿起鑰匙包，向父母親作了一個敬禮狀後，便正式出門。
因為在香港還未有搞清楚國際車牌的問題，所以謝宣諾沒有辦法駕車，所以召來了一輛計程車。車子到達監獄的正門，謝宣諾依據著爸爸的指示，一直等待著。
不經不覺，等了兩個小時。
「喂，老友，你有冇記錯時間呀？」計程車司機問坐在後座上正在發呆的謝宣諾。
「冇呀，都唔緊要啦，繼續等。」謝宣諾沒趣的說
「我冇所謂呀，個錶跳到幾舊水，我怕你肉赤咋。」計程車司機邊看報紙邊說，謝宣諾連隨把一千元鈔票放到前座上「慢慢扣，唔使怕。」
「哈哈，好好。」
再多睡半個小時後，熟睡中的謝宣諾突然聽到司機的叫聲。
「有人行出嚟，哥仔你睇下係唔係呢個。」
謝宣諾聞言，整個人立即跳起來。他打開車門走出車外，定眼的看著監獄大門，果然看見一個人正慢慢的向自己的方向走過來。
謝宣諾看著那人由遠至近，穿著一身素服，一件簡單的棉衣還有一條白色的布褲，手上拿著一個小皮包，頭上半邊已經是白髮蒼蒼。
那種有點陌生的感覺，讓謝宣諾一下子不能確認這個就是叔叔謝景晨，直到距離三十米左右的距離，謝宣諾終於認得出來。
這個已經滿頭白髮的男子，正是自己的叔叔。
「叔。」謝宣諾大叫，然後立即走上前。那幾十米之遙，由謝宣諾那短短幾步便抵消了，一瞬間，他已經走到自己的叔叔的面前。
很久不見喇，他的白髮讓侄兒看得好生難過。
「叔，我係諾仔。」謝宣諾站在謝景晨的面前，輕輕的再向長輩作見面禮。近距離的看，謝宣諾把叔叔看得真切，年少時的瀟灑已經蕩然無存，換來的是一個飽歷風霜的面容。
謝景晨看著謝宣諾，一直沒有說話，這是謝宣諾意料之內的事情。
而他也一直不敢說話，因為他根本不知道叔叔現在的心理狀態。
「你阿爸同我講過你返咗嚟，仲話你想嚟探我。」謝景晨打破了差點凝結了的空氣。
「係呀阿叔，我宜家同阿爸媽咪搬咗去新屋住，已經準備咗地方俾你返去住。」謝宣諾順著藤子探路，反正就是要依附著叔叔的說話去計劃怎樣可以讓自己得到原諒。
「阿哥有講過，係喎，點解得你一個？」謝景晨走到路旁的一張椅子，慢慢的坐下去。謝宣諾連忙走過去，坐在旁邊答「媽咪唔係好舒服，阿爸要睇住佢，所以我自己一個嚟接你。」
「只係阿嫂唔舒服咁簡單？」謝景晨又續問，謝宣諾知道叔叔的智慧，而其實也沒有什麼需要轉彎抹角的地方。
「對唔住，阿叔。」
謝宣諾誠懇的向謝景晨道歉，然後閉上嘴巴準備打不還手、罵不還口。而謝景晨則摸摸自己的膝蓋，好像在沉思什麼似的。
良久，謝宣諾終於等到謝景晨的回覆
「有咩對唔對得住，你做咗人爸爸，係咪覺得好多嘢都好後悔？」謝宣諾點點頭，謝景晨又繼續說「你一定以為我會因為呢十幾年嘅事，鬧到你狗屎淋頭？」
「我抵鬧，就算你好似細個果時咁打我，我都覺得係應該。」謝宣諾說來是一百巴仙的真誠，全因為這個叔叔對自己的付出實在是太多。
「我仲鬧你做乜？十幾年前打你係因為唔想你有後悔，唔想你揀錯。到宜家你要後悔嘅都後悔完，要揀錯嘅都返唔到轉頭，我仲打你做乜？」謝景晨幽幽的答道
「你唔嬲我咩？」謝宣諾不解，追問下去。
「阿哥有同我講你嘅事，我知道你個仔叫家寶。
諾仔，第時家寶都會經過你細個嘅反叛期，到時你就會知道，每個你最親嘅長輩都係好愛錫你。有邊個唔想你地健健康康一路風平浪靜咁成長？有邊個想成日惡形惡相咁鬧你同打你地？
你知唔知道，阿叔打你果兩巴，每次打完之後個心都好難受？有得揀，阿叔點解唔係同你日日睇波，吹下水飲下酒？」
謝景晨的說話，大大的超出了謝宣諾的預算，本來已經準備了一副金鐘罩來迎接攻勢的他，一下子的軟弱了下來。
不過不用捱罵的感覺，原來一點也不好受。但謝宣諾在難受的瞬間，他學會了一套從來沒有意會過的處事方法。原來像叔叔謝景晨一樣的處世，既不比較又不計算，每樣事也以最客觀的角度去處理，是可以讓身邊的人有所得著。
目標為本，他十多年前跟我說的目標為本，現在就用眼前這個例子來演活。你本來可以把我鬧得死去活來，但你以家庭這個目標為本，找到了事情的重心所在，其他的細小沙石，也可以統統視而不見。
儘管你已經為我們付出了很多很多。
謝宣諾說不了話，心裡面很感激很感激這個叔叔。
「信阿叔未？」謝景晨問道，謝宣諾跟著點點頭回應「信，我仲搵到你張相，阿媽話我知，你成日同我講果個朋友，原來係舒利亞…我仲見到佢本自傳入面，有寫你嘅事，阿叔，你真係好叻。」
「你地班後生，冇事果時我地班老人家講嘅嘢就一句都聽唔入耳。到撞咗板，就將我地捧到天咁高。咁樣有用咩？如果咁樣有用，你阿爺死果時我就唔會喊咗咁耐啦。」謝景晨道
「可能成長路就係要咁行。」謝宣諾笑笑
「你講就易，試下第時家寶一日激你三次，你命都短幾年呀，行啦，的士等緊我地。」謝景晨拿起自己的行裝說
「阿叔我幫你拎。」謝宣諾搶去，然後走在跟前。走了兩步又問「但點解你唔俾我嚟探你？我其實一直都好怕你好嬲我。」
「我都就出嚟啦仲探我做乜？宜家坐監呀你估我做太平紳士呀？俾你見到我個樣以後我仲使見人？」謝景晨踢踢謝宣諾的屁股，兩叔侄嘻嘻哈哈的跳上計程車打算回家。
途上，他們開始像從前一樣暢所欲言，這時計程車司機又來搭訕「你地係父子呀？個樣又幾似。」
「兩叔侄，似唔似？」謝景晨搶答他，司機看得出是健談的人，又繼續的問「似呀，見你地傾得咁投契，一家人開開心心咁樣就最好。」
「係呀，最緊要係一家人開心。」謝宣諾附和，這句話說來，就正好是他目前的最佳體會。
「我同你地講，就算你話好似李嘉誠咁，我都夠膽講一定唔夠我開心，知唔知點解？
就咁，我一個星期開五日工，每日搵佢幾佰蚊，夠皮我就收工喇。平日夜晚就打下麻雀，訓得晏我就自己休息一日，又唔使受人氣又自由你話係唔係開心？
仲有呀仲有呀，星期六晚，我個仔就會同我個孫嚟同我睇英超，你睇我個樣好似好後生呀呢？我六兜嘢都嚟喇，我個仔今年都三十六歲，屬蛇嘅佢，個孫就十四歲，好鬼高大呀，哈哈。
星期六晚我地三爺孫就睇波，睇完食下宵夜，訓一覺第二日就一齊去踢波。我雖然六十歲咋，但仲踢得下。你地話，我分個波俾個孫，個孫扭幾件落底出個靚波俾佢老豆頂入，然後三爺孫攬埋一舊慶祝入波，係唔係過癮？
所以我話，係咪李嘉誠都唔夠我開心？」
謝宣諾和謝景晨一直聽著司機的口若懸河，一邊點頭表示同意。因為他們都百份百同意，這位司機的生活，的確是非常、非常的快樂。
回家後，他們很開心的吃了一頓飯。那一晚謝宣諾很快樂，算是回香港後最快樂的一晚。凌晨的時候，全家人都呼呼大睡，謝宣諾在房間內跟守業談了一通電話。
謝宣諾：「到時你收到我電話，你就幫我接家寶過嚟。佢宜家同Sandy去咗曼谷，到時Sandy會俾電話你。」
守業：「諾仔，咁耐都俾電話我，你有冇特別事？」
謝宣諾：「冇，不過………守業，公司果邊有冇特別事？」
守業：「冇，好順利。」
謝宣諾：「順利就好，我可能………唔會返嚟，以後都唔會返嚟。」
守業：「嗯……香港同泰國唔遠，要見有幾難，你自己搵到想要嘅嘢就得。」
謝宣諾：「我好快會去美國，上次同你講過，我地會去搵阿斌。」
守業：「順利，平安。」
「多謝，兄弟。」
兩日後，謝宣諾收到通知，去美國的簽証已經辦妥。
然後，他立即致電簡仁：
「簡仁，我簽証得喇，你果邊都冇問題就儘快出發。」
「我都得，咁樣……下星期六出發，俾埋時間你請假好冇？」
「冇問題。」